សកម្មភាពធ្វើកូដកម្មរបស់បុគ្គលិកកម្មករ ដើម្បីទាមទារដំឡើងប្រាក់ខែនៅប្រទេសកម្ពុជាបច្ចុប្បន្ន ចេះតែមានជាបន្តបន្ទាប់ ជាពិសេសកម្មករនៅតាមបណ្ដារោងចក្រកាត់ដេរសំលៀកបំពាក់ និងដេរស្បែកជើង។ ឥឡូវនេះ ការធ្វើកូដកម្មដូចគ្នា បានរាលដាលដល់បុគ្គលិកកម្មករចាក់សាំង នៅស្ថានីយប្រេងឥន្ធនៈទៀត។
បុគ្គលិកអ្នកចាក់សាំងឱ្យក្រុមហ៊ុនប្រេងឥន្ធនៈ កាល់តិច (Caltex) គ្រប់ស្ថានីយនៅរាជធានីភ្នំពេញ ប្រមាណ ២ ទៅ ៣០០នាក់ ក្នុងចំណោម ៥៣៥នាក់ នាំគ្នាធ្វើកូដកម្មទាមទារដំឡើងប្រាក់ខែគោល ១៦០ដុល្លារ នៅថ្ងៃទី១២ ឧសភា។
បុគ្គលិកធ្វើកូដកម្មមួយរូបនៅស្ថានីយបឹងកេងកង លោក ជូ វណ្ណា ឱ្យដឹងថា ការធ្វើកូដកម្មនេះ គឺបន្ទាប់ពីការចរចារកប្រាក់អត្ថប្រយោជន៍របស់បុគ្គលិកជាមួយក្រុមហ៊ុនមិនមានដំណោះស្រាយសមស្រប៖ «ចរចាសុំតាំងពីខែ២។ ខែ២ ដាក់ទៅក្រុមហ៊ុន ម្ដងឆ្លើយថាឯណេះ ម្ដងថាឯណោះ។ រង់ចាំតាំងពីខែ២ រហូតដល់ខែ៣ គេថា ចាំមើលរដ្ឋាភិបាល។ រដ្ឋាភិបាលឱ្យប៉ុន្មាន ក្រុមហ៊ុននឹងដាក់ទៅប៉ុណ្ណឹង។ ប៉ុន្តែក្រុមហ៊ុនអត់បានគោរពតាមពាក្យសន្យាទេ។ រដ្ឋាភិបាលដំឡើងខែ ១ ក្រុមហ៊ុនដំឡើងខែ ៤ តែដំឡើងហ្នឹងខ្ញុំអត់បានកំណត់ថាពេញចិត្តនឹងយកទេ។ ប៉ុន្តែក្រុមហ៊ុនដាក់មកឱ្យយើងទទួលយក»។
លោក ជូ វណ្ណា បន្តថា ក្រុមហ៊ុនកាត់ប្រាក់ខែទី១៣ ឬប្រាក់រង្វាន់ តាំងពីឆ្នាំ២០០៨ មក។
បុគ្គលិកមួយរូបទៀត គឺលោក ឈួន សុភ័ណ្ណារ៉ា ថ្លែងថា ពួកគាត់ទាមទារប្រាក់អត្ថប្រយោជន៍មួយចំនួនដែលក្នុងចំណោមនោះ ទាមទារ ៣ចំណុចសំខាន់ គឺទីមួយ ឱ្យក្រុមហ៊ុនដំឡើងប្រាក់ខែដល់ ១៦០ដុល្លារ ទីពីរទាមទារប្រាក់ខែបន្ថែម ១ខែក្នុងមួយឆ្នាំ និងទីបី ទាមទារប្រាក់ជប់លៀងប្រចាំឆ្នាំ ដែលធ្លាប់មាន ហើយត្រូវក្រុមហ៊ុនកាត់វិញ ចាប់តាំងពីឆ្នាំ២០០៨ មក។
លោក សុភ័ណ្ណារ៉ា ឱ្យដឹងថា ក្នុងពេលតវ៉ានៅពេលព្រឹក ប្រធានតំបន់នៃក្រុមហ៊ុនកាល់តិច បានជួបចរចាជាមួយពួកលោក ដើម្បីឱ្យចូលធ្វើការវិញ ក៏ប៉ុន្តែពួកលោកមិនព្រម៖ «គាត់មកជួបពួកខ្ញុំ គាត់ចង់ឱ្យពួកខ្ញុំបើកលក់វិញ។ គាត់ថា ខាងគេ គេដឹងហើយ។ ខាងក្រុមហ៊ុនថា គេនឹងចាត់វិធានការ។ ប៉ុន្តែពួកខ្ញុំអត់យល់ស្របទេ ដោយសារបើសិនជាក្រុមហ៊ុនគេយល់ស្របគេទទួលសំណើពួកខ្ញុំ គឺគួរតែទៅជួបខាងតំណាងរបស់ខ្ញុំ គឺខាងសហជីព។ មិនមែនមកជួបពួកខ្ញុំថា ខាងនេះយល់ព្រមខាងនោះយល់ព្រមទេ។ ដល់អ៊ីចឹងពួកខ្ញុំអត់ជឿទេ។ ទាល់តែខាងសហជីព តំណាងពួកខ្ញុំគេថា អូខេ គេចរចាហើយថា យ៉ាងម៉េចអីយ៉ាងម៉េច បានពួកខ្ញុំអូខេតាមហ្នឹង»។
