រដ្ឋាភិបាលអូស្ត្រាលី បានផ្តល់រថយន្តមួយគ្រឿងតម្លៃជិត ៥ម៉ឺនដុល្លារ ដែលមានបំពាក់ឧបករណ៍សម្រាប់លើកដាក់ជនពិការ ទៅដល់អង្គការជនពិការកម្ពុជា ដើម្បីជួយសម្រួលឲ្យជនពិការដែលជិះរទេះ មានលទ្ធភាពធ្វើដំណើរតាមទីសាធារណៈ។ នេះជាលើកទី១ហើយ ដែលកម្ពុជា មានរថយន្តសម្រាប់លើកដាក់ជនពិការ។
មន្ត្រីជាន់ខ្ពស់នៃអង្គការជនពិការកម្ពុជា ឲ្យដឹងថា ជនពិការនៅតែជួបការលំបាកក្នុងការធ្វើដំណើរ ដោយសារតែរថយន្តក្រុង រថយន្តឈ្នួល ស្ថាប័នរដ្ឋ និងឯកជនភាគច្រើន មិនបានបំពាក់នូវឧបករណ៍ទំនើប ដែលអាចបញ្ជាលើកចុះសម្រួលដល់ការធ្វើដំណើរ។
នាយកប្រតិបត្តិអង្គការជនពិការកម្ពុជា លោក ងិន សៅរ័ត្ន ថ្លែងនៅក្នុងពិធីសម្ពោធប្រើរថយន្តបំពាក់ឧបករណ៍ សម្រាប់លើកជនពិការនៅថ្ងៃទី១០ មេសា ថា កង្វះបច្ចេកទេសទំនើប និងការច្នៃប្រឌិតលើមធ្យោបាយធ្វើដំណើរ កំពុងក្លាយជាឧបសគ្គដល់ជនពិការនៅកម្ពុជា ក្នុងការចូលរួមអភិវឌ្ឍសង្គម៖ «ប្រសិនបើយើងមានឧបករណ៍គ្រប់គ្រាន់ក្នុងការជួយបងប្អូនជនពិការ ជនពិការមិនមែនជាឧបសគ្គសង្គមទេ ជនពិការគាត់អាចចូលរួមសង្គម គាត់អាចធ្វើដំណើរបានចូលទីផ្សារដោយសេរី ពុំមានការរើសអើង»។
លោកបន្តថា ជនពិការភាគច្រើនពិបាកធ្វើដំណើរ មិនមានលទ្ធភាពចេញចូលតាមអគារសាធារណៈ ដោយសារតែអគារសំណង់ភាគច្រើនមិនមានជម្រាល បង្គន់អនាម័យមិនមានបង្កាន់ដៃសម្រាប់ជនពិការ ច្រកចេញចូលតូចមិនសមល្មមសម្រាប់ជនពិការជិះរទេះ មិនមានស្លាកសញ្ញា ឬសំឡេងបង្ហាញ ផ្លូវសម្រាប់មនុស្សថ្លង់ និងជនពិការភ្នែក ជាដើម។ លោកបន្តថា ប្រព័ន្ធដឹកជញ្ជូនសាធារណៈ រួមមាន រថយន្តក្រុងដែលទើបប្រកាសប្រើប្រាស់នាពេលថ្មីៗ និងរថយន្តឈ្នួលមិនមានបំពាក់ឧបករណ៍ ឬប្រព័ន្ធសមស្របសម្រាប់ឲ្យជនពិការប្រើប្រាស់បាន។
លោកបន្ថែមថា ជនពិការភាគច្រើនបានពឹងផ្អែកលើគ្រួសារ សាច់ញាតិ មិត្តភក្ដិដឹកជូនទៅសាលារៀន កន្លែងធ្វើការ និងកន្លែងនានា ហើយជនពិការជិះរទេះខ្លះ ចាំបាច់ត្រូវមានអ្នកជួយសែង ឬលើកពួកគាត់ពេលដែលពួកគាត់ធ្វើដំណើរតាមរថយន្តក្រុង ឬរថយន្តឈ្នួល។
