អាជ្ញាធរខេត្តក្រចេះ គ្រោងជម្លៀសប្រជាពលរដ្ឋចេញពីតំបន់បាក់ច្រាំងទន្លេមេគង្គ ទៅរស់នៅតំបន់ផ្សេងក្រោយបុណ្យអុំទូក។ អាជ្ញាធរជ្រើសយកដំណោះស្រាយដូចនេះ ដោយអះអាង ភូមិសាស្ត្រភូមិថ្មគ្រែលើ ក្នុងឃុំថ្មគ្រែ ស្រុកចិត្របុរី ខេត្តក្រចេះ ជាកន្លែងដែលដង្ហើមទឹកហូរពីភ្នំចុះមក ដូច្នេះដីនៅទីនោះអាចនឹងបាក់បន្តទៀត។
ប្រជាពលរដ្ឋចំនួនប្រាំពីរគ្រួសារដែលអាជ្ញាធរខេត្តក្រចេះ គ្រោងជម្លៀសក្រោយបុណ្យអុំទូកនោះ ជាជំហានទី១ និងក្រោយមកទៀត គឺប្រជាពលរដ្ឋដែលនរស់ក្បែរកន្លែងបាក់ច្រាំងទន្លេប្រមាណជា ២០០គ្រួសារ។ ចំណាត់ការនេះ បន្ទាប់ពីច្រាំងទន្លេប្រវែង ៤៣៦ម៉ែត្រ បានបាក់ធ្លាក់ចូលទន្លេជម្រៅជាង ១០ម៉ែត្រ កាលពីថ្ងៃទី១ ខែវិច្ឆិកា ក្នុងរយៈពេលជាង ២ម៉ោងប៉ុណ្ណោះ។
អភិបាលស្រុកចិត្របុរី ខេត្តក្រចេះ លោក សួន ញ៉ាក់ មានប្រសាសន៍ថា បន្ទាប់ពីមន្ត្រីជំនាញរកឃើញថា ច្រាំងទន្លេនឹងបន្តបាក់ទៀត អាជ្ញាធរនឹងដាក់តំបន់នោះជាតំបន់ប្រកាសអាសន្ន និងមិនឲ្យអ្នកធ្វើដំណើរធ្វើចរាចរណ៍ឆ្លងកាត់ទេ។ លោកអភិបាលបញ្ជាក់ទៀតថា មូលហេតុដែលរកឃើញនៃការបាក់ច្រាំងទន្លេ បណ្ដាលមកពីតំបន់នោះ គឺមានខ្សែទឹកហូរនៅក្រោមដី។
លោកអភិបាលស្រុកបន្តទៀតថា ប្រជាពលរដ្ឋដែលត្រូវជម្លៀសទាំងប្រាំពីរគ្រួសារដំបូងនោះ គឺអាជ្ញាធរផ្ដល់ដីឲ្យពួកគេទំហំ ១០ម៉ែត្រ គុណ ៥០ម៉ែត្រក្នុងមួយគ្រួសារ។ ដីនោះស្ថិតក្នុងភូមិឃុំដដែល ប៉ុន្តែនៅឆ្ងាយពីកន្លែងបាក់ច្រាំងទន្លេជាង ២គីឡូម៉ែត្រ៖ «យើងមិនអនុញ្ញាត មិនអាចឲ្យពួកគាត់នៅបានទេ យើងត្រូវប្រកាសអាសន្នឲ្យគាត់បានដឹងពីឥឡូវហើយ។ យើងមិនអាចជួសជុលបានទៀតទេ ព្រោះផ្លូវនោះគ្រឹះខាងក្រោមអត់មានទេ វាច្រោះ មិនមែនមកពីបូមខ្សាច់អីទេ ឬធ្វើអីទេ នេះវាខ្សែទឹក ប្រឡាយទឹកវាកៀកនឹងច្រាំងតែម្ដង ព្រោះខ្សាច់វាដុះខាងត្រើយម្ខាង វាកៀកប្រឡាយវាច្រោះខាងជើងក្រោមច្រាំង អ៊ីចឹងអត់មានលទ្ធភាពធ្វើផ្លូវឡើងវិញបានទេ កន្លែងហ្នឹងត្រូវតែបោះបង់ចោល»។
