ប្រេងម៉ាស៊ូតជាច្រើនលីត្របានធ្លាយហូរចូលស្រែរបស់កសិករតាមប្រឡាយមេ ដែលត្រូវគេបង្ហូរតាមប្រព័ន្ធរំដោះទឹកនៅក្នុងសង្កាត់អូរចារ ខេត្តបាត់ដំបង។ ប្រជាពលរដ្ឋបង្ហាញការព្រួយបារម្ភថា ប្រេងម៉ាស៊ូតនេះនឹងបំផ្លាញស្រូវជាច្រើនហិកតារនៅផ្នែកខាងក្រោមខ្សែទឹក។
ប្រជាពលរដ្ឋជាច្រើនគ្រួសារនៅភូមិអណ្ដូងចេញ បានផ្អើលមកដងយកប្រេងម៉ាស៊ូតគ្រប់គ្នាៗ ដែលអណ្ដែតត្រៀបត្រានៅតាមទឹកយកទៅប្រើប្រាស់។ ជាមួយគ្នានេះ ពួកគេក៏សំដែងក្ដីបារម្ភថា សារធាតុប្រេងម៉ាស៊ូតដែលកំពុងរីកសាយភាយពេញផ្ទៃប្រឡាយនេះ ក្រៅពីធ្វើឲ្យជះឥទ្ធិពល និងមានផលប៉ះពាល់ដល់ដំណាំស្រូវហើយ ប្រេងម៉ាស៊ូតនេះថែមទាំងធ្វើឲ្យខូចខាតបរិស្ថានថែមទៀតផង។
កំពុងអោនងើបៗ ដោយដៃមានកាន់កញ្ច្រែង ហើយមានអេប៉ុងសម្រាប់បឺតត្រងយកប្រេងម៉ាស៊ូតផង ប្រជាពលរដ្ឋឲ្យដឹងនៅថ្ងៃទី១០ សីហា ថា ពួកគេនៅមិនទាន់ប្រាកដថា ប្រេងម៉ាស៊ូតដែលបែកធ្លាយនៅពេលនេះ មានប្រភពចេញពីទីណាឲ្យបានច្បាស់លាស់នៅឡើយទេ។
ពួកគេបន្តថា ថ្វីបើនៅពេលនេះប្រេងម៉ាស៊ូតនេះ នៅមិនទាន់ប្រាកដថា ក្រោយពីដងរួចអាចយកប្រើប្រាស់បានដែរឬយ៉ាងនោះ។ ប៉ុន្តែពួកគេអះអាងថា មានមនុស្សច្រើនណាស់ដែលផ្អើលមកត្រងយកប្រេងម៉ាស៊ូតយកទៅប្រើប្រាស់ដែរនោះ៖ «ខ្ញុំឥតដឹងដែរ ព្រោះទើបមកអម្បាញ់មិញ ប្រហែលជាច្រើនដែរ ព្រោះគេអ្នកត្រងបាន។ អ្នកខ្លះបួន ប្រាំ ប្រាំមួយប៊ីដុងអីទៅហើយ។ អ្នកខាងកើតដែលគេដឹងមុន គេត្រងបានច្រើន។ អូ! ខូចអស់ហើយ មើលព្រលឹត ងាប់អស់ហើយ វាក្ដៅ។ អូ! បើមានភ្លៀងមកហូរទៅស្រែខូចស្រែអស់ហើយ»។
នៅពេលនេះ ស្មៅនិងរុក្ខជាតិដែលដុះក្នុងប្រឡាយមេ បានក្រៀមស្វិតជាបណ្ដើរៗហើយ។ក្រៅពីនេះអ្នកដែលកំពុងដងប្រេងម៉ាស៊ូតមួយចំនួនហើយយកទៅប្រើប្រាស់ និយាយថា សារធាតុនេះមិនត្រឹមតែធ្វើឲ្យរុក្ខជាតិក្នុងទឹកត្រូវស្វិតរលួយទេ តែថែមទាំងបណ្ដាលឲ្យជើងដៃរបស់ពួកគេនៅពេលនេះក៏ក្រៀមស្បែកដែរ។ រឹតតែជួបផលលំបាកទៅទៀតនោះ គឺចំហាយសារធាតុម៉ាស៊ូត បានជះក្លិនភាយតាមខ្យល់នៅពេលឈរជិត ហើយក្លិនឈួលនៃសារធាតុម៉ាស៊ូតនេះ ស្ទើរទ្រាំពុំបានទៀតផង។
