បុគ្គលិកក្រុមហ៊ុន ទ្រូថាមអាស៊ី (Truetime Asia) ដែលតវ៉ាជាថ្មីទៀតនៅខាងមុខការិយាល័យរបស់ខ្លួននៅសង្កាត់ទំនប់ទឹក ខណ្ឌមានជ័យ រាជធានីភ្នំពេញ ស្ទើរពេញមួយថ្ងៃទី៣០ ខែតុលា មិនទទួលបានលទ្ធផលអ្វីទេ។
ស្របពេលនេះ ពួកគេព្រមានធ្វើការតវ៉ាជារៀងរាល់ថ្ងៃ និងនាំគ្នាដង្ហែញត្តិទៅដាក់នៅខុទ្ទកាល័យរបស់លោកនាយករដ្ឋមន្ត្រី ហ៊ុន សែន និងតំណាងសហភាពអឺរ៉ុប ទៀត ប្រសិនបើពួកគេតវ៉ានៅនឹងកន្លែងពុំមានការឆ្លើយតប ឬដោះស្រាយយ៉ាងណានោះ។
បុគ្គលិកផលិតផ្ទាំងរូបភាពឱ្យក្រុមហ៊ុន ទ្រូថាមអាស៊ី ប្រមាណ ១០០នាក់ ចាប់ផ្ដើមតវ៉ាជាថ្មីទៀតប្រឆាំងនឹងថ្នាក់ដឹកនាំក្រុមហ៊ុនចំនួនបីនាក់ និងទាមទារឲ្យទទួលយកតំណាងបុគ្គលិកចំនួន ៩នាក់ដែលបានបញ្ឈប់មកចូលធ្វើការវិញ។
ក្រុមអ្នកតវ៉ាអះអាងនៅថ្ងៃទី៣០ ខែតុលា ថា ក្រសួងការងារ និងក្រុមប្រឹក្សាអាជ្ញាកណ្ដាលអស់លទ្ធភាពដោះស្រាយវិវាទការងារពួកគេ ហើយការស្រែកតវ៉ាពេលនេះ គឺចង់ឲ្យថ្នាក់ដឹកនាំកំពូលៗ និងប្រមុខរដ្ឋាភិបាល ជួយអន្តរាគមន៍។
តំណាងបុគ្គលិកម្នាក់ក្នុងចំណោម ៩នាក់ ដែលត្រូវក្រុមហ៊ុនបញ្ឈប់ គឺលោក ឡា ឈុន មានប្រសាសន៍ថា រូបលោក និងបុគ្គលិកជាច្រើនទៀត នឹងបន្តការតវ៉ារាល់ថ្ងៃ ឬអាចដាក់ញត្តិទៅខុទ្ទកាល័យរបស់លោកនាយករដ្ឋមន្ត្រី និងតំណាងសហភាពអឺរ៉ុប។ លោកបន្តថា ប្រសិនបើក្រុមហ៊ុននៅតែជម្នះចង់ទុកអ្នកគ្រប់គ្រង និងមន្ត្រីជាន់ខ្ពស់ទាំងបីនាក់ ដែលធ្លាប់ប្រើហិង្សាលើបុគ្គលិកនោះ គឺរូបលោក និងបុគ្គលិកជាង ១០០នាក់ នឹងឈប់ធ្វើការ ហើយក្រុមហ៊ុនត្រូវតែទូទាត់ប្រាក់អតីតភាពការងារតាមផ្លូវច្បាប់៖ «ក្នុងអំឡុងពេលមានរឿង ក្រុមហ៊ុនបែរជាយកបុគ្គលិកចូលថ្មីទាំងអស់ ឥឡូវចេញពេញហើយ សុទ្ធតែបុគ្គលិកថ្មីទាំងអស់ អ៊ីចឹងសូមឲ្យខាងភាគីពាក់ព័ន្ធណាមួយជួយពិចារណារឿងហ្នឹងផង។ ធ្វើហ្នឹងខុសច្បាប់ទៀត គេហាមថាមានបញ្ហាហាមរើសបុគ្គលិកចូល តែក្រុមហ៊ុនអត់ស្ដាប់នរណាទាំងអស់ ក្រុមប្រឹក្សាអាជ្ញាកណ្ដាលក៏អត់ស្ដាប់ ភាគីពាក់ព័ន្ធក៏អត់ស្ដាប់ មិនដឹងស្ដាប់ពីណាគេ អ៊ីចឹងក្រុមហ៊ុនវានៅលើក្រសួងការងារ ទៀត»។
