សម័យប្រឡងសញ្ញាប័ត្រមធ្យមសិក្សាទុតិយភូមិ ឬហៅថា ប្រឡងបាក់ឌុប បានបញ្ចប់ក្រោមការរឹតបន្តឹងដើម្បីទិសដៅពង្រឹងគុណភាពសិក្សារបស់សិស្ស។ ដោយឡែកនៅមណ្ឌលប្រឡងខេត្តមណ្ឌលគិរី ក៏មានការរិះគន់ថា មន្ត្រីគណៈកម្មការប្រឡងប្រើឧគ្ឃោសនស័ព្ទបំពងសំឡេងខ្លាំងៗណែនាំសិស្សនិងគណៈមេប្រយោគនៅក្នុងម៉ោងប្រឡងធ្វើឲ្យរំខានដល់អារម្មណ៍បេក្ខជនកំពុងប្រឡង។
ឪពុកម្ដាយ អ្នកអាណាព្យាបាលនិងបេក្ខជនប្រឡងសញ្ញាប័ត្របាក់ឌុបនៅខេត្តមណ្ឌលគិរី ឆ្នាំនេះ សំណូមពរឲ្យគណៈកម្មការប្រឡងបញ្ឈប់កុំប្រើមេក្រូបំពងសំឡេងក្នុងម៉ោងប្រឡងរបស់សិស្សនៅឆ្នាំក្រោយៗទៀត ជៀសវាងរំខានដល់អារម្មណ៍សិស្សកំពុងប្រឡង។
ការអំពាវនាវនេះធ្វើឡើងនៅថ្ងៃទី៥ ខែសីហា ជាថ្ងៃទី២ នៃសម័យប្រឡងបាក់ឌុបដែលប្រព្រឹត្តទៅនៅមណ្ឌលប្រឡងវិទ្យាល័យ ហ៊ុន សែន ខេត្តមណ្ឌលគិរី។
អាណាព្យាបាលសិស្សមួយរូបសុំមិនឲ្យបញ្ចេញឈ្មោះបញ្ជាក់ថា លោកបានទៅពិនិត្យមើលការប្រឡងរបស់កូនរយៈពេលពីរថ្ងៃ។ អ្វីដែលលោកចាប់អារម្មណ៍គឺសំឡេងមេក្រូបំពងសំឡេងរបស់ប្រធានមន្ទីរអប់រំខេត្តដែលធ្វើការណែនាំបេក្ខជនប្រឡងនិងគណៈកម្មការប្រឡង លាន់ឮខ្លាំងនៅម៉ោងសិស្សកំពុងប្រឡងជាច្រើនលើក។
លោកហៅបញ្ហានេះថា បានរំខានដល់អារម្មណ៍សិស្សកំពុងផ្ដោតស្មារតីបំពេញវិញ្ញាសាប្រឡង៖ «រៀងរាល់ឆ្នាំអ៊ីចឹង។ ហើយក្នុងនាមខ្ញុំជាឪពុកម្ដាយសិស្ស ខ្ញុំមកស្ដាប់ធុញដែរ កូនវារអ៊ូប្រាប់។ ក្មេងភាគច្រើនវាថា និយាយងោក ងាកៗ ច្រើនទៅប៉ះពាល់អារម្មណ៍គាត់ក្នុងពេលកំពុងសរសេរ។ បើសិនគាត់និយាយមុនពេលប្រឡងសិស្សអត់ថាស្អីទេ»។
ឆ្លើយតបសំណូមពរនេះ ប្រធានមន្ទីរអប់រំយុវជននិងកីឡាខេត្តមណ្ឌលគិរី លោក ទឹម សង្វាត ទទួលស្គាល់ថា លោកបានប្រើប្រាស់ឧគ្ឃោសនស័ព្ទណែនាំសិស្សតែមុនពេលសិស្សចូលប្រឡង និងពេលសម្រាកតែប៉ុណ្ណោះ។ ក្រៅពីនេះ លោកក៏បានហាមមិនឲ្យប្រើសំឡេងរំខានពេលសិស្សកំពុងប្រឡងទៀតផង៖ «សូមបញ្ជាក់ថា អត់មានទេ គឺហាមមិនឲ្យប្រើមេក្រូទៀតពេលសិស្សកំពុងប្រឡងទៀត។ មានការអ្វីយើងទៅខ្សឹបគ្នា សិស្សសម្រាកចេញលេងបាន ពេលសិស្សកំពុងសរសេរយើងអត់ដែលប្រកាសទេ»។
មណ្ឌលប្រឡងវិទ្យាល័យ ហ៊ុន សែន មណ្ឌលគិរី មានបេក្ខជនបេក្ខនារីចូលរួមប្រឡង ១៩១នាក់ និងមានបន្ទប់ប្រឡងចំនួន៨។
ចូលរួមសង្កេតការណ៍នៅមណ្ឌលប្រឡងនេះដែរ មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា ទទួលស្គាល់ថា ការបញ្ជាក់របស់អាណាព្យាបាលសិស្សគឺជាការពិត ពីព្រោះមនុស្សមួយចំនួនដែលសង្កេតមើលការប្រឡងបានឮសូរមេក្រូបំពងសំឡេងនៅម៉ោងសិស្សកំពុងប្រឡង។
ករណីនេះ លោកថា មន្ត្រីគណៈកម្មការប្រឡងគួរទុកជាបទពិសោធន៍សម្រាប់បញ្ចៀសកុំឲ្យកើតមានបញ្ហានេះនៅសម័យប្រឡងឆ្នាំក្រោយទៀត៖ «សកម្មភាពដែលគាត់ធ្វើគឺប្រធានមន្ទីរជាអ្នកប្រកាស។ មុនចែកវិញ្ញាសាក៏ប្រកាសមេក្រូ នៅពេលដែលសិស្សធ្វើក្នុងម៉ោងខ្វះ ១៥នាទីទៀតដល់ម៉ោងហ្នឹង ក៏គាត់ប្រកាសមេក្រូដែរ ប្រកាសដើម្បីឲ្យមន្ត្រីអនុរក្សណែនាំទៅបេក្ខជនដែលប្រឡងឲ្យគាត់បំពេញក្បាលទំព័រក្រែងមានការច្រឡំលេខតុ»។
យ៉ាងនេះក្តី ការកត់សំគាល់ជាទូទៅរបស់ឪពុកម្ដាយសិស្សបេក្ខជនប្រឡងនិងអ្នកសង្កេតការណ៍អង្គការក្រៅរដ្ឋាភិបាលចាត់ទុកការប្រឡងនៅខេត្តមណ្ឌលគិរីឆ្នាំនេះ មានវិន័យសណ្ដាប់ធ្នាប់ល្អ មិនមានបែកធ្លាយវិញ្ញាសាប្រឡង គ្មានលួចយកឯកសារ ឬលួចមើលឯកសារក្នុងបន្ទប់ប្រឡង និងគ្មានសូកប៉ាន់ ឬរ៉ៃប្រាក់សិស្សក្នុងពេលប្រឡង ជាពិសេសមានអ្នកសង្កេតការណ៍ពីអង្គភាពប្រឆាំងអំពើពុករលួយ រួមជាមួយអង្គការសង្គមស៊ីវិល ១៧នាក់ចូលរួមជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។