រថយន្តទំនើបមួយគ្រឿងដែលមានភ្ជាប់នូវទម្រលើកដាក់ ដែលអាចលើកចុះដោយចុចប៊ូតុងបញ្ជា ដែលរដ្ឋាភិបាលអូស្ត្រាលី ផ្តល់ឲ្យអង្គការជនពិការកម្ពុជា សម្រាប់សម្រួលការធ្វើដំណើរដល់ជនពិការជិះរទេះ ត្រូវបាន លោក ងិន សៅរ័ត្ន គិតថាជារថយន្តគំរូលើកទី១ ដែលគិតគូរជនពិការ ហើយនេះជាសារមួយឲ្យរដ្ឋាភិបាល ក្រសួងស្ថាប័នរដ្ឋ និងអង្គការជាតិអន្តរជាតិទាំងអស់ យកចិត្តទុកដាក់ និងគិតគូរច្នៃប្រឌិត ឬបំពាក់ឧបករណ៍លើមធ្យោបាយធ្វើដំណើរ និងច្រកចេញចូលផ្សេងៗ ដែលធានាភាពងាយស្រួលដល់ជនពិការក្នុងការធ្វើដំណើរ។ លោកបន្តថា អង្គការជនពិការកម្ពុជា ស្វាគមន៍ចំពោះអង្គការជាតិអន្តរជាតិ ឬស្ថាប័នរដ្ឋ ដែលចង់ជួល ឬខ្ចីរថយន្តនោះទៅប្រើ ដើម្បីបម្រើប្រយោជន៍ដល់ជនពិការ។
ជនពិការជើងជិះរទេះរុញម្នាក់ឈ្មោះ អឺ លី ឲ្យដឹងថា លោកចង់មានសេរីភាពក្នុងការធ្វើដំណើរតាមទីសាធារណៈ ដោយមិនចាំបាច់មានគេជួយលើក ឬរំខានគេឲ្យជួយលើក ឬសែងចូលក្នុងរថយន្ត។ លោកស្នើសុំឲ្យរដ្ឋាភិបាល គិតគូរភ្ជាប់នូវឧបករណ៍ទំនើប ដើម្បីឲ្យជនពិការអាចធ្វើដំណើរស្រួល៖ «វាអត់មានឧបករណ៍លើកជនពិការ អត់មានជម្រាលសម្រាប់ជនពិការឡើង គឺយើងត្រូវការពឹងពាក់អ្នកដទៃ ដើម្បីជួយលើកយើងឡើង រំខានដល់អ្នកដទៃ ហើយយើងអត់មានសេរីភាពក្នុងការដើរហើរ»។
អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក កែវ បូរេន្ទ្រ ដែលចូលរួមសម្ពោធប្រើប្រាស់រថយន្តបំពាក់ឧបករណ៍សម្រាប់លើកជនពិការ មិនបានប្រាប់ពីផែនការដែលក្រសួងមានសម្រាប់សម្រួលឲ្យជនពិការ ងាយស្រួលធ្វើដំណើរតាមការស្នើសុំនោះឡើយ។
មាត្រា២៣នៃច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ ចែងថា ស្ថាប័នរដ្ឋឯកជនទាំងអស់ ត្រូវរៀបចំលក្ខណៈងាយស្រួលចេញចូលកន្លែងសាធារណៈ ឬលើមធ្យោបាយដឹកជញ្ជូនផ្សេងៗ សម្រាប់ជនពិការ។ ប៉ុន្តែបើតាមការសង្កេតរបស់នាយកប្រតិបត្តិអង្គការជនពិការកម្ពុជា ស្ថាប័នរដ្ឋឯកជន និងតាមទីសាធារណៈប្រមាណ ៩៥ភាគរយ មិនមានឧបករណ៍ ឬជម្រាលសម្រាប់បង្កលក្ខណៈងាយស្រួលធ្វើដំណើរទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។