ឆ្លើយតបបញ្ហានេះ នាយកគ្រប់គ្រងក្រុមហ៊ុន ទ្រូថាមអាស៊ី ប្រចាំកម្ពុជា លោក ញ៉ែម សុភៈ បដិសេធមិនអត្ថាធិប្បាយអ្វីច្រើនទេ ប៉ុន្តែលោកបង្ហើបថា ការទូទាត់ប្រាក់អតីតភាពការងារនៅលើបុគ្គលិកចំនួន ១២៨នាក់ គឺក្រុមហ៊ុនមិនអាចធ្វើទៅរួចឡើយ។ តែទោះយ៉ាងណា លោកស្វាគមន៍ចំពោះការដោះស្រាយបញ្ហាដោយសន្តិវិធីតាមផ្លូវច្បាប់ ហើយបើបុគ្គលិកនៅតែបន្តការតវ៉ាទៀត លោកនឹងសុំឲ្យតុលាការចេញដីការក្សាការពារ ដើម្បីឱ្យក្រុមអ្នកតវ៉ាចូលធ្វើការងារវិញ។
ចំណែកមន្ត្រីខណ្ឌទំនប់ទឹក ម្នាក់ ដែលថ្លែងក្នុងលក្ខខណ្ឌមិនបញ្ចេញឈ្មោះបញ្ជាក់ថា អាជ្ញាធរបានព្យាយាមសម្របសម្រួលភាគីទាំងសងខាង គឺក្រុមអ្នកតវ៉ា និងតំណាងក្រុមហ៊ុន។ អាជ្ញាធរបានប្រាប់ឲ្យបុគ្គលិកបញ្ឈប់ការតវ៉ា ដោយភាគីក្រុមហ៊ុនសុខចិត្តទទួលយកឲ្យចូលធ្វើការងារឡើងវិញ ប៉ុន្តែក្រុមអ្នកតវ៉ាមិនព្រម ប្រសិនបើក្រុមហ៊ុនមិនដកតួនាទីអ្នកគ្រប់គ្រងទាំងបីនាក់នោះចេញទេ។
បុគ្គលិកក្រុមហ៊ុន ទ្រូថាមអាស៊ី នាំគ្នាធ្វើបាតុកម្មជាបន្តបន្ទាប់ ក្រោយពីអ្នកគ្រប់គ្រងម្នាក់ឈ្មោះ ញ៉ែម សុភៈ និងមន្ត្រីជាន់ខ្ពស់ ២នាក់ទៀត គឺលោក ញ៉ែម សុភា និងលោក ទឹម ណារិន បានព្រួតគ្នាវាយបុគ្គលិកឲ្យរបួសកាលពីខែកក្កដា ឆ្នាំ២០១៤។ បន្ទាប់ពីហេតុការណ៍នោះ ក្រុមបុគ្គលិកបានដាក់ពាក្យបណ្ដឹងទៅក្រសួងការងារ ហើយបានបញ្ជូនបន្តទៅដល់ដៃក្រុមប្រឹក្សាអាជ្ញាកណ្ដាល។
ក្រោយមក ក្រុមប្រឹក្សាអាជ្ញាកណ្ដាលបានចេញសេចក្ដីបញ្ជាមួយ ឲ្យអ្នកតវ៉ាទាំងអស់ត្រឡប់ចូលធ្វើការវិញ រង់ចាំរហូតដល់នីតិវិធីនៃអាជ្ញាកណ្ដាលត្រូវបញ្ចប់សព្វគ្រប់តាមនីតិវិធីច្បាប់។ ក្រុមបុគ្គលិក បានចូលធ្វើការវិញតាមបញ្ជា ប៉ុន្តែភាគីក្រុមហ៊ុនបានបញ្ឈប់បុគ្គលិកនៅអំឡុងពេលនៃដំណើរការនីតិវិធីនោះ ទើបក្រុមប្រឹក្សាអាជ្ញាកណ្ដាលនិរាករណ៍ចោលសេចក្ដីបញ្ជានោះ ហើយក្រុមបុគ្គលិកក៏ចាប់ផ្ដើមតវ៉ាជាថ្មីទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។