រស់នៅសង្កាត់អូរចារ លោក មាន កុសល ជាតំណាងពលរដ្ឋនៅក្នុងសហគមន៍អណ្ដូងចេញ អះអាងថា ប្រេងម៉ាស៊ូតដែលបែកធ្លាយនៅពេលនេះ គឺចេញពីស្ថានីយប្រេងឥន្ធនៈរបស់លោក ឡេង ស៊្រុន។ លោកបន្តថា ព្រោះក្រោយពីប្រជាពលរដ្ឋតវ៉ាមិនអនុញ្ញាតឲ្យម្ចាស់ស្ថានីយប្រេងឥន្ធនៈ ឡេង ស្រ៊ុន បង្ហូរចូលក្នុងស្រះបុរាណក្នុងសហគមន៍ហើយ ទើបបង្វែរសារធាតុនេះបញ្ចូលតាមប្រព័ន្ធលូរំដោះទឹកក្នុងក្រុង រួចបង្ហូរចូលប្រឡាយមេតែម្ដង។
លោកបន្តថា៖ «ចេញពីហ្ការ៉ាស់សាំង ឡេង ស្រ៊ុន ហ្នឹងតែម្ដង។ បាទ! ចេញពីហ្នឹងព្រោះកាលពីមុនមក លូហ្នឹងដែលមិនទាន់កាយហ្នឹង គឺនៅកប់នៅហ្នឹង មិនអាចហូរមកទេ។ នៅពេលដែលលិចលង់ប្រជាពលរដ្ឋនៅខាងលើ មានទំនាស់ទឹកស្រះហ្នឹង ក្រោយមកទៀត ក៏ពួកខ្ញុំសំណើទៅលោកអភិបាលក្រុងដាក់លូ ក៏ធ្លាយមកហ្នឹងមកតែម្ដង»។
បដិសេធនឹងការលើកឡើងនេះ ម្ចាស់ស្ថានីយប្រេងឥន្ធនៈ លោក ឡេង ស៊្រុន អះអាងថា សារធាតុប្រេងម៉ាស៊ូតដែលបែកធ្លាយនៅពេលនេះ គឺពុំមែនចេញពីស្ថានីយរបស់លោកឡើយ។ លោកបន្តថា រហូតមកដល់ពេលនេះ ទាំងក្រុមការងាររបស់លោក និងស្ថាប័នជំនាញរបស់ក្រុងបាត់ដំបង កំពុងពិនិត្យ និងសិក្សារកមូលហេតុ។
លោក ឡេង ស៊្រុន៖ «ខ្ញុំកំពុងតែធ្វើការបូមពីប្រឡាយហ្នឹងចេញ តែក្នុងទុយយោខ្ញុំឥតមានទេ ឥតមានជ្រាបអីទេ។ ខ្ញុំគាស់មើលអស់ហើយ ខ្ញុំវ៉ៃ ហើយអ្នកសារព័ត៌មានក៏គេនេះច្រើនដែរ គេចុះពិនិត្យឃើញកន្លែងដែលទឹកចុះតាមទុយយោតាមអីហ្នឹង។ វាអត់មានហូរមានសើមអីទាំងអស់»។
ចំណែកអភិបាលក្រុងបាត់ដំបង លោក សៀង ឯមប៊ុនស៊ី ថ្លែងថា នៅពេលនេះ ស្ថាប័នជំនាញកំពុងទប់ស្កាត់ និងចាត់វិធានការបន្ទាន់ ដើម្បីបញ្ចៀសបញ្ហា។ លោកសន្និដ្ឋានជាបឋមថា បង្ហាញនេះទំនងជាកើតឡើងនៅពេលអ្នកធ្វើការឲ្យលោក ឡេង ស្រ៊ុន លួចបន្លំប្រេងម៉ាស៊ូត រួចលាក់ទុកទើបបែកធ្លាយនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។