កម្មករកម្មការិនីរោងចក្រ ប្លូម ហ្វៀល (Bloom field) នៅខេត្តកំពង់ឆ្នាំង យល់ព្រមចូលធ្វើការឡើងវិញ នៅថ្ងៃទី២៦ ខែមិថុនា បន្ទាប់ពីធ្វើបាតុកម្មពីរថ្ងៃជាប់ៗគ្នា នៅខាងមុខរោងចក្រ ដើម្បីទាមទារលក្ខខណ្ឌការងារល្អប្រសើរ និងស្នើឲ្យក្រុមហ៊ុនទទួលយកកម្មករ និងសហជីពចំនួន ៥នាក់ ដែលបានបញ្ឈប់ឲ្យចូលធ្វើការវិញ។
អគ្គលេខាធិការនៃសហព័ន្ធសហជីពសំឡេងយុវជនខ្មែរ លោក អន សាខន មានប្រសាសន៍នៅថ្ងៃទី២៥ ខែមិថុនា ថា ក្រុមកម្មករសុខចិត្តចូលធ្វើការតាមធម្មតាឡើងវិញ ក្រោយពីភាគីក្រុមហ៊ុនយល់ព្រមទទួលយកសំណើរបស់កម្មករចំនួន ៣ចំណុចសំខាន់ៗ ក្នុងចំណោម ១៥ចំណុច ដែលបានទាមទារ៖ «ចំណុចទី១ ក្រុមហ៊ុនឯកភាពទទួលយកថ្នាក់ដឹកនាំសហជីពសំឡេងយុវជនខ្មែរ ឲ្យចូលធ្វើការវិញ។ ហើយទី២ ក្រុមហ៊ុនឯកភាពផ្ដល់ប្រាក់ឈ្នួល និងប្រាក់រង្វាន់ផ្សេងៗជូនកម្មករនិយោជិកនៅក្នុងរោងចក្រ ក្នុងអំឡុងរយៈពេលធ្វើបាតុកម្មពីរថ្ងៃហ្នឹង។ ហើយទី៣ ទាក់ទងនឹងកម្មការិនីពីរនាក់ដែលក្រុមហ៊ុនបញ្ចប់កិច្ចសន្យាក្នុងពេលសាកល្បង ក្រុមហ៊ុនឯកភាពយកគាត់ចូលធ្វើការ។ ចំណុចទាមទារដែលនៅសេសសល់របស់បងប្អូនកម្មករៗគាត់យល់អំពីការលំបាករបស់ក្រុមហ៊ុន ដោយសារតែចំណុចដែលនៅសល់ហ្នឹង គឺទាក់ទងនឹងបញ្ហាអត្ថប្រយោជន៍។ អ៊ីចឹងគាត់ទុកពេលស្នើសុំយោបល់ពីថៅកែនៅតៃវ៉ាន់ ហើយគាត់សន្យាថានឹងមកជួបពិភាក្សាជាមួយតំណាងកម្មករសហជីពនៅដើមសប្ដាហ៍ទី១ ខែកក្កដា ឆ្នាំ២០១៤ តទៅទៀត»។
វិទ្យុអាស៊ីសេរី មិនអាចទាក់ទងមន្ត្រីរដ្ឋបាលរោងចក្រ ប្លូម ហ្វៀល កញ្ញា ឡុង ណាវី និងមន្ត្រីនៃមន្ទីរការងារ ខេត្តកំពង់ឆ្នាំង ដែលបានចុះសម្របសម្រួលលើវិវាទនេះ ដើម្បីសុំការអត្ថាធិប្បាយបានទេ នៅថ្ងៃទី២៥ ខែមិថុនា។
ក្រុមកម្មករ និងតំណាងសហព័ន្ធសហជីពសំឡេងយុវជនខ្មែរប្រចាំរោងចក្រ ប្លូម ហ្វៀល ដែលមានទីតាំងស្ថិតនៅភូមិសូវង្ស ឃុំតាជេស នៃស្រុកកំពង់ត្រឡាច បានដាក់ឧបករណ៍បំពងសំឡេងស្រែកតវ៉ានៅខាងមុខរោងចក្រតាំងពីព្រឹកថ្ងៃទី២៤ និងថ្ងៃទី២៥ ខែមិថុនា ដើម្បីជំរុញឲ្យភាគីរោងចក្រទទួលយកលក្ខខណ្ឌការងារចំនួន ១៥ចំណុច។ រោងចក្រនេះ ធ្លាប់រងការរិះគន់ថា រើសអើងកម្មករ និងបណ្ដេញកម្មករជាច្រើននាក់ចេញពីការងារ ដោយគ្មានមូលហេតុច្បាស់លាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។