អាជ្ញាធរខេត្តកំពង់ចាមជំរុញឱ្យពលរដ្ឋធ្វើអត្តសញ្ញាណប័ណ្ណក្នុងពេលចូលឆ្នាំ
2016.04.14
អាជ្ញាធរខេត្តកំពង់ចាម បើកយុទ្ធនាការផ្សព្វផ្សាយប្រាប់ប្រជាពលរដ្ឋទូទៅដែលបានមកលេងស្រុកកំណើត ពិសេសពលរដ្ឋមិនទាន់បានធ្វើអត្តសញ្ញាណប័ណ្ណ ឱ្យនាំគ្នាទៅធ្វើកុំបីខាន នៅក្នុងឱកាសពិធីបុណ្យចូលឆ្នាំប្រពៃណីជាតិ ដោយមានមន្ត្រីសមត្ថកិច្ចរង់ចាំទទួលជូនពួកគាត់។ យ៉ាងណាសង្គមស៊ីវិល សាទរចំពោះវិធានការនេះ ប៉ុន្តែពួកគេមើលឃើញថា អាចមានប្រសិទ្ធភាពតិចតួច។
អាជ្ញាធរខេត្តកំពង់ចាម ឆ្លៀតយកឱកាសពិធីបុណ្យចូលឆ្នាំខ្មែរឈានចូលមកដល់ដើម្បីលើកទឹកចិត្តដល់ពលរដ្ឋដែលគ្រប់អាយុធ្វើអត្តសញ្ញាណប័ណ្ណ និងពលរដ្ឋមិនទាន់បានធ្វើអត្តសញ្ញាណប័ណ្ណគំរូថ្មី អាចនាំគ្នាទៅធ្វើក្នុងឱកាសបុណ្យចូលឆ្នាំខ្មែរបាន។ យុទ្ធនាការរបស់អាជ្ញាធរខេត្តរួមមានផ្សព្វផ្សាយនៅតាមរោងបុណ្យតាមវត្តអារាម និងតាមភូមិ ដោយចាប់ផ្តើមតាំងពីមុនពិធីបុណ្យចូលឆ្នាំមកដល់។
ស្នងការនគរបាលខេត្តកំពង់ចាម លោក បែន រ័ត្ន មានប្រសាសន៍ថា ភារកិច្ចរបស់សមត្ថកិច្ចក្រៅពីថែរក្សាសន្តិសុខសណ្ដាប់ធ្នាប់ដល់ប្រជាពលរដ្ឋក្នុងឱកាសបុណ្យចូលឆ្នាំប្រពៃណីខ្មែរហើយ ខាងលោកក៏បានចាត់វិធានការផ្សព្វផ្សាយដល់ប្រជាពលរដ្ឋមកលេងស្រុកកំណើតឱ្យពួកគាត់ឆ្លៀតពេលដើម្បីទៅធ្វើអត្តសញ្ញាណប័ណ្ណគំរូថ្មីឱ្យបានគ្រប់ៗគ្នា។
លោកបន្តថា សមត្ថកិច្ចបានដាក់ការិយាល័យជាង ៤០ នៅទូទាំងខេត្ត រង់ចាំទទួលធ្វើជូនពលរដ្ឋពិសេសអ្នកភូមិដែលបានចំណាកស្រុកទៅធ្វើការងារនៅតំបន់ឆ្ងាយៗ ឬនៅក្រៅប្រទេស៖ «គឺផ្សព្វផ្សាយឱ្យប្រជាពលរដ្ឋយើងទៅធ្វើអត្តសញ្ញាណប័ណ្ណ ព្រោះឱកាសល្អបានមកដល់ហើយ»។
កាលពីពិធីបុណ្យភ្ជុំបិណ្ឌកន្លងទៅ រយៈពេលបីថ្ងៃ សមត្ថកិច្ចខេត្តកំពង់ចាម បំពេញបែបបទធ្វើអត្តសញ្ញាណប័ណ្ណជូនពលរដ្ឋបានប្រមាណ ៣.០០០នាក់។