ប្រជាពលរដ្ឋរស់នៅភូមិថ្មគ្រែលើ ឃុំថ្មគ្រែ ស្រុកចិត្របុរី មានទាំងអស់ជាង ៤០០គ្រួសារ។ តាមគម្រោងនៅរយៈពេល ៥ឆ្នាំខាងមុខ អាជ្ញាធរនឹងជម្លៀសប្រជាពលរដ្ឋជាង ២០០គ្រួសារបន្ថែមទៀត។ ក្រោយពីបាក់ដី អាជ្ញាធរបានយកឫស្សីធ្វើជារបងព័ទ្ធជុំវិញលាបពណ៌ក្រហមស និងមិនអនុញ្ញាតឲ្យរថយន្តធ្វើដំណើរឆ្លងកាត់ទេ។
ជំទប់ទី១ ឃុំថ្មគ្រែ ស្រុកចិត្របុរី លោក សំ សី ដែលចុះទៅដល់កន្លែងបាក់ច្រាំងទន្លេ ឲ្យដឹងថា នៅកន្លែងបាក់ដីនោះមានទឹកហូរបីកន្លែងធំៗ។ លោកថា ដីដែលបាក់ខ្លាំងមានប្រវែង ១៥០ម៉ែត្រនៃប្រវែងសរុបជាង ៤៣៦ម៉ែត្រ។ ប៉ុន្តែមិនបានបណ្ដាលឲ្យប៉ះពាល់ទ្រព្យសម្បត្តិ ឬអាយុជីវិតប្រជាពលរដ្ឋទេ។
លោក សំ សី៖ «ប្រឡោះដែលបាក់ហ្នឹងមានទឹកហូរពីក្រោយមកបីប្រឡោះ ទឹកហូរក្រោមដីគួរសមដែរ វាច្រោះៗមក ហូរវ៉ាវៗមក។ ប៉ុន្តែ វាមិនមែនកើតឥឡូវទេ វាកើតយូរឆ្នាំមកហើយទឹកហូររិញៗហ្នឹង ប៉ុន្តែវាមិនទាន់ស្រុត ប៉ុន្តែដល់ពេលហ្នឹងដូចទឹកវាធំ ដីវាអាចរលាយវាស្រុតស្រឹបតែម្ដង»។
ប្រជាពលរដ្ឋចំនួនប្រាំពីរគ្រួសារដែលត្រូវជម្លៀសចេញនោះ ជាអ្នករស់នៅតាមបណ្ដោយទន្លេជាប់នឹងកន្លែងបាក់ច្រាំងតែម្ដង អ្នកខ្លះបានរុះរើផ្ទះសំបែងចេញបណ្តើរៗហើយ។ ពួកគេភាគច្រើនប្រកបរបរនេសាទត្រី និងធ្វើក្រឡានលក់។
លោក វ៉ាន សុផល អាយុ ៤២ឆ្នាំ ដែលកំពុងរុះរើផ្ទះសំបែងចេញពីច្រាំងទន្លេ បានឯកភាពចំពោះការជម្លៀសចេញរបស់អាជ្ញាធរ ប៉ុន្តែលោកទាមទារឲ្យអាជ្ញាធរផ្ដល់កន្លែងណាដែលលោកអាចប្រកបរបរលក់ក្រឡានដូចសព្វថ្ងៃ និងសុំឲ្យអាជ្ញាធរផ្ដល់ថវិកាខ្លះជួនលោក។
