នៅថ្ងៃទី៤ មីនា ឆ្នាំ២០១៤ នេះ គឺជាថ្ងៃបញ្ចប់នៃគម្រោងសាកល្បងដាក់ឲ្យប្រើប្រាស់រថយន្តក្រុងរយៈពេល ១ខែ នៅរាជធានីភ្នំពេញ ដែលបានចាប់ផ្ដើមដំណើរការកាលពីដើមខែកុម្ភៈ កន្លងទៅ។ មន្ត្រីរដ្ឋាភិបាលអះអាងថា គម្រោងសាកល្បងនេះបានជោគជ័យ។ ក៏ប៉ុន្តែនៅមិនដឹងថា មានក្រុមហ៊ុនឯកជនណាមួយចូលមកវិនិយោគជំនួសការសាកល្បង ដែលទើបបញ្ចប់នេះនៅឡើយទេ។
ការសាកល្បងដាក់ឲ្យប្រើប្រាស់រថយន្តក្រុងនៅលើដងវិថីព្រះមុនីវង្ស រាជធានីភ្នំពេញ បានផុតកំណត់នៅថ្ងៃទី៤ មីនា ហើយ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ឲ្យដឹងអំពីលទ្ធផលនៃការសាកល្បងនេះ នៅថ្ងៃទី៤ មីនា ថា អ្នកធ្វើដំណើរបានចាប់អារម្មណ៍ជិះរថយន្តក្រុងច្រើននៅក្នុងរយៈពេល ២សប្ដាហ៍នៃដើមខែដំបូង គឺមានចំនួនប្រហែល ១.៨០០នាក់ក្នុង១ថ្ងៃគិតជាមធ្យម។ ក៏ប៉ុន្តែ នៅ២សប្ដាហ៍ចុងខែ ចំនួនអ្នកជិះបានថយចុះមកត្រឹមប្រហែល ១.៥០០នាក់វិញគិតជាមធ្យមក្នុងមួយថ្ងៃ។
លោកថា ចំនួនធ្លាក់ចុះនេះដោយសារផ្លូវរត់សាកល្បងមានតែមួយខ្សែ មិនមានខ្សែរត់ផ្សេងទៀត ដើម្បីទទួល និងផ្ទេរអ្នកដំណើរបន្ត៖ «យើងយល់បាតុភាពនៃការថយចុះពី ១.៨០០(នាក់) មក ១.៥០០(នាក់) មួយថ្ងៃនេះ ធ្វើឲ្យប្រជាពលរដ្ឋលោកថយចុះបន្តិចដែរ ហើយយើងបានទទួលអនុសាសន៍ និងសំណូមពរប្រជាពលរដ្ឋអ្នកជិះរថយន្តក្រុងហ្នឹងដែរ។ គាត់បានបញ្ជាក់ថា ការប្រើប្រាស់រថយន្តតែមួយខ្សែនេះ វាធ្វើឲ្យប្រជាពលរដ្ឋលោកថយចុះបន្តិចដែរ។ តែបើសិនជាសាលារាជធានីភ្នំពេញយើងរៀបចំដាក់ឲ្យមានដំណើរការខ្សែរត់បន្ថែមទៀត ដែលមានលក្ខណៈប្រសព្វទៀត រឹតតែប្រជាពលរដ្ឋគាំទ្រច្រើន...»។
កាលពីដើមខែកុម្ភៈ ឆ្នាំ២០១៤ សាលារាជធានីភ្នំពេញ និងក្រសួងសាធារណការ និងដឹកជញ្ជូនកម្ពុជា សហការជាមួយទីភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា ចៃកា (JICA) បានប្រកាសដាក់ឲ្យប្រើប្រាស់រថយន្តក្រុង ១០គ្រឿង រត់សាកល្បងនៅតាមមហាវិថីព្រះមុនីវង្ស។ ការសាកល្បងនេះ ធ្វើឡើងក្នុងបំណងកាត់បន្ថយការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍នៅក្នុងរាជធានីភ្នំពេញ។
