ក្រុមអង្គការមិនមែនរដ្ឋាភិបាលទាំងនោះបានរិះគន់ថា សមត្ថកិច្ចរបស់រដ្ឋបានបាត់បង់អព្យាក្រឹត និងខ្វះវិជ្ជាជីវៈក្នុងបំពេញតួនាទីរបស់ខ្លួន ដើម្បីការពារប្រយោជន៍ពលរដ្ឋ។ ស្របគ្នានោះ បានរិះគន់ចំៗចំពោះកាកបាទក្រហមកម្ពុជាថា បានព្រងើយកន្តើយ មិនអើពើផ្ដល់ជំនួយដល់ពលរដ្ឋក្នុងនាមខ្លួនជាអង្គការមនុស្សធម៌។ យ៉ាងណា មន្ត្រីកាកបាទក្រហមកម្ពុជា អះអាងថា សមាគមនេះធ្វើការតាមតួនាទីដែលបានកំណត់។
មន្ត្រីកាកបាទក្រហមកម្ពុជា ច្រានចោលការការរិះគន់របស់ក្រុមអង្គការមិនមែនរដ្ឋាភិបាលដែលថា កាកបាទក្រហមបានព្រងើយកន្តើយក្នុងការផ្ដល់ការគាំពារដល់ពលរដ្ឋដែលចូលរួមមហាបាតុកម្មដឹកនាំដោយគណបក្សសង្គ្រោះជាតិ ដោយបញ្ជាក់ថា ស្ថាប័ននេះបំពេញការងារតាមតម្រូវការរបស់ស្ថាប័នសាធារណៈរបស់រដ្ឋ។
មន្ត្រីកាកបាទក្រហម លោក អ៊ុយ សំអាត មានប្រសាសន៍នៅរសៀលថ្ងៃទី១៨ ខែកញ្ញា ថា កាកបាទក្រហមពុំមានតួនាទីណាមួយឡើយ ប្រសិនបើស្ថាប័នសាធារណៈរបស់រដ្ឋពុំបានស្នើឡើងទេនោះ។
ការបញ្ជាក់របស់មន្ត្រីកាកបាទក្រហម គឺបន្ទាប់ពីក្រុមអង្គការមិនមែនរដ្ឋាភិបាលឃ្លាំមើលស្ថានការណ៍នៅក្រោយការបោះឆ្នោតថ្លែងការណ៍រួមគ្នាកាលពីថ្ងៃទី១៧ ខែកញ្ញា ថារាជរដ្ឋាភិបាល រួមទាំងកាកបាទក្រហមកម្ពុជាផង មិនបានផ្ដល់សេវាចាំបាច់ដល់ក្រុមបាតុករឡើយ។ សេវាទាំងនោះមានដូចជា សេវាផ្ដល់ព័ត៌មាន សេវាជំនួយសង្គ្រោះបន្ទាន់ សង្គ្រោះបឋមដល់ជនរងគ្រោះជាបាតុករ និងពលរដ្ឋដែលរងប៉ះពាល់ពីព្រឹត្តិការណ៍ប្រឈមនានា។ ពួកគេបានទទូចឲ្យរាជរដ្ឋាភិបាល និងភាគីពាក់ព័ន្ធមានការទទួលខុសត្រូវខ្ពស់បំផុតពីសុខទុក្ខរបស់ប្រជាពលរដ្ឋទូទៅដោយមិនប្រកាន់និន្នាការនយោបាយ ហើយពង្រឹងសេវាសាធារណៈឲ្យមានប្រសិទ្ធភាពបំផុត។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា កាកបាទក្រហម និងស្ថាប័នសាធារណៈរបស់រដ្ឋដទៃទៀត គួរជួយគាំពារដល់ពលរដ្ឋដោយមិនរើសមុខឡើយ។
ក្រុមអង្គការមិនមែនរដ្ឋាភិបាលបានលើកសរសើរពីសកម្មជន និងអ្នកស្ម័គ្រចិត្តជាច្រើនរយនាក់របស់អង្គការ សមាគមមិនមែនរដ្ឋាភិបាលដែលបានចូលរួមផ្ដល់សេវាដល់ជនរងគ្រោះ រួមទាំងសេវាទាំងសេវាសង្គ្រោះបឋម ធ្វើយុទ្ធនាការអហិង្សាដើម្បីសន្តិភាព និងកិច្ចសហការជំនួយមនុស្សធម៌ដល់គ្រួសារ និងជនរងគ្រោះដោយគ្មានការរើសអើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។