កងកម្លាំងស្លៀកពាក់ស៊ីវិល ដែលស្ថិតក្រោមបញ្ជារបស់រាជរដ្ឋាភិបាលប្រដាប់ដោយដំបងគ្រប់ដៃ និងចងក្រណាត់ក្រហមនៅដៃខាងឆ្វេង បានដេញវាយបំបែកក្រុមបាតុករបក្សប្រឆាំង ចេញពីទីលានប្រជាធិបតេយ្យចាប់តាំងពីម៉ោង ១១ព្រឹកថ្ងៃទី៤ ខែមករា។ កងទ័ពពិសេសរបស់កងរាជអាវុធហត្ថ និងក្រុមប៉ូលិសបង្ក្រាបបាតុកម្ម បានបិទផ្លូវចូលទីលានប្រជាធិបតេយ្យ មិនឲ្យមនុស្សចូលឡើយ។
រយៈពេលជាង ២ម៉ោង ទីលានប្រជាធិបតេយ្យត្រូវបានបោសសម្អាតទាំងស្រុង ហើយសម្ភារៈនៅក្នុងទីលាន ត្រូវវាយកម្ទេចរុះរើប្រមូលដាក់លើឡាន ដឹកចេញទៅរក្សាទុកនៅសាលាក្រុង។
ក្រុមបាតុករបានបន្តប្រមូលផ្តុំគ្នាជាថ្មីនៅម្តុំវត្តភ្នំ។ ប៉ុន្តែ ក្រុមសន្តិសុខប្រដាប់ដោយដំបងដែក បានចេញទៅដេញវាយបន្តទៀត ដើម្បីបំបែកការជួបជុំទាំងនោះ។ ក្នុងនោះ កម្លាំងប្រដាប់អាវុធបានវាយអ្នកសារព័ត៌មានរបស់ទូរទស្សន៍បាយ័នម្នាក់ឲ្យរបួស វាយសំដៅអ្នកយកព័ត៌មានកាសែតនគរវត្ត និងវាយក្បាលអ្នកថតរូបសារព័ត៌មានបរទេស។ ការចុះបង្ក្រាបលើកនេះ ស្ថិតក្រោមបញ្ជារបស់ស្នងការស្តីទីនៃស្នងការដ្ឋាននគរបាលរាជធានីភ្នំពេញ លោក ម៉ក់ ជីតូ និងអភិបាលរងរាជធានី លោក ឃួង ស្រេង។
ក្រុមអាជ្ញាធរបញ្ជាក់ថា ការបង្ក្រាបបំបែកសម្បុកបាតុករ គឺធ្វើឡើងតាមសេចក្តីប្រកាសព័ត៌មានរបស់សាលារាជធានីភ្នំពេញ ដែលចេញលិខិតព្រមានមិនឲ្យ លោក សម រង្ស៉ី ដឹកនាំបាតុកម្ម។ អាជ្ញាធរប្រាប់ថា ការធ្វើបាតុកម្មនាំមកនូវអស្ថិរភាពសង្គម និងនាំមកនូវអំពើហិង្សា។
ឆ្លើយតបនឹងការបង្ក្រាបនេះ គណបក្សប្រឆាំងបានចេញសេចក្តីថ្លែងការណ៍មួយ ដោយអំពាវនាវឲ្យបាតុករស្ងប់ស្ងាត់មួយរយៈ ហើយគណបក្សសង្គ្រោះជាតិ នឹងមានយុទ្ធវិធីថ្មីក្នុងការតស៊ូមតិដោយអហិង្សា ដើម្បីសម្រេចគោលដៅបក្សទៅថ្ងៃមុខ។
មន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា បក្សប្រឆាំងសូមថ្កោលទោសចំពោះអំពើហិង្សាដែលសមត្ថកិច្ចបណ្ដេញបាតុករចេញពីទីលានប្រជាធិបតេយ្យ។ លោកបន្តថា ថ្នាក់ដឹកនាំគណបក្សសង្គ្រោះជាតិ កំពុងតាមដានស្ថានការណ៍ទូទៅ ដើម្បីរៀបចំយុទ្ធសាស្ត្រតបតជាមួយគណបក្សកាន់អំណាច ប៉ុន្តែបក្សសង្គ្រោះជាតិ ប្រកាន់ធម៌អហិង្សា។
