ដូចការគ្រោងទុក ពលរដ្ឋខ្មែររស់នៅសាធារណរដ្ឋកូរ៉េខាងត្បូង ជាង ៥០០នាក់ ធ្វើបាតុកម្មអហិង្សានៅទីក្រុងសេអ៊ូល (Seoul) នៅថ្ងៃទី៧ ធ្នូ ដោយសំដែងមតិ និងដាក់ញត្តិទាមទារឲ្យរដ្ឋាភិបាលកម្ពុជា ដោះលែងព្រះសង្ឃ សកម្មជនដីធ្លី និងសកម្មជននយោបាយសរុប ១៩នាក់ ឲ្យមានសេរីភាព និងដោះស្រាយបញ្ហាអយុត្តិធម៌មួយចំនួន ដែលកើតឡើងនៅកម្ពុជា។ មន្ត្រីរដ្ឋាភិបាលបញ្ជាក់ថា អ្វីដែលពួកគេធ្វើនោះ មិនមានផលរមាស់ដល់រដ្ឋាភិបាលឡើយ។
ឯកអគ្គរាជទូតខ្មែរប្រចាំកូរ៉េខាងត្បូង លោក ស៊ុត ឌីណា ហៅការធ្វើបាតុកម្មរបស់ពលរដ្ឋខ្មែរនៅប្រទេសកូរ៉េខាងត្បូង ដើម្បីទាមទារឲ្យដោះលែងមនុស្