អគ្គនាយកនៃអគ្គនាយកដ្ឋានអធិការកិច្ចក្រសួងសុខាភិបាលថៃ លោក ថាវ៉ាត់ឆៃ (Thawatchai) ត្រូវបានសារព័ត៌មានថៃ ឈ្មោះ បើណាម៉ា (Bernama) ស្រង់សម្ដីចុះផ្សាយកាលពីថ្ងៃទី២៣ កក្កដា និយាយថា ពេទ្យកម្ពុជា និងថៃ នឹងធ្វើការរួមគ្នានៅតាមខ្សែបន្ទាត់ព្រំដែនរបស់ប្រទេសទាំងពីរតាមរយៈការកសាងមន្ទីរពេទ្យក្នុងពេលដ៏ឆាប់ខាងមុខ។ លោកបន្តថា កិច្ចប្រតិបត្តិការនេះ នឹងជួយកាត់បន្ថយការចំណាយខ្ពស់របស់ពលរដ្ឋកម្ពុជា ហើយសេវានៃការព្យាបាលមានជាអាទិ៍ផ្ដោតទៅលើជំងឺគ្រុនចាញ់ជាដើម។
លោក ទ្រី ណារិន្ទ អភិបាលខេត្តបន្ទាយមានជ័យ មានប្រសាសន៍នៅថ្ងៃទី២៤ កក្កដា ថា កិច្ចព្រមព្រៀងនេះនៅមិនទាន់ចូលជាផ្លូវការនៅឡើយទេ។ លោកបន្តថា ហេតុនេះដំណើរការនៃការសាងសង់មន្ទីរពេទ្យដែលនឹងអនុវត្តដូចការគ្រោងទុកនោះ នៅមិនប្រាកដនៅឡើយដែរ។ ក៏ប៉ុន្តែលោកបញ្ជាក់ថា ក្រោយពីឆ្លងកាត់កិច្ចពិគ្រោះយោបល់ក្នុងដំណាក់កាលបន្ទាប់រួច ទំនងជាគម្រោងនេះអាចអនុវត្តក្នុងអំឡុងចន្លោះខែសីហា ឬ ខែកញ្ញា។
ទីភ្នាក់ងារព័ត៌មានថៃ ឈ្មោះ ធី.អិន.អេ (TNA) ដែលស្រង់សម្ដីរបស់លោក ថាវ៉ាត់ឆៃ មកចុះផ្សាយឲ្យដឹងដែរថា មន្ទីរពេទ្យដែលនៅជាប់ព្រំដែនកម្ពុជា-ថៃ មានឈ្មោះថា មន្ទីរពេទ្យ សាកែវ (Sa Kaeo Hospital) មន្ទីរពេទ្យ ប្រា ភើកក្លៅ ចាន់បូរី (Phra Pok Klao Chanthaburi Hospital) មន្ទីរពេទ្យ ត្រាត (Trat Hospital) មន្ទីរពេទ្យបន្ទាយមានជ័យ (Banteay Meanchey Hospital) មន្ទីរពេទ្យ បាត់ដំបង (Battambang Hospital) និង មន្ទីរពេទ្យ កោះកុង (Koh Kong Hospital)។
តាមការគ្រោងទុក ប្រទេសថៃ នឹងសាងសង់មន្ទីរពេទ្យចំនួន ៧ ទីតាំង ចំពោះខេត្តដែលនៅជាប់ព្រំដែននៃប្រទេសកម្ពុជា ហើយនៅតាមមន្ទីរពេទ្យទាំងនេះ នឹងផ្ដល់សេវាព្យាបាលដោយមិនយកថ្លៃពីពលរដ្ឋកម្ពុជា ដែលមានកម្រិតជីវភាពក្រីក្រនោះទេ។
កាលពីពាក់កណ្ដាលខែកក្កដា មន្ត្រីថ្នាក់ខេត្តនៅជាប់ព្រំដែនកម្ពុជា-ថៃ បានបើកកិច្ចពិគ្រោះយោបល់ ដើម្បីធ្វើសេចក្ដីព្រាងក្នុងខេត្តសៀមរាប និងជំនាញពាក់ព័ន្ធ មុននឹងចុះកិច្ចព្រមព្រៀងបង្កើតមន្ទីរពេទ្យដូចការគ្រោងទុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។