លោក យឹម សុវណ្ណ បានថ្លែងអំពាវនាវឲ្យភាគីអន្តរជាតិ ពិនិត្យមើលទង្វើរបស់សមត្ថកិច្ចរដ្ឋាភិបាល កំពុងរំលោភបំពានសិទ្ធិមនុស្សយ៉ាងធ្ងន់ធ្ងរ។
ទាក់ទងនឹងបញ្ហានេះ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ថ្លែងថា គណបក្សទាំងពីរត្រូវតែអង្គុយតុចរចាមួយ ដើម្បីរំងាប់ស្ថានការណ៍តានតឹង ក្នុងគោលដៅរក្សាប្រយោជន៍ជាតិជាចម្បង។ លោកបញ្ជាក់ថា ហេតុការណ៍បង្ក្រាបបាតុករនេះ ជាដំណើរដើរថយក្រោយនៃលទ្ធិប្រជាធិបតេយ្យនៅកម្ពុជា។
ការបង្ក្រាបបាតុករគណបក្សសង្គ្រោះជាតិ ធ្វើឡើងដំណាលគ្នានឹងលិខិតរបស់សាលាក្រុងភ្នំពេញ ដែលបានផ្ញើឲ្យបក្សប្រឆាំង ស្ដីពីការហាមឃាត់ធ្វើបាតុកម្ម។ លិខិតហាមឃាត់របស់សាលារាជធានី ទៅដល់ស្នាក់ការបក្សប្រឆាំងនៅម៉ោង ១០កន្លះ ហើយក្រុមអាជ្ញាធរក៏បណ្ដេញបាតុករចេញនៅម៉ោងដំណាលគ្នាដែរ។
គណបក្សប្រឆាំងបានធ្វើបាតុកម្មអស់រយៈពេល ២០ថ្ងៃកន្លងទៅ ដោយគោលដៅចម្បង គឺទាមទារឲ្យ លោក ហ៊ុន សែន ចុះចេញពីតំណែង។ ការបង្ក្រាបបាតុករបក្សប្រឆាំង ធ្វើឡើងមួយថ្ងៃបន្ទាប់ពីអាជ្ញាធរបានបាញ់កម្មករនៅផ្លូវវ៉េងស្រេង ឲ្យស្លាប់ ៥នាក់ និងរងរបួសជាង ៣០នាក់ និងរយៈពេលជាងមួយអាទិត្យ បន្ទាប់ពី លោក ហ៊ុន សែន ត្រឡប់មកពីបំពេញទស្សនកិច្ចនៅវៀតណាម។
មតិពលរដ្ឋចំពោះការបង្ក្រាបរបស់អាជ្ញាធរទៅលើបាតុករនៅទីលានប្រជាធិបតេយ្យ
ទាក់ទងនឹងការបង្ក្រាបរបស់អាជ្ញាធររដ្ឋាភិបាលទៅលើក្រុមបាតុករ នៅទីលានប្រជាធិបតេយ្យ នៅថ្ងៃទី៤ មករា ប្រជាពលរដ្ឋមួយចំនួនបានបញ្ចេញមតិស្រដៀងៗថា រដ្ឋាភិបាលមិនគួរប្រើអំពើហិង្សាលើពលរដ្ឋទេ។
សូមស្ដាប់សំឡេងពលរដ្ឋទាំងនេះ៖
មន្ត្រីនគរបាលជាតិប្រាប់ពីមូលហេតុអាជ្ញាធរបណ្ដេញបាតុករ
មន្ត្រីនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ បញ្ជាក់ពីមូលហេតុដែលកងកម្លាំងអាជ្ញាធររដ្ឋាភិបាល បានចេញបណ្ដេញក្រុមបាតុករគណបក្សសង្គ្រោះជាតិ ចេញពីទីលានប្រជាធិបតេយ្យនោះថា ដោយសារធ្វើបាតុកម្មខុសច្បាប់ ហើយបង្កភាពវឹកវរក្នុងសង្គម។
សូមស្ដាប់បទសម្ភាសន៍រវាងលោក ទីន ហ្សាការីយ៉ា ជាមួយលោក គៀត ច័ន្ទថារិទ្ធ ដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។