ថ្នាក់ដឹកនាំ និងមន្ត្រីស្ថាប័នពាក់ព័ន្ធខេត្តព្រះសីហនុ បង្កើនសកម្មភាពការពារសន្តិសុខសុវត្ថិភាពជូនភ្ញៀវទេសចរជាតិ និងអន្តរជាតិ នៅក្នុងឱកាសពិធីបុណ្យចូលឆ្នាំខ្មែរប្រពៃណីជាតិឆ្នាំនេះ។ លោកស្នងការនគរបាលថ្មីខេត្តព្រះសីហនុ បានឲ្យដឹងថា កម្លាំងជំនាញបានដាក់ពង្រាយនៅតាមទីអារាម ឬគោលដៅនានាដែលភ្ញៀវទេសចរនិយមទៅកម្សាន្ត និងតាមផ្លូវជាតិលេខ៤ ក្នុងភូមិសាស្ត្រខេត្តព្រះសីហនុ ជាដើម។
អភិបាលខេត្តព្រះសីហនុ លោក ឈិត សុខុន មានប្រសាសន៍នៅថ្ងៃសុក្រ ទី១០ ខែមេសា ថា កម្លាំងសមត្ថកិច្ចគ្រប់ជំនាញ កងរាជអាវុធហត្ថ និងកម្លាំងនគរបាល បានពង្រាយនៅគ្រប់ទីអារាម ឬនៅតាមតំបន់រមណីយដ្ឋាននានាទូទាំងខេត្ត ដើម្បីរក្សាការពារសុវត្ថិភាពជូនប្រជាពលរដ្ឋ ពិសេសភ្ញៀវទេសចរនៅក្នុងពិធីបុណ្យចូលឆ្នាំថ្មីឆ្នាំនេះ។
លោកបន្តថា ឆ្នាំនេះសម្រាប់ដំណើរកម្សាន្តទៅតាមកោះនានារបស់ភ្ញៀវទេសចរ គឺអាជ្ញាធរបានរឹតបន្តឹងសុវត្ថិភាព និងតម្រូវឲ្យម្ចាស់ទូក ឬកាណូតដឹកភ្ញៀវទេសចរ ត្រូវសហការជាមួយកម្លាំងជំនាញពាក់ព័ន្ធ មានកងទ័ពជើងទឹកជាដើម ដោយការទទួលខុសត្រូវខ្ពស់។ ក្នុងនោះ នាវា ឬទូកដឹកភ្ញៀវទេសចរទាំងអស់ ត្រូវតែបំពាក់នូវសម្ភារៈសង្គ្រោះបន្ទាន់ឲ្យបានគ្រប់ចំនួន ដើម្បីបង្ការពេលជួបគ្រោះថ្នាក់ និងមិនត្រូវដឹកភ្ញៀវលើសចំណុះនោះទេ៖ «យើងបាននិយាយគ្នាជាមួយបងប្អូនដែលមានទូកដឹកភ្ញៀវទេសចរទាំងអស់ ធ្វើម៉េចទូកដឹកអ្នកដំណើររបស់ពួកគាត់ ត្រូវតែធានាសុវត្ថិភាព និងបំពាក់បច្ចេកទេសឲ្យបានត្រឹមត្រូវ និងមិនត្រូវដឹកឲ្យលើសចំណុះទេ។ ជាងនេះ គោលដៅត្រូវធ្វើដំណើរដឹកភ្ញៀវទៅកាន់កោះណា? ត្រូវតែសហការ ឬរាយការណ៍ប្រាប់កងទ័ពជើងទឹកក្នុងលំហសមុទ្រ ដើម្បីរួមគ្នាជួយការពារភ្ញៀវទេសចរទាំងនោះ។ បញ្ហាប្រឈមរបស់អាជ្ញាធរខេត្ត ក្នុងការគ្រប់គ្រង គឺមានការលំបាកជាមួយភ្ញៀវទេសចរខ្លះដែរ ដែលបានទៅកម្សាន្តនៅលើកោះ គឺភ្ញៀវទេសចរខ្លះ គឺពួកគាត់និយមយកអង្រឹងទៅចងទទួលទានដំណេកនៅក្នុងព្រៃ រាយប៉ាយនៅក្នុងព្រៃ ជាដើម។ ហើយករណីនេះ អាជ្ញាធរមានការពិបាកក្នុងការគ្រប់គ្រង ឬការពារសន្តិសុខជូនពួកគាត់ដែរ ព្រោះកម្លាំងសមត្ថកិច្ចមានមិនគ្រប់ចំនួន»។
