បន្ទាប់ពីមានហេតុការណ៍បំផ្ទុះគ្រាប់បែកកើតឡើង សមត្ថកិច្ចពាក់ព័ន្ធបានជួបប្រជុំគ្នាបន្ទាន់ នៅព្រឹកថ្ងៃទី៧ ខែសីហា ដើម្បីកំណត់មុខសញ្ញា និងគោលបំណងនៃការបង្កហេតុនេះ។ ជាជំហានដំបូង សមត្ថកិច្ចបញ្ជាក់ថា គោលដៅសំខាន់របស់ក្រុមអ្នកបំផ្ទុះគ្រាប់បែកនោះ មិនមែនសំដៅសម្លាប់មនុស្សទេ តែអាចជាការព្រមានធ្វើឲ្យពលរដ្ឋភ័យខ្លាច ក្នុងអំឡុងពេលលទ្ធផលបោះឆ្នោតមិនទាន់ប្រកាសប៉ុណ្ណោះ។
ស្នងការនគរបាលរាជធានីភ្នំពេញ លោក ជួន សុវណ្ណ បានមានប្រសាសន៍ប្រាប់អ្នកសារព័ត៌មានក្នុងស្រុកថា ការបំផ្ទុះគ្រាប់បែកនេះធ្វើឡើងក្នុងគោលបំណងបង្កអសន្តិសុខសង្គម ព្រោះទីតាំងដាក់គ្រាប់បែក និងពេលវេលានៃការបំផ្ទុះ មិនបង្ហាញពីចេតនាចង់ឲ្យមនុស្សនៅជុំវិញនោះស្លាប់ទេ។
ទន្ទឹមនឹងនេះ មន្ត្រីអ្នកនាំពាក្យក្រសួងមហាផ្ទៃ លោកឧត្តមសេនីយ៍ឯក ខៀវ សុភ័គ បញ្ជាក់ថា សមត្ថកិច្ចមិនទាន់អាចសន្និដ្ឋានបានថា អ្នកដាក់គ្រាប់បែកមានបំណងអ្វីនៅឡើយ។ លោកបន្តថា កន្លងទៅ គណបក្សសង្គ្រោះជាតិ ប្រកាសថានឹងតវ៉ាចំពោះលទ្ធផលបោះឆ្នោត តែគេក៏មិនទាន់អាចចាត់ទុកថារឿងដាក់គ្រាប់បែកនេះ ទាក់ទងរឿងនយោបាយដែរ។ លោក ខៀវ សុភ័គ បញ្ជាក់ថា សមត្ថកិច្ចបានទទួលតម្រុយខ្លះរួចហើយ ចំពោះបញ្ហានេះ។
ទោះជាបែបណាក្តី ប្រធានមជ្ឈមណ្ឌលសិទ្ធិមនុស្សកម្ពុជា (CCHR) លោក អ៊ូ វីរៈ មិនចាត់ទុកបញ្ហានេះជារឿងនយោបាយទេ។ លោកគិតថា អ្នកបំផ្ទុះគ្រាប់បែកអាចមានគំនុំនឹងតុលាការក្រុងក៏អាចថាបាន ព្រោះតុលាការនេះមានកេរ្តិ៍ឈ្មោះមិនល្អស្រាប់។ លោកបន្តថា បើសិក្សាពីបញ្ហានយោបាយ ការផ្ទុះគ្រាប់បែកនេះនឹងនាំឲ្យពលរដ្ឋភ័យខ្លាច ហើយទាំងគណបក្សកាន់អំណាច និងបក្សប្រឆាំង សុទ្ធតែខាតទាំងសងខាង។
កាលពីឆ្នាំ១៩៩៨ ក៏មានករណីផ្ទុះគ្រាប់បែកកើតឡើងដែរ ក្នុងពេលដែលប្រទេសមានវិបត្តិនយោបាយ គឺសមាជិកគណបក្សប្រឆាំងតវ៉ាមិនទទួលស្គាល់លទ្ធផលបោះឆ្នោត។ ហេតុការណ៍នោះ កើតឡើងនៅបរិវេណផ្ទះលោកនាយករដ្ឋមន្ត្រី ហ៊ុន សែន។ បន្ទាប់មក លោកនាយករដ្ឋមន្ត្រីក៏ចេញបញ្ជាឲ្យកម្លាំងប្រដាប់អាវុធបង្ក្រាបហ្វូងអ្នកតវ៉ា ដោយចោទថា អ្នកគប់គ្រាប់បែកជ្រកកោនក្នុងក្រុមបាតុករ។ មិនតែប៉ុណ្ណោះ ឃាតកដែលគប់គ្រាប់បែកចូលក្នុងហ្វូងបាតុករកាលពីឆ្នាំ១៩៩៧ ដែលសម្លាប់មនុស្សអស់ជាច្រើននាក់នោះ ក៏មិនទាន់ត្រូវបានសមត្ថកិច្ចរកឃើញយកមកផ្ដន្ទាទោសនៅឡើយ។
ទាក់ទងនឹងបញ្ហានេះ អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា ករណីបង្កប់គ្រាប់បែកនេះ ជាបញ្ហាថ្មីមួយទៀតសម្រាប់មហាជនអាចយកមកពិភាក្សា ភ្ជាប់នឹងបញ្ហានយោបាយបច្ចុប្បន្ន ដែលមិនទាន់ដឹងច្បាស់ថា គណបក្សណាមួយនឹងឈ្នះឆ្នោតនោះ។ លោកបន្តថា ទោះបីអ្នកបំផ្ទុះមានបំណងអ្វីក៏ដោយ ប៉ុន្តែសមត្ថកិច្ចត្រូវតែស៊ើបអង្កេតបញ្ហានេះឲ្យបានច្បាស់លាស់ និងត្រូវចាប់ជនល្មើសមកដាក់ទោសតាមច្បាប់។ លោកបញ្ជាក់ថា សមត្ថកិច្ចក៏ត្រូវចេញមុខបកស្រាយប្រកបដោយតម្លាភាព ដើម្បីឲ្យពលរដ្ឋអស់ចិត្ត និងទប់ស្កាត់អស្ថិរភាពសង្គម។
លោកបន្តថា រាជរដ្ឋាភិបាលមិនត្រូវយកលេសណាមួយ ដើម្បីចល័តកម្លាំងទ័ពឡើយ ទោះបីមានហេតុការណ៍ផ្ទុះគ្រាប់បែកនេះក៏ដោយ ព្រោះការចល័តកម្លាំងទ័ព ឬរឹតបន្តឹងសន្តិសុខខ្លាំងក្លាជាងនេះ នឹងបង្កឲ្យពលរដ្ឋមានការភ័យខ្លាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។