ប្រជាពលរដ្ឋនៅស្រុកមេមត់ ខេត្តត្បូងឃ្មុំ ត្អូញត្អែរពីការលំបាករបស់ពួកគាត់ ក្នុងការប្រកបមុខរបរដឹកឈើជន្លង់ម្រេចលក់ ពីព្រោះត្រូវសមត្ថកិច្ចនៅស្រុកមេមត់ ជាច្រើនកន្លែង តម្រូវឲ្យពួកគាត់បង់ប្រាក់ច្រើនហួសហេតុ។ ប៉ុន្តែ សមត្ថកិច្ចនៅស្រុកមេមត់ បដិសេធថាមិនមានរឿងនេះឡើយ។
ពលរដ្ឋដឹកឈើជន្លង់ម្រេចពីស្រុកស្នួល ខេត្តក្រចេះ មកលក់នៅស្រុកមេមត់ ខេត្តត្បូងឃ្មុំ រិះគន់ចំពោះសកម្មភាពរបស់មន្ត្រីកងរាជអាវុធហត្ថនៅស្រុកស្នួល និងស្រុកមេមត់ ដែលចេះតែយកប្រាក់ពីពួកគាត់គ្រប់ពេលវេលា។ ពួកគាត់ថា របរនេះចំណេញបានតិចតួចណាស់ ហើយត្រូវបង់ប្រាក់ជូនសមត្ថកិច្ចទៀតនោះ គឺហាក់បីដូចជាពួកគាត់រកប្រាក់ ដើម្បីតែចិញ្ចឹមសមត្ថកិច្ចទាំងនោះតែប៉ុណ្ណោះ។
ពលរដ្ឋម្នាក់នៅស្រុកមេមត់ សុំមិនបញ្ចេញឈ្មោះឲ្យដឹងថា លោកទៅទិញឈើជន្លង់ម្រេចទាំងនោះនៅស្រុកស្នួល ហើយដឹកមកស្រុកមេមត់ គឺត្រូវចូលបង់ប្រាក់គ្រប់បន្ទាយកងរាជអាវុធហត្ថនៅតាមផ្លូវ ក្រោមហេតុផលថា ឈើជន្លង់ម្រេចពួកគាត់ដឹកនោះ គឺខុសច្បាប់។ លោកបន្តថា បន្ទាយស្នាក់ការកងរាជអាវុធហត្ថដែលបង់ថ្លៃលើសគេ គឺស្នាក់ការកងរាជអាវុធហត្ថ៧០២ ដោយសមត្ថកិច្ចតម្រូវឲ្យបង់ប្រមាណជា ១០ម៉ឺនរៀលក្នុងមួយជើងៗ ដោយមិនមានវិក្កយបត្របញ្ជាក់ថាយ៉ាងណាឡើយចំពោះការយកប្រាក់នោះ។ ប្រភពដដែលបន្ថែមថា មានស្នាក់ការកងរាជអាវុធហត្ថកន្លែងផ្សេងៗនៅក្បែរនោះ តាមប្រដេញពួកគាត់ ឬប្រើប្រាស់កាំភ្លើងបាញ់ទៀតផង ប្រសិនបើពលរដ្ឋមិនបានបង់ប្រាក់ឲ្យទេ តែបើចាប់បានវិញ តម្លៃអាចយករហូតដល់ទៅ ៥០ម៉ឺនរៀល៖ «អ្នកខ្លះរត់ដេញគេអ៊ីចឹងទៅ អ្នកខ្លះបង្កឲ្យគេជួលកាលមានកង់ឡានគេទៀតផង។ ហើយគេជ្រុលទៅបុកជញ្ជាំងផ្ទះគេងាប់ទាំងអស់ម៉ាឡានបង។ ហើយខ្លះដេញគេដេញៗទៅជ្រុលបុកអ្នកដំណើរស្លាប់ពីរបីនាក់ក៏មានដែរ មុនពីរបីថ្ងៃហ្នឹងបង»។
ពលរដ្ឋចង់ឲ្យលុបបំបាត់រូបភាពបែបនេះ ពីព្រោះពួកគាត់មិនបានដឹកជញ្ជូនឈើដែលខុសច្បាប់ឡើយ ប៉ុន្តែវាជាប្រភេទឈើងាប់ៗដែលពួកគាត់ទិញតពីគេតែប៉ុណ្ណោះ។
ឆ្លើយតបបញ្ហានេះ មន្ត្រីកងរាជអាវុធហត្ថម្នាក់នៅស្នាក់ការ៧០២ ស្រុកមេមត់ សុំមិនប្រាប់ឈ្មោះបញ្ជាក់ថា លោកធ្វើការជាប់នៅទីនោះ ប៉ុន្តែមិនមានបញ្ហានេះកើតឡើងទេ។ លើសពីនេះទៀត លោកក៏មិនធ្លាប់ឃើញសមត្ថកិច្ចណាដេញតាមចាប់ប្រជាពលរដ្ឋដឹកជន្លង់ម្រេចទាំងនោះដែរ៖ «អាហ្នឹងមិនដឹងទេ ព្រោះមិនដឹងថានរណាមួយឲ្យនេះផង។ ហើយណាមួយមិនបានថាអារឿងទៅដេញទៅអ៊ីចឹងផង។ មិនដែលឃើញពីណាដេញគេហ្នឹងផង»។
