មន្ត្រីសាលារាជធានីភ្នំពេញ បានប្រកាសថា នៅដើមខែមីនា ឆ្នាំ២០១៤ នឹងពង្រីកសេវាដឹកជញ្ជូនរថយន្តក្រុង ក្នុងរាជធានីឲ្យបានច្រើនខ្សែថែមទៀត នៅក្រោយបញ្ចប់ការដាក់ឲ្យដំណើរការរថយន្តក្រុងសាកល្បងជាមួយអង្គការ ចៃកា ជប៉ុន (JICA)។
មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ បានឲ្យដឹងថា គម្រោងពង្រីកសេវារថយន្តក្រុងនៅថ្ងៃខាងមុខ គឺពង្រីកខ្សែរត់ថ្មីចាប់ពីរង្វង់មូលស្តាតចាស់ គល់ស្ពានជ្រោយចង្វារ ឆ្ពោះទៅតាមផ្លូវជាតិលេខ ៥ ទៅដល់ម្តុំសង្កាត់គីឡូម៉ែត្រលេខ ៦ ឬស្ថានីយទូរទស្សន៍ស៊ី.ធី.អិន និងពីគល់ស្ពានច្បារអំពៅ គល់ស្ពានព្រះមុនីវង្ស ឆ្ពោះទៅកាន់ក្រុងតាខ្មៅជាដើម។ ជាងនេះក៏នឹងពង្រីកឲ្យមានសេវាដឹកជញ្ជូនរថយន្តក្រុងនៅតាមផ្លូវកម្ពុជាក្រោម និងផ្លូវម៉ៅសេទុង ថែមទៀត។
លោក ឡុង ឌីម៉ង់ បន្ថែមថា គម្រោងពង្រីកសេវារថយន្តដឹកអ្នកដំណើរក្នុងក្រុងពេលនេះ ថ្នាក់ដឹកនាំសាលារាជធានីបានជ្រើសយកក្រុមហ៊ុនវិនិយោគដែលធ្លាប់មានពិសោធន៍ក្នុងសេវាដឹកជញ្ជូននេះនេះរួចហើយ ដោយធ្វើឡើងតាមរយៈការដេញថ្លៃ និងមានតម្លៃសំបុត្រសមរម្យ ហើយនឹងអាចកាត់បន្ថយការកកស្ទះ និងគ្រោះថ្នាក់ចរាចរណ៍បានច្រើននៅថ្ងៃអនាគត។
កាលពីថ្ងៃទី៥ ខែកុម្ភៈ សាលារាជធានីភ្នំពេញ និងអង្គការចៃកា ជប៉ុន បានបើកសម្ពោធរថយន្តក្រុងសាកល្បងមួយខ្សែនៅតាមបណ្ដោយផ្លូវព្រះមុនីវង្ស ដោយមានរថយន្តក្រុងចំនួន ១០គ្រឿង ហើយត្រូវបញ្ចប់ការសាកល្បងនៅថ្ងៃទី៤ ខែមីនា ឆ្នាំ២០១៤។
តម្លៃសំបុត្ររថយន្តក្រុងក្នុងជំហានសាកល្បងសម្រាប់មនុស្សម្នាក់មានតថ្លៃ ១.៥០០រៀល។ រថយន្តក្រុងសាកល្បងនេះ បានធ្វើដំណើរទៅមកតាមបណ្ដោយផ្លូវព្រះមុនីវង្ស ចាប់ពីរង្វង់មូលស្តាតចាស់ គល់ស្ពានជ្រោយចង្វារ ឆ្ពោះទៅគល់ស្ពានព្រះមុនីវង្ស ឬផ្សារច្បារអំពៅ ដោយចេញដំណើរនៅម៉ោង ៥ និង៣០នាទីព្រឹក ដល់ម៉ោង ៨ និង៣០នាទីយប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។