នៅថ្ងៃដដែលនេះ សហភាពសហជីពកម្ពុជា ចេញសេចក្ដីថ្លែងការណ៍មួយគាំទ្រការធ្វើកូដកម្មរបស់បុគ្គលិកចាក់សាំងក្រុមហ៊ុនកាល់តិច។ ប្រធានសហភាពសហជីពកម្ពុជា លោក រ៉ុង ឈុន ថ្លែងថា សហភាពសហជីពលោកចូលរួមលើកទឹកចិត្តបុគ្គលិកទាំងនោះ ហើយជំរុញឱ្យធ្វើកូដកម្មដោយសន្តិវិធី និងបន្តរហូតដល់មានដំណោះស្រាយ។
លោក រ៉ុង ឈុន៖ «ខ្ញុំមានជំនឿជឿជាក់ថា នឹងមានដំណោះស្រាយក្នុងពេលឆាប់ៗ នេះ ហើយសុំឱ្យក្រុមហ៊ុនកាល់តិច ហ្នឹងត្រូវពិនិត្យពិចារណាឡើងវិញ ហើយនឹងផ្ដល់ដំណោះស្រាយ ពីព្រោះក្រុមហ៊ុនកាល់តិច ជាក្រុមហ៊ុនមួយមកពីសហរដ្ឋអាមេរិក។ ដូច្នេះហើយ ត្រូវតែពិនិត្យមើលលក្ខខណ្ឌការងារ ត្រូវតែគោរពទៅតាមច្បាប់ការងារ ហើយគិតគូរអំពីប្រាក់ឈ្នួលឱ្យបានសមរម្យ។ យើងគិតថា ការទាមទារ ១៦០ដុល្លារនេះ មិនជាហួសហេតុនោះទេ បើគ្រាន់តែចង់បានការរស់នៅមួយសមរម្យថ្លៃថ្នូរជាមនុស្សតែប៉ុណ្ណឹង»។
ក្រុមបុគ្គលិកដែលធ្វើកូដកម្មឱ្យដឹងថា ពួកគាត់បច្ចុប្បន្នបានទទួលប្រាក់ខែគោលចន្លោះពី ១១០ដុល្លារ ទៅ ១៣០ដុល្លារ គឺតាមតួនាទីជាអ្នកគិតលុយ និងអ្នកចាក់សាំង។ ពួកគាត់បន្តថា ការតវ៉ាដំឡើងប្រាក់ខែដូច្នេះ ក៏ព្រោះទំនិញឡើងថ្លៃ។
ទាក់ទងនឹងការធ្វើកូដកម្មនេះ មន្ត្រីទំនាក់ទំនងសាធារណៈក្រុមហ៊ុនកាល់តិច នៅភ្នំពេញមួយរូប គឺអ្នកស្រី ថាន ចាន់លេក ថ្លែងថា អ្នកស្រីមិនទាន់អាចធ្វើអត្ថាធិប្បាយបានទេ នៅថ្ងៃច័ន្ទ ទី១២ ឧសភា។
តំណាងសហព័ន្ធសហជីពកម្មករផ្នែកចំណីអាហារ និងសេវាកម្មកម្ពុជា ក្រុមហ៊ុនព្យាយាមជួបចរចាជាមួយតំណាងកម្មករប្រចាំក្រុមហ៊ុន ប៉ុន្តែកម្មករមិនព្រម ព្រោះការចរចានោះមិនមានតំណាងសហព័ន្ធចូលរួម។ ក្រុមបុគ្គលិកកម្មករ ដែលធ្វើកូដកម្មថ្លែងថា ពួកគាត់នឹងបន្តការទាមទារនេះរហូតទាល់តែមានដំណោះស្រាយទើបឈប់។
ព័ត៌មានចុងក្រោយដែលយើងទើបទទួលបានតាមរយៈអ៊ីម៉េលឆ្លើយតបរបស់អ្នកជំនាញទំនាក់ទំនងនិងសាខាក្រុមហ៊ុន ឈេហ្វរ៉ុន កម្ពុជា (Chevron Cambodia) ដែលគ្រប់គ្រងស្ថានីយប្រេងឥន្ធនៈកាល់តិច គឺអ្នកស្រី ថាន ចាន់លេក បានសរសេរថា ក្រុមហ៊ុន ឈេហ្វរ៉ុន កំពុងធ្វើការជាមួយអាជ្ញាធរមូលដ្ឋាន និងតំណាងសហជីព ដើម្បីដោះស្រាយវិវាទការងារ ដែលបណ្ដាលឱ្យបិទសេវា កាល់តិច មួយចំនួនជាបណ្ដោះអាសន្ន។
អ៊ីម៉េលសរសេរបន្តថា ក្រុមហ៊ុនខកចិត្ត ពេលដែលសហការីសហជីពនៅតាមស្ថានីយ ធ្វើសកម្មភាពនាំគ្នាឈប់ភ្លាមៗ យ៉ាងគំហុក ជាជាងការដោះស្រាយតាមនីតិវិធី ដើម្បីឱ្យក្រុមហ៊ុនអាចបន្តផ្ដល់ប្រេងឥន្ធនៈ និងកាត់បន្ថយការលំបាកដល់សាធារណជន។
ក្រុមហ៊ុនរក្សាអាទិភាពរបស់ខ្លួន ក្នុងការដោះស្រាយបញ្ហានេះឱ្យបានឆាប់ ដោយសុវត្ថិភាព និងប្រកបដោយភាពស្រុះស្រួលគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។