ទាក់ទិនបញ្ហានេះ លោក ជួន ណារិន ស្នងការនគរបាលខេត្តព្រះសីហនុ ដែលទើបតែងតាំងថ្មីមានប្រសាសន៍ថា កម្លាំងនគរបាលជំនាញរបស់លោកបានកំណត់មុខសញ្ញាប្រចាំការនៅតាមគោលដៅសំខាន់ៗ ដែលភ្ញៀវទេសចរនិយមទៅកម្សាន្ត ដើម្បីការពារសន្តិសុខ ឬគ្រោះថ្នាក់ចរាចរណ៍ ជាដើម។ បន្ថែមលើនេះ កម្លាំងជំនាញបានដាក់ពង្រាយនៅតាមផ្លូវជាតិលេខ៤ ក្នុងភូមិសាស្ត្រខេត្តព្រះសីហនុ ដើម្បីទប់ស្កាត់គ្រោះថ្នាក់ចរាចរណ៍ ដែលតែងកើតមានពេលពិធីបុណ្យជាតិម្តងៗ។
លោក ជួន ណារិន បានបញ្ជាក់ថា កម្លាំងនគរបាលបានបែងចែកមុខសញ្ញា ៤គោលដៅ ដើម្បីការពារសន្តិសុខនៅតាមផ្លូវជាតិតាមកោះ តាមទីអារាម និងនៅតាមរមណីយដ្ឋាននានា ដែលភ្ញៀវទេសចរនីមួយៗទៅកម្សាន្តនៅក្នុងពិធីបុណ្យចូលឆ្នាំថ្មីនេះ៖ «ខ្ញុំបានពង្រាយកម្លាំងនៅតាមគោលដៅ ៤ស្ថាប័ន ឬ ៤អង្គភាពរបស់ខ្ញុំនៅក្រោមឱវាទមានដូចជា ទី១ បានពង្រាយកម្លាំងជំនាញប្រឆាំងបទល្មើសព្រហ្មទណ្ឌនៅតាមគោលដៅនានា។ ទី២ បានដាក់កម្លាំងជំនាញទេសចរណ៍ឲ្យការពារនៅតាមតំបន់កម្សាន្ត ឬរមណីយដ្ឋាននានា។ ទី៣ ខ្ញុំបានពង្រាយកម្លាំងជំនាញការពារសន្តិសុខនៅគ្រប់គោលដៅ និងទី៤ បានពង្រាយកម្លាំងជំនាញការិយាល័យបរទេស ដើម្បីងាយស្រួលក្នុងការទំនាក់ទំនងរបស់ភ្ញៀវជាតិ និងអន្តរជាតិ ដែលមានបញ្ហា ឬមានការវង្វេងផ្លូវជាដើម គឺកម្លាំងនគរបាលបានដាក់ពង្រាយនូវគ្រប់សមាសភាពទាំងអស់ នៅក្នុងពិធីបុណ្យចូលឆ្នាំថ្មីឆ្នាំនេះ»។
ចំណែក លោក នូ សុផល ប្រធានមន្ទីរទេសចរណ៍ខេត្តព្រះសីហនុ ក៏បានឲ្យដឹងថា ដើម្បីរួមចំណែកការពារសុវត្ថិភាពជូនភ្ញៀវទេសចរចូលមកកម្សាន្តខេត្តនេះក្នុងពិធីបុណ្យចូលឆ្នាំថ្មីឲ្យបានប្រសើរ ម្ចាស់ផ្ទះសំណាក់ ឬសណ្ឋាគារ ត្រូវកត់ត្រា ឬកំណត់អត្តសញ្ញាណភ្ញៀវទេសចរដែលចូលទៅរកសេវាស្នាក់នៅតាមទីតាំងនីមួយៗឲ្យបានត្រឹមត្រូវ និងត្រូវសហការជាមួយកម្លាំងសមត្ថកិច្ចជាប្រចាំ។
ដោយឡែកក្រុមអាជីវករបម្រើសេវាកម្មទេសចរណ៍មួយចំនួន មានម្ចាស់សណ្ឋាគារ ផ្ទះសំណាក់ និងភោជនីយដ្ឋានជាដើម បានប្ដេជ្ញាថានឹងចូលរួមសហការជាមួយកម្លាំងសមត្ថកិច្ច និងថ្នាក់ដឹកនាំខេត្តព្រះសីហនុ ដើម្បីរួមចំណែករក្សាការពារសុវត្ថិភាព និងសន្តិសុខជូនភ្ញៀវទេសចរដែលចូលមកកម្សាន្តនាខេត្តជាប់មាត់សមុទ្រមួយនេះ ក្នុងអំឡុងពេលបីថ្ងៃនៃពិធីបុណ្យចូលឆ្នាំថ្មីឆ្នាំនេះឲ្យបានប្រសើរឡើង។
ពិធីបុណ្យចូលឆ្នាំថ្មីឆ្នាំ២០១៥ នេះ នឹងចាប់ផ្ដើមពីថ្ងៃទី១៤ ដល់ថ្ងៃទី១៦ ខែមេសា។ គិតមកដល់ថ្ងៃសុក្រ ទី១០ ខែមេសា នេះ ភ្ញៀវទេសចរជាតិ និងអន្តរជាតិ មិនទាន់ឃើញបង្ហាញវត្តមានច្រើនគគ្រឹកគគ្រេងនៅឡើយទេនាខេត្តជាប់មាត់សមុទ្រមួយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។