មន្ត្រីក្រសួងស្ថាប័នពាក់ព័ន្ធវិស័យទេសចរណ៍ បានស្នើឲ្យម្ចាស់សេវាកម្មទូកដឹកអ្នកដំណើរ ឬភ្ញៀវទេសចរចេញទៅកម្សាន្តតាមកោះ ឬសមុទ្រទាំងអស់នាខេត្តព្រះសីហនុ ដែលមិនទាន់បានចុះបញ្ជីធ្វើអាជីវកម្ម ត្រូវមកបំពេញបែបបទសុំចុះបញ្ជីឲ្យបានស្របច្បាប់ បើមិនដូច្នេះទេ ចាប់ពីឆ្នាំ២០១៦ នេះតទៅ សមត្ថកិច្ចនឹងមានវិធានការតាមផ្លូវច្បាប់។ សម្រាប់ម្ចាស់អាជីវកម្មទូកដឹកភ្ញៀវទេសចរ មិនជំទាស់នឹងសេចក្ដីប្រកាសនេះទេ ប៉ុន្តែស្នើមន្ត្រីជំនាញពាក់ព័ន្ធជួយជំរុញឲ្យសកម្មភាពនៃការចុះបញ្ជីធ្វើអាជីវកម្មទូកដឹកភ្ញៀវកម្សាន្តនេះ ឲ្យមានដំណើរការរលូន ឬគ្មានការរំខាន។
ប្រធានមន្ទីរទេសចរណ៍ ខេត្តព្រះសីហនុ លោក នូ សុផល មានប្រសាសន៍ថា អាជ្ញាធរមិនទាន់គ្រប់គ្រងម្ចាស់អាជីវកម្មប្រកបរបរដឹកភ្ញៀវចេញទៅកម្សាន្តតាមកោះ ឬតាមសមុទ្រ នាខេត្តព្រះសីហនុ បានល្អទេ ព្រោះនៅមានម្ចាស់អាជីវកម្មមួយចំនួនមិនទាន់បានមកចុះបញ្ជីប្រកបអាជីវកម្មនេះឲ្យស្របច្បាប់នៅមន្ទីរទេសចរណ៍ខេត្តនេះនៅឡើយទេ។
លោកបន្តថា ទូក ឬកប៉ាល់ ដែលអាចធ្វើអាជីវកម្មដឹកភ្ញៀវទេសចរស្របច្បាប់ គឺទាល់តែមានចុះបញ្ជីធ្វើស្លាកលេខទូកសម្រាប់សម្គាល់មធ្យោបាយនេះ ឲ្យបានត្រឹមត្រូវពីស្ថាប័នពាក់ព័ន្ធ មានក្រសួង ឬមន្ទីរសាធារណការខេត្តជាដើម។ ជាងនេះទៀត ម្ចាស់អាជីវកម្មទូក ឬកប៉ាល់ដឹកភ្ញៀវទេសចរទាំងអស់ដែលកំពុងដំណើរការអាជីវកម្ម នាខេត្តព្រះសីហនុ ត្រូវមកសុំចុះបញ្ជីប្រកបអាជីវកម្មរបស់ខ្លួននៅមន្ទីរទេសចរណ៍ ដើម្បីអាចធ្វើអាជីវកម្មឲ្យបានស្របច្បាប់។
ត្រង់ចំណុចនេះ លោក នូ សុផល បញ្ជាក់ថា មន្ត្រីជំនាញស្ថាប័នខ្លួនបានរង់ចាំការចុះបញ្ជីសុំអាជ្ញាប័ណ្ណស្របច្បាប់ពីម្ចាស់អាជីវកម្មទូកដឹកភ្ញៀវទេសចរចេញទៅកម្សាន្តតាមកោះជារៀងរាល់ថ្ងៃធ្វើការងាររដ្ឋ៖ «ម្ចាស់អាជីវកម្មទូកដឹកភ្ញៀវទេសចរភាគច្រើនគឺមិនបានផ្ដល់ព័ត៌មាននៃចំនួនភ្ញៀវទេសចរ ដែលទិញសំបុត្រចេញទៅកម្សាន្តតាមកោះនានា មកកម្លាំងសមត្ថកិច្ចជំនាញទេកន្លងមក។ បញ្ហានេះ ម្ចាស់ធ្វើអាជីវកម្មទូកដឹកភ្ញៀវទេសចរ ហាក់មិនសហការ ឬផ្ដល់ព័ត៌មានមកកម្លាំងជំនាញឲ្យបានត្រឹមត្រូវ ដែលជាហេតុធ្វើឲ្យមានការលំបាកក្នុងការគ្រប់គ្រងចំនួនភ្ញៀវទេសចរទាំងជាតិ និងអន្តរជាតិ ដែលចេញ ឬចូលទៅកម្សាន្តតាមកោះ នាខេត្តព្រះសីហនុ កន្លងមក»។
លោក នូ សុផល សង្កត់ធ្ងន់ថា ចំពោះម្ចាស់អាជីវកម្មទូកដឹកភ្ញៀវទេសចរទាំងឡាយណាដែលមិនព្រមស្ដាប់តាមការណែនាំរបស់ក្រសួង ឬមន្ទីរជំនាញទេ នៅថ្ងៃខាងមុខនឹងអាចឈានដល់អាជ្ញាធរមានវិធានការតាមផ្លូវច្បាប់ ឬឈានដល់ផ្អាកការធ្វើអាជីវកម្មទៅលើម្ចាស់អាជីវកម្មដែលគ្មានច្បាប់អនុញ្ញាតជាបណ្ដោះអាសន្ន។
ទាក់ទិនបញ្ហានេះ លោក ថោង ខុន រដ្ឋមន្ត្រីក្រសួងទេសចរណ៍ នៅក្នុងពិធីជួបជុំជាមួយម្ចាស់អាជីវកម្មទូកដឹកភ្ញៀវទេសចរ កាលពីថ្ងៃទី៣១ ខែធ្នូ ឆ្នាំ២០១៥ នាខេត្តព្រះសីហនុ បានអំពាវនាវដល់ម្ចាស់ធ្វើអាជីវកម្មទូកដឹកអ្នកដំណើរទាំងអស់ ត្រូវត្រៀមសម្ភារៈសង្គ្រោះភ្ញៀវទេសចរនៅពេលជួបគ្រោះអាសន្ននៅលើលំហសមុទ្រឲ្យបានគ្រប់ចំនួន មានដូចជា អាវពោង និងលេខទូរស័ព្ទទាក់ទងមកកាន់ស្ថាប័នជំនាញ ដើម្បីសង្គ្រោះភ្ញៀវឲ្យបានទាន់ពេល។
លោក ថោង ខុន បង្ហាញការព្រួយបារម្ភចំពោះម្ចាស់អាជីវកម្មទូកដឹកភ្ញៀវទេសចរធុនតូច ដែលដឹកភ្ញៀវចេញទៅកម្សាន្តតាមកោះ ឬសមុទ្រមួយចំនួនដែលមិនទាន់បានបំពាក់សម្ភារៈសង្គ្រោះពេលជួបគ្រោះអាសន្ននៅលើលំហសមុទ្រឲ្យបានគ្រប់ចំនួននៅឡើយ ហើយមិនទាន់មកចុះបញ្ជីធ្វើអាជីវកម្មឲ្យបានត្រឹមត្រូវនៅឡើយនោះ។
លោករដ្ឋមន្ត្រី ថោង ខុន សង្កត់ធ្ងន់ថា ប្រសិនបើម្ចាស់អាជីវកម្មដឹកអ្នកដំណើរដែលគ្មានច្បាប់ ហើយមិនព្រមស្ដាប់តាមការណែនាំរបស់មន្ត្រីជំនាញទេ សមត្ថកិច្ចនឹងចុះផ្អាកដំណើរការទៅលើម្ចាស់អាជីវកម្មគ្មានច្បាប់ទាំងនោះជាបណ្ដោះអាសន្ន ឬប្រឈមដល់មុខច្បាប់៖ «បញ្ហាសេវាបម្រើដល់ភ្ញៀវទេសចរចូលមកកម្សាន្តខេត្តព្រះសីហនុនេះ សម្ដេចតេជោក៏បានដាស់តឿនដែរ សូមឲ្យបងប្អូនអាជីវករទាំងអស់ត្រូវពង្រឹងគុណភាពនៃការទទួលសេវាទេសចរណ៍ដល់ភ្ញៀវឲ្យមានគុណភាព ជាពិសេសសេវាផ្នែកដឹកជញ្ជូន ត្រូវយកចិត្តទុកដាក់ឲ្យបានល្អ និងត្រូវគិតពីសុវត្ថិភាពភ្ញៀវឲ្យបានខ្ពស់បំផុត»។
ទាក់ទិនបញ្ហានេះ តំណាងម្ចាស់អាជីវកម្មទូកដឹកភ្ញៀវទេសចរប្រមាណជាង ២០នាក់ កាលពីថ្ងៃទី៣១ ខែធ្នូ បានថ្លែងនៅចំពោះមុខលោករដ្ឋមន្ត្រី ថោង ខុន ថា ពួកគេមិនជំទាស់នឹងការអំពាវនាវឲ្យទៅចុះបញ្ជីធ្វើអាជីវកម្មនេះទេ ប៉ុន្តែស្នើឲ្យមន្ត្រីជំនាញក្រោមឱវាទស្ថាប័ននេះ ជួយជំរុញឲ្យការចុះបញ្ជីធ្វើអាជីវកម្មរបស់ពួកគេកុំឲ្យជួបភាពសាំញ៉ាំ ឬអូសបន្លាយពេលយូរ។
ម្ចាស់អាជីវកម្មទាំងនោះអះអាងថា ពួកគេបានប្រុងប្រយ័ត្នខ្ពស់ទៅលើសុវត្ថិភាពរបស់ភ្ញៀវទេសចរជាតិ និងអន្តរជាតិ នៅពេលដឹកភ្ញៀវចេញទៅកម្សាន្តតាមកោះ ឬសមុទ្រជារៀងរាល់ថ្ងៃ។ ក្នុងនោះនៅពេលអាកាសធាតុមានខ្យល់ព្យុះមិនអំណោយផល គឺមិនចេញទូកទៅតាមការទាមទាររបស់ភ្ញៀវទេ។ ជាងនេះទៀត កន្លងមកពួកគេបានស្ដាប់ និងអនុវត្តទៅតាមការណែនាំរបស់សមត្ថកិច្ចជំនាញខេត្តព្រះសីហនុ ជាប់ជារហូតមក។
ត្រង់ចំណុចនេះ លោក នូ សុផល ប្រធានមន្ទីរទេសចរណ៍ខេត្តព្រះសីហនុ បញ្ជាក់ថា សព្វថ្ងៃនេះមានទូកដឹកភ្ញៀវទេសចរចំនួន ៤០ កំពុងដំណើរការ។ ប៉ុន្តែក្នុងនោះ មានទូកដឹកភ្ញៀវទេសចរចំនួន ២០ មិនទាន់មានអាជ្ញាប័ណ្ណ ឬមានច្បាប់ធ្វើអាជីវកម្មឲ្យបានត្រឹមត្រូវនៅឡើយទេ៖ «ពេលភ្ញៀវចេញ និងវិលពីដំណើរកម្សាន្តតាមកោះ គឺម្ចាស់ទូកដឹកភ្ញៀវភាគច្រើនគ្រប់គ្រងចំនួនភ្ញៀវចេញចូលទៅលើកោះមិនទាន់បានល្អទេ ព្រោះកំពង់ផែរបស់ទូកដឹកភ្ញៀវទាំងនោះ អាជ្ញាធរគ្រប់គ្រងមិនទាន់បានល្អនៅឡើយទេ ហើយខ្វះកិច្ចសហការពីម្ចាស់អាជីវកម្ម ភាគច្រើនមិនផ្ដល់ព័ត៌មានលំអិតអំពីចំនួនតួលេខនៃភ្ញៀវទេសចរចេញ ឬចូលទៅកម្សាន្តនៅតាមកោះ»។
