លោក សុន ឆ័យ មន្ត្រីជាន់ខ្ពស់សមាជិកគណបក្សសង្គ្រោះជាតិ មានប្រសាសន៍នៅថ្ងៃទី១៦ ឧសភា ថា ផ្អែកតាមការពិនិត្យជាក់ស្ដែងរបស់លោក រកឃើញថា កម្ពុជា ពិតជាត្រូវបាត់បង់ទឹកដីមួយផ្នែកទៀត ទៅប្រទេសថៃ។ លោកបន្តថា ដូចជានៅបង្គោលឡាក់លេខ៦៦ និងលេខ៦៧ នៅចំណុចសង្កាត់បរយ៉ាខា ក្រុងប៉ៃលិន បង្គោលឡាក់ទាំងនេះពិតជាត្រូវបានកែច្នៃក្រោយ ពោលគឺពុំមែនជាបង្គោលចាស់ដែលកំណត់ដោយរដ្ឋការបារាំង នោះទេ។ ពីព្រោះបង្គោលដែលលោកពិនិត្យដោយផ្ទាល់ រកឃើញថា មានស្នាមប្រេះដាច់ដោយកង់ និងអាចលួចរំកិលនៅមុនឆ្នាំ១៩៧៩ ប៉ុណ្ណោះ។
លោក សុន ឆ័យ៖ «បានរុកតាមចម្ការពោត ហើយចុះទៅរហូតដល់ឃើញព្រំដែន បង្គោលឃើញបង្គោលនោះ ហើយក៏ហាក់ដូចជាមានការពោលប្រាប់ពីប្រជារាស្ត្រដែរថា បង្គោលនោះហាក់ដូចជាបង្គោលបង្ខិតដោយពួកថៃ ប្រហែលឆ្នាំ១៩៧៥។ មានស្នាមដែលគេវៃជ្រុងបង្គោលនោះ ដើម្បីគេយកខ្សែពោលើកអើបង្គោលហ្នឹង ដើម្បីយកមកវៃដាំជាថ្មីអីជាដើម»។
ការថ្លែងរបស់លោក សុន ឆ័យ នេះ ធ្វើឡើងនៅក្នុងពេលរូបលោករួមជាមួយមន្ត្រីសមាជិកគណបក្សសង្គ្រោះជាតិ មួយចំនួន បានចុះពិនិត្យមើលបង្គោលព្រំដែនកម្ពុជា-ថៃ នៅថ្ងៃទី១៦ ឧសភា បន្ទាប់ពីមានភាពមិនប្រក្រតីកើតឡើង កាលពីចុងខែមីនា កន្លងទៅនេះ។
រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ត្រូវបានអង្គការសង្គមស៊ីវិល ដែលឃ្លាំមើលបញ្ហាព្រំដែន និងគណបក្សប្រឆាំង រិះគន់ថា ធ្វើឲ្យទឹកដីកម្ពុជា ត្រូវបាត់បង់បន្ថែមទៀត ទាំងផ្នែកខាងកើត និងខាងលិច ទៅប្រទេសជិតខាង។ ទន្ទឹមនឹងនេះ អ្នកហ៊ានរិះគន់រដ្ឋាភិបាលក្នុងរឿងព្រំដែន តែងប្រឈមនឹងការជាប់ពន្ធនាគារ។
កាលពីថ្ងៃទី២៨ ខែមីនា អតីតមេប៉ុស្តិ៍បរថ្មី លោក មួន ទឹម ត្រូវបានស្នងការខេត្តប៉ៃលិន បញ្ចប់ពីតួនាទី និងបង្ខំឲ្យចុះហត្ថលេខាទទួលកំហុស ៤ដងក្នុងមួយថ្ងៃនៅឡើយ។ មូលហេតុនៃបញ្ឈប់ជាមេប៉ុស្តិ៍នេះ ព្រោះលោកត្រូវគេរកឃើញថា បានអមដំណើរដើម្បីការពារអ្នកយកព័ត៌មានរបស់វិទ្យុអាស៊ីសេរី ៣នាក់ ចុះពិនិត្យមើលបង្គោលព្រំដែនលេខ៦៤ កាលពីថ្ងៃទី១៩ មីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។