លោកមានប្រសាសន៍ថា ចាប់តាំងពីលោករស់នៅទីនេះ នេះជាលើកទីមួយដែលលោកជួបប្រទះករណីបាក់ច្រាំងទន្លេខ្លាំងដូចនេះ៖ «ចេះតែចេញទៅ បើមិនដឹងធ្វើម៉េច បើគេឲ្យចេញហើយ យើងមិនហ៊ានប្រឆាំងទេ មិនហ៊ានប្រឆាំងនឹងអាជ្ញាធរគេទេ គ្រាន់តែថាវាឆ្ងាយពេក ដូចថាខ្ញុំអត់មានសម្ភារៈអី ជិះចុះជិះឡើងណា យើងវាអត់មានលុយកាក់អីនឹងដំណើរ កាលណាទៅឆ្ងាយពេកផុតពីកន្លែងការងាររកស៊ី»។
ប្រជាពលរដ្ឋរស់នៅក្នុងតំបន់នេះ ពួកគេបានចោទប្រកាន់ហេតុការណ៍នេះថា បណ្ដាលមកពីមានឈ្មួញបូមខ្សាច់ ព្រោះចាប់តាំងពីមានការបូមខ្សាច់ក៏មានហេតុការណ៍បាក់ច្រាំងទន្លេខ្លាំងដូចនេះទៅ។
លោកស្រី នួន គឹមឆូយ ជាអ្នកប្រកបរបរលក់ដូរ ហើយដែលមានផ្ទះទល់មុខនឹងកន្លែងបាក់ច្រាំងទន្លេចម្ងាយជាង ៣០ម៉ែត្រ បានទាមទារឲ្យអាជ្ញាធរចាក់គ្រឹះច្រាំងទន្លេឲ្យរឹងមាំ និងបញ្ឈប់អាជីវកម្មបូមខ្សាច់ជាជាងការជម្លៀសប្រជាពលរដ្ឋចេញពីតំបន់នេះ។
លោកស្រី នួន គឹមឆូយ ឲ្យដឹងថា ទីកន្លែងនេះជាផ្លូវទៅតំបន់ទេសចរណ៍ ដូច្នេះគឺងាយស្រួលឲ្យអ្នកស្រីប្រកបរបរចិញ្ចឹមជីវិត៖ «ចង់សំណូមពរថា ឲ្យគេ ដូចថារាជរដ្ឋាភិបាលជួយសម្រួលផ្លូវហ្នឹងអ៊ីចឹងទៅ ព្រោះផ្លូវហ្នឹងបាក់តិចដែរ វាអត់មានបាក់ច្រើនទេ។ យើងតាំងពីក្បាលភូមិ កន្ទុយភូមិវាស្រួលមក ផ្លូវស្រួលរហូតខូចតែហ្នឹងតិច។ ចិត្តខ្ញុំ ខ្ញុំមិនដឹងថា ជម្លៀសទៅនៅកន្លែងទៀត អូនមើលផ្ទះទៅ! មិនងាយរុះរើទេណាអូន!»។
ភូមិសាស្ត្របាក់ច្រាំងទន្លេខាងលើ ជាផ្លូវដែលទៅកាន់តំបន់ទេសចរណ៍អន្លង់ផ្សោត កាំពី វត្តសសរ១០០ និងភ្នំសំបុក។ ក្រុមហ៊ុនបូមខ្សាច់បានចាប់ផ្ដើមធ្វើអាជីវកម្មរបស់ខ្លួននៅចម្ងាយពីកន្លែងបាក់ដីប្រមាណជា ៣គីឡូម៉ែត្រជាង ៦ឆ្នាំមកហើយ។ ក្រោយមានប្រតិកម្មពីប្រជាពលរដ្ឋរឿងបូមខ្សាច់ អភិបាលស្រុកចិត្របុរី ថានឹងដាក់សំណើទៅថ្នាក់ខេត្តឲ្យក្រុមហ៊ុនបូមខ្សាច់នេះទៅបូមខ្សាច់នៅកន្លែងផ្សេងដែលឆ្ងាយពីកន្លែងប្រជាពលរដ្ឋរស់នៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។