យ៉ាងណាក៏ដោយ ពលរដ្ឋថាសកម្មភាពយកប្រាក់នេះមានយូរមកហើយៗវា ស្ទើរតែក្លាយជាប្រពៃណីទៀតផង។ ពលរដ្ឋមានការងឿងឆ្ងល់ថា សម្រាប់ឈើប្រណីតដែលដឹកទាំងឡានៗឆ្លងកាត់ទៅប្រទេសវៀតណាម តែសមត្ថកិច្ចមិនបានចាប់អារម្មណ៍ឡើយ។ រីឯពលរដ្ឋដែលដឹកបំណែកឈើដែលគេបោះបង់ចោល យកមកលក់គ្រាន់ចិញ្ចឹមជីវិត សមត្ថកិច្ចមិនបណ្តោយឲ្យរួចខ្លួនទេ។ ជាក់ស្តែង អ្នកដឹកជន្លង់ដែលមានគ្រោះថ្នាក់ចរាចរណ៍ជាច្រើន គឺមានពាក់ព័ន្ធនឹងរឿងមិនបង់ប្រាក់ជូនមន្ត្រីទាំងនោះ។
ទាក់ទងបញ្ហានេះ នាយកអង្គការការពារធនធានធម្មជាតិ លោក ឈឹម សាវុធ មានប្រសាសន៍ថា ធាតុពិត ច្បាប់នៃប្រទេសកម្ពុជា មិនតម្រូវឲ្យមានការចរាចរអនុផលព្រៃឈើទេ ក៏ប៉ុន្តែសម្រាប់ពលរដ្ឋដែលរកស៊ីរបរដឹកជន្លង់ម្រេចទាំងនោះ គប្បីត្រូវមានការលើកទឹកចិត្តពីអាជ្ញាធរ ពីព្រោះឈើទាំងនោះពលរដ្ឋនាំគ្នាសុំពីតំបន់ដីសម្បទាន។ លោកបន្ថែមថា សមត្ថកិច្ចស្រុកខ្មែរហាក់ដក់ជាប់នូវទម្លាប់អាក្រក់មួយ គឺអ្នកតូចធ្វើអ្វីក៏ខុសរហូត ចំណែកឈ្មួញឈើធំៗដឹកឈើខុសច្បាប់យ៉ាងកក្រើក ក៏មិនមានសមត្ថកិច្ចណាហ៊ានក្អកដែរ៖ «ប៉ុន្តែស្រុកខ្មែរយើងវាអត់អ៊ីចឹងទេ ឲ្យតែប្រជាពលរដ្ឋតូចតាចធ្វើដឹកអីតែម៉ាបន្តិច ដឹកតែធ្យូងក៏អាជ្ញាធរចាប់ដែរ មិនបាច់ថាដឹកជន្លង់ទេ។ និយាយទៅឲ្យតែប្រជាពលរដ្ឋក្រីក្រតូចតាច គឺអាជ្ញាធរគាបសង្កត់អូសយកលុយយកកាក់ចាប់ចង ដើម្បីជំរិតទារលុយពួកគេ។ អាហ្នឹងជាទម្លាប់មួយដែលអ្នកតូចធ្វើអ្វីក៏ខុស អ្នកធំធ្វើអ្វីក៏ត្រូវ អាហ្នឹងវារឿងហ្នឹង»។
លោកបន្ថែមថា បើទោះបីជាអាជ្ញាធរដឹងរឿងយកប្រាក់ ក៏ពួកគេធ្វើមិនដឹងដែរ ពីព្រោះបទល្មើសទាំងនោះកើតចេញពីសមត្ថកិច្ចនោះឯង។ លោកឲ្យដឹងទៀតថា ប្រសិនបើវប្បធម៌អ្នកធំធ្វើអ្វីក៏ត្រូវ អ្នកតូចដែលរកស៊ីចិញ្ចឹមមួយក្រពះធ្វើអ្វីក៏ខុសនោះ វានឹងអាចបង្កឲ្យមានការឈឺចាប់កាន់តែខ្លាំងនៅក្នុងសង្គម ហើយវាទាមទារឲ្យរាជរដ្ឋាភិបាលដោះស្រាយជាបន្ទាន់ ជៀសវាងធ្វើឲ្យបញ្ហាកាន់តែធំកើតមានឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។