ចំណែកអភិបាលរងខេត្តព្រះសីហនុ លោក សំ សំអាត បានថ្លែងនៅក្នុងពិធីជួបជុំជាមួយតំណាងម្ចាស់ធ្វើអាជីវកម្មទូកដឹកភ្ញៀវទេសចរ ក៏បានអំពាវនាវដល់ម្ចាស់អាជីវកម្មដែលមិនទាន់បានចុះបញ្ជីធ្វើអាជីវកម្មនៅឡើយ សូមទៅស្នើសុំចុះបញ្ជីដើម្បីឲ្យការប្រកបរបរទទួលទានរបស់ខ្លួនស្របច្បាប់ទាំងអស់គ្នា ចាប់ពីឆ្នាំ២០១៦ តទៅ។
លោក សំ សំអាត៖ «សូមឲ្យបងប្អូនអ្នកធ្វើអាជីវកម្មទូកដឹកភ្ញៀវទេសចរទាំងអស់ដែលមិនទាន់មានច្បាប់ ត្រូវទៅចុះបញ្ជីនៅមន្ទីរទេសចរណ៍ ដើម្បីធ្វើអាជីវកម្មឲ្យស្របច្បាប់ចាប់ពីឆ្នាំ២០១៦ នេះតទៅ ព្រោះអាជ្ញាធរនឹងមានវិធានការតាមផ្លូវច្បាប់ទៅលើបងប្អូនដែលមិនស្ដាប់តាមការណែនាំរបស់អាជ្ញាធរ»។
ស្ថិតិទេសចរណ៍ឆ្នាំ២០១៥ របស់មន្ទីរទេសចរណ៍ខេត្តព្រះសីហនុ បង្ហាញថា ខេត្តជាប់សមុទ្រមួយនេះទទួលបានភ្ញៀវទេសចរសរុបចំនួន ១,៥១៨,៨៧៤នាក់ កើន ១៤,៣៩% បើប្រៀបធៀបឆ្នាំ២០១៤។ ក្នុងនោះភ្ញៀវទេសចរជាតិមានចំនួន ១,១៥៦,៨១៣ គឺកើន ១៩,៣៦% និងភ្ញៀវអន្តរជាតិមានចំនួន ៣៦២,០៦១នាក់។
ភ្ញៀវទេសចរធ្វើដំណើរមកកម្សាន្តខេត្តព្រះសីហនុ តាមនាវា ឬតាមកប៉ាល់ទេសចរណ៍ មានចំនួន ៤២នាវា កើន ១០នាវា បើប្រៀបធៀបឆ្នាំ២០១៤ ហើយមានភ្ញៀវទេសចរសរុប ៤៤,១៣៨នាក់ កើន ១០៧,២៩នាក់។
ស្ថិតិដដែលបង្ហាញថា ភ្ញៀវទេសចរជាតិ និងអន្តរជាតិ ដែលចេញទៅកម្សាន្តតាមកោះ ជាមធ្យមក្នុងថ្ងៃធម្មតាមានចំនួនចន្លោះពី ៥០០ ទៅ ៦០០នាក់ក្នុង១ថ្ងៃ ហើយពី ១.០០០ ទៅ ១.៥០០នាក់ ក្នុងថ្ងៃបុណ្យទាន។
ភ្ញៀវទេសចរអន្តរជាតិចំនួន ១០ប្រទេស ដែលចូលមកកម្សាន្តខេត្តព្រះសីហនុ ឆ្នាំ២០១៥ រួមមាន ភ្ញៀវជនជាតិចិន ស្ថិតក្នុងលំដាប់លេខរៀងទី១ រុស្សី លេខរៀងទី២ សហរដ្ឋអាមេរិកលេខរៀងទី៣ បន្ទាប់មកវៀតណាម អង់គ្លេស បារាំង អូស្ត្រាលី ថៃ អាល្លឺម៉ង់ និងលំដាប់លេខរៀងទី១០ ភ្ញៀវមកពីប្រទេសកាណាដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។