សមត្ថកិច្ចចម្រុះប្រដាប់អាវុធ និងក្រុមសន្តិសុខប្រមាណ ៧០នាក់ ត្រូវបានគេដាក់ពង្រាយតាមកុដិនីមួយៗក្នុងវត្តស្ទឹងមានជ័យ កាលពីរសៀលថ្ងៃទី១៩ ធ្នូ។ ការដាក់ពង្រាយកម្លាំងនោះ គឺនៅខណៈដែលមន្ត្រីសាលារាជធានីភ្នំពេញចុះស្រង់ស្ថិតិពីចំនួនព្រះសង្ឃ សិស្ស និស្សិត ដែលកំពុងគង់ និងស្នាក់នៅក្នុងវត្ត។
អភិបាលរងនៃសាលារាជធានីភ្នំពេញ លោក ឃួង ស្រេង បានដឹកនាំគណៈកម្មការចម្រុះមានមន្ត្រីនៃក្រសួងធម្មការ និងសាសនា និងអភិបាលរងខណ្ឌមានជ័យ អមដោយកងកម្លាំងសមត្ថកិច្ច ចុះស្រង់ស្ថិតិនៅវត្ថស្ទឹងមានជ័យ។ បន្ទាប់ពីដើរពិនិត្យមើលតាមកុដិនីមួយៗ លោក ឃួង ស្រេង មានប្រសាសន៍ថា ការចុះស្រង់ស្ថិតិនេះ គឺធ្វើទៅតាមការស្នើសុំរបស់ព្រះចៅអធិការស្តីទីវត្តស្ទឹងមានជ័យ។
លោកបន្តថា មូលហេតុនៃការស្រង់ស្ថិតិ គឺដើម្បីឲ្យដឹងចំនួនព្រះសង្ឃ សិស្ស និស្សិតពិតប្រាកដ។ លោកបញ្ជាក់ថា ការចុះស្រង់ស្ថិតិនេះ មិនធ្វើត្រឹមតែក្នុងវត្តស្ទឹងមានជ័យ ទេ សកម្មភាពនេះ សាលារាជធានីភ្នំពេញ នឹងបន្តធ្វើទៅតាមវត្តអារាមនានាក្នុងរាជធានីភ្នំពេញ និងនៅតាមមូលដ្ឋាន។ ចំណែកការដាក់កម្លាំងសមត្ថកិច្ចមកជាមួយនេះ ដោយសារតែលោកយល់ថា អាចនឹងមានបាតុភាពមិនប្រក្រតីណាមួយកើតឡើង ខណៈអាជ្ញាធរស្រង់ស្ថិតិ៖ «តាមពិតពេលឃើញកម្លាំងសមត្ថកិច្ចមនុស្សល្អជាគេអត់ដែលគេច គេអរណាស់ពេលដែលឃើញកម្លាំងសមត្ថកិច្ចចុះមក បើជនពាក់ឯកសណ្ធានមិនគួរព្រួយបារម្ភ ព្រោះអីមិនមែនមកប្លន់ គឺមកដើម្បីការពារសុវត្ថិភាព»។
ទាក់ទងនឹងសកម្មភាពស្រង់ស្ថិតិពីអាជ្ញាធរនេះ ព្រះចៅអធិការស្តីទីវត្តស្ទឹងមានជ័យ ព្រះតេជព្រះគុណ ថៃ ប៊ុនធឿន មានថេរដីកាថា មូលហេតុដែលព្រះអង្គសហការជាមួយនឹងសាលារាជធានីភ្នំពេញ និងគណៈកម្មការចម្រុះពេលនេះ ដោយសារតែព្រះអង្គព្រួយបារម្ភពីភាពមិនប្រក្រតីដែលធ្លាប់កើតមានក្នុងវត្តកន្លងមក៖ «មិនមែនទើបតែលើកទី១ទេ នៅកន្លែងយើងនេះ ការចុះធ្វើរដ្ឋបាលនៅមិនទាន់អស់ពួកនៅតាមចេតិយជក់ម៉ាហិតកាវអីអ៊ីចឹង»។
មន្ត្រីស៊ើបអង្កេតអង្គការលីកាដូ (Licadho) លោក អំ សំអាត ដែលតាមដានសកម្មភាពនេះយល់ថា ការចុះស្រង់ស្ថិតិក្នុងវត្តបែបនេះ គួរណាស់តែមានមន្ត្រីសង្ឃឲ្យបានច្រើនជាងអាជ្ញាធរ។ លោកបន្តថា ការដាក់តែមន្ត្រីអាជ្ញាធរអមដោយកម្លាំងសមត្ថកិច្ចរាប់សិបនាក់ដូច្នេះ អាចជាទិដ្ឋភាពមួយធ្វើឲ្យប្រជាពលរដ្ឋរស់នៅក្បែរវត្តទំនងជាយល់ថា នេះអាចជាសកម្មភាពចុះតាមចាប់ជនទុច្ចរិតទៅវិញ៖ «ការដាក់រូបភាពច្រើនយ៉ាងនេះ ប្រជាពលរដ្ឋដែលគេមិនដឹង គេមិនគិតថាធ្វើរដ្ឋបាលទេ គេគិតថាចូលមកឆែកឆេរចូលមកចាប់អ៊ីចឹង»។
វត្តស្ទឹងមានជ័យ ភាគច្រើនគេស្គាល់ថាជាកន្លែងដែលផ្តល់ការស្នាក់អាស្រ័យដល់អ្នកតវ៉ាដីធ្លីមកពីតាមខេត្តនានា ដែលស្វែងរកដំណោះស្រាយលើរឿងដីធ្លីរបស់ពួកគេពីលោកនាយករដ្ឋមន្ត្រី ហ៊ុន សែន និងស្ថាប័នជាតិសំខាន់ៗក្នុងរាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។