ទិន្នន័យចំនួនប្រជាពលរដ្ឋនៅខេត្តកំពង់ចាម គ្រប់អាយុត្រូវធ្វើអត្តសញ្ញាប័ណ្ណគំរូថ្មី ដោយគិតចាប់ពីអាយុ ១៥ឆ្នាំឡើង គឺមាន ៨៧៧.០០០នាក់ ហើយអាជ្ញាធរធ្វើជូនពលរដ្ឋបាន ៧សែននាក់ដែលស្មើប្រមាណ ៨០ភាគរយ និងនៅសេសសល់ ១៧០.០០០នាក់ទៀត។ ស្នងការខេត្តដដែលបញ្ជាក់ថា ក្រុមពលរដ្ឋមិនទាន់បានធ្វើអត្តសញ្ញាប័ណ្ណគំរូថ្មី រួមមានពលរដ្ឋចំណាកស្រុក ក្មេងមិនទាន់គ្រប់អាយុ ចាស់ជរា ជនវិកលចរិត ព្រះសង្ឃ និងទណ្ឌិតជាដើម។ តាមផែនការធ្វើអត្តសញ្ញាណប័ណ្ណគំរូថ្មី នឹងត្រូវបញ្ចប់នៅត្រឹមចុងឆ្នាំ២០១៧។
មេឃុំរាយប៉ាយ លោក ហេង ហ៊ាប មានប្រសាសន៍នៅថ្ងៃទី១៤ ខែមេសា ថា សមត្ថកិច្ចនៅឃុំរបស់លោកកំពុងមមាញឹកធ្វើអត្តសញ្ញាណប័ណ្ណជូនពលរដ្ឋក្នុងឱកាសបុណ្យចូលឆ្នាំប្រពៃណីខ្មែរ ដោយពួកគេធ្វើចាប់ពីថ្ងៃទី១២ ដល់ថ្ងៃទី១៧ មេសា។
លោកបន្តថា ខាងអាជ្ញាធរបានផ្សព្វផ្សាយនៅតាមវត្តអារាមនៅតាមភូមិទាំង៨ ក្នុងឃុំរាយប៉ាយ ឱ្យប្រជាពលរដ្ឋគ្រប់រូបដែលមិនទាន់ធ្វើអត្តសញ្ញាណប័ណ្ណនាំគ្នាទៅបំពេញបែបបទកុំបីខាន ព្រោះជាឱកាសល្អសម្រាប់ពួកគាត់៖ «ខ្ញុំបានប្រកាសតាមមេក្រូផ្សព្វផ្សាយហ្នឹងថា សូមអញ្ជើញគាត់ឱ្យទៅធ្វើអត្តសញ្ញាណប័ណ្ណគំរូថ្មី ដើម្បីបញ្ជាក់ពីសញ្ជាតិពីឯកសារផ្ទាល់ខ្លួនរបស់យើង»។
លោកមេឃុំបញ្ជាក់ថា ចំនួនប្រជាពលរដ្ឋមិនទាន់បានធ្វើអត្តសញ្ញាណប័ណ្ណនៅសេសសល់ប្រមាណ ១ពាន់នាក់ ប៉ុន្តែឆ្លងកាត់ការធ្វើប៉ុន្មានថ្ងៃនេះ អាចនៅសល់ប្រមាណ ៥០០នាក់ប៉ុណ្ណោះ ហើយលោកសង្ឃឹមថា ពលរដ្ឋនឹងនាំគ្នាទៅធ្វើបន្ថែមទៀត ពីព្រោះប័ណ្ណសំគាល់ខ្លួនមានសារសំខាន់សម្រាប់ពួកគាត់ក្នុងការរស់នៅ និងសិទ្ធិនយោបាយជាដើម។
ទោះជាយ៉ាងណា មន្ត្រីសម្របសម្រួលអង្គការការពារសិទ្ធិមនុស្សលីកាដូ (Licadho) ខេត្តកំពង់ចាម លោក ប៊ូ វីរៈ សាទរចំពោះយុទ្ធនាការនេះ ប៉ុន្តែលោកយល់ថា វាអាចមានប្រសិទ្ធភាពតិចតួចត្បិតពលរដ្ឋទាំងនោះត្រូវការពេលវេលានៅជួបជុំក្រុមគ្រួសារច្រើនជាង។ ជាមួយគ្នានោះ ដើម្បីឱ្យយុទ្ធនាការនេះមានប្រសិទ្ធភាព អាជ្ញាធរភូមិត្រូវផ្សព្វផ្សាយឱ្យបានទូលំទូលាយ ហើយសមត្ថកិច្ចត្រូវធ្វើជាប្រចាំ និងបម្រើការងារដោយពេញចិត្ត។ បន្ថែមពីនេះ និយោជកត្រូវផ្ដល់ពេលវេលាណាមួយដល់បុគ្គលិក ឬកម្មករខ្លួនក្នុងការឈប់សម្រាកដើម្បីឱ្យពួកគាត់មានពេលទៅបំពេញបែបបទធ្វើអត្តសញ្ញាណប័ណ្ណបានទាំងអស់គ្នា៕