តំណាងអ្នកភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារប្រមាណជាង៤០នាក់ បានចេញតវ៉ានៅចំកណ្ដាលទ្រូងផ្លូវជាតិលេខ៦អា ខាងជើងសាលាខណ្ឌកាលពីព្រឹកថ្ងៃទី៦ មេសា។
ការតវ៉ានេះដើម្បីទាមទារឲ្យអាជ្ញាធរ និងមន្ទីរសាធារណការបើករបាំងចែកផ្លូវ៦អារ ចំច្រកផ្លូវចេញចូលភូមិពួកគាត់។
តំណាងអ្នកភូមិលោក រិទ្ធី ណា បានថ្លែងក្នុងពេលកំពុងតវ៉ានោះថាការបើកឬទុកច្រកឆ្លងកាត់ផ្លូវ ជាតិ៦អា មិនស្មើភាពគ្នា រវាងច្រកចូលភូមិនិងច្រកចូលក្រុមហ៊ុន ឬភោជនីយដ្ឋាននោះទេ៖ « អ៊ីចឹងខ្ញុំមិនយល់ថាផ្លូវអ្នកភូមិកើតមានតាំងពីឆ្នាំ១៩៦៥ ម៉េចមិនទុកច្រក ចេញចូលឲ្យបាន ចុះត្រង់ក្រុមហ៊ុនដែលគេទើបនឹងធ្វើថ្មីនេះ ប្រហែល២ ទៅ៣ឆ្នាំ នេះ ម៉េចគេបើកផ្លូវ ឲ្យឆ្លងកាត់បាន ..? ចុះសម្រាប់ពួកខ្ញុំជាប្រជាពលរដ្ឋ សិស្ស អាជីវករពិបាកក្នុងការឆ្លងកាត់ណាស់ » ។
តែទោះយ៉ាងណាការប្រមូលផ្តុំគ្នាតវ៉ានោះ បានរំសាយទៅវិញក្នុងរយៈពេលប្រមាណជាពីរម៉ោងបន្ទាប់ពីអាជ្ញាធរសង្កាត់ព្រែកលៀប ចេញមកសម្របសម្រួលទទួលយកពាក្យស្នើសុំរបស់ប្រជាពលរដ្ឋ ទៅដោះស្រាយនៅសាលាខណ្ឌជ្រោយចង្វារ និងមន្ទីរឬក្រសួងសាធារណការ។
ក្រុមប្រជាពលរដ្ឋព្រមានថា បើពុំមានការដោះស្រាយនោះទេពួកគាត់នឹងប្រមូលផ្តុំគ្នាទាំង៣សង្កាត់តវ៉ា ដោយបិទផ្លូវជាតិ៦អា នោះតែម្ដងដើម្បីឲ្យមានការដោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។