លោក ឡុង ឌីម៉ង់ បានបន្តទាំងមោទនភាពថា មន្ត្រីសាលារាជធានីភ្នំពេញ កំពុងបូកសរុបលទ្ធផលដែលបានពីការសាកល្បងរយៈពេលពេញមួយខែនេះ ដើម្បីវិភាគ និងវាយតម្លៃលទ្ធផលយកធ្វើជាអនុសាសន៍ សម្រាប់ដាក់ឲ្យដំណើរការគម្រោងនេះពេញលេញបន្ត ស្របពេលដែលអ្នកជំនាញសេដ្ឋកិច្ចទស្សន៍ទាយថា គម្រោងសាកល្បងរថយន្តក្រុងនេះ មិនអាចដំណើរការបានទេ។
អ្នកវិភាគសេដ្ឋកិច្ចឯករាជ្យ លោក ស្រី ចន្ធី ដែលឃ្លាំមើលគម្រោងសាកល្បងរថយន្តក្រុងនេះ យល់ឃើញថា ទំនងមិនមានក្រុមហ៊ុនណាមកវិនិយោគលើសេវារថយន្តក្រុងនេះបន្តទេ ព្រោះរបរនេះមើលទៅមិនឃើញមានប្រាក់ចំណេញ។ ម្យ៉ាងវិញទៀត ភ្នំពេញឥឡូវសម្បូរទៅដោយសេវាដឹកជញ្ជូនច្រើនប្រភេទ ដែលអ្នកធ្វើដំណើរមានជម្រើសច្រើន ដូចជារថយន្តតាក់ស៊ីទំនើបៗ និងផាសុកភាព មានម៉ូតូឌុប ម៉ូតូសណ្ដោងរ៉ឺម៉ក ជាដើម។
លោកបានគណនាលើការចំណាយ និងប្រាក់ចំណូល ដោយប្រៀបធៀបតម្លៃប្រេងសាំងខ្ពស់លើទីផ្សារសព្វថ្ងៃក្នុងមួយលីត្រថ្លៃជាង ៥.០០០រៀល និងថ្លៃបម្រុងសម្រាប់ចំណាយលើការជួសជុលរថយន្ត ថ្លៃចំណាយលើបុគ្គលិកជាដើម ប្រៀបទៅប្រាក់ចំណូលតិចបានមកពីអ្នកដំណើរម្នាក់ត្រឹមតែ ១.៥០០រៀលនោះ គឺមិនអាចទៅរួចទេ។ លោកថា គម្រោងនេះអាចធ្វើទៅបានលុះត្រាណារដ្ឋាភិបាលសុខចិត្តចេញថ្លៃខាតជំនួសក្រុមហ៊ុន៖ «បើសិនជាអត់មានបឋមទុនថ្លៃប្រេង ដើម្បីឲ្យសេវាហ្នឹងដំណើរការ ខ្ញុំជឿថាមានការលំបាក។ ធម្មតា អ្នករកស៊ីទាល់តែចំណេញបានគាត់រកស៊ី ចុះបើអត់បានចំណេញ គាត់ទៅឈឺក្បាលវិលមុខអី បើគាត់មានលុយយកទៅដាក់ធនាគារវិញ ក៏បានការប្រាក់ដែរ ហើយចុះគាត់ទៅឈឺក្បាលធ្វើអី ព្រោះវាអត់បានចំណេញ»។
យ៉ាងណា លោក ឡុង ឌីម៉ង់ បង្ហើបថា គម្រោងនេះនៅតែបន្តទៅទៀត ព្រោះមានក្រុមហ៊ុនឯកជនមួយបានទទួលយកវិនិយោគគម្រោងនេះបន្ត។ ក៏ប៉ុន្តែ លោកមិនបញ្ចេញឈ្មោះក្រុមហ៊ុននោះឲ្យដឹងទេ។ លោកអះអាងថា សាលារាជធានីភ្នំពេញ នឹងបន្តដំណើរការគម្រោងសេវារថយន្តក្រុងពីរខ្សែបន្ថែមទៀត ដែលចាប់ផ្ដើមឆាប់ៗក្នុងខែមីនា នេះ នៅតាមវិថីម៉ៅសេទុង និងវិថីកម្ពុជាក្រោម តែលោកមិនបានបញ្ជាក់កាលបរិច្ឆេទចាប់ផ្ដើមច្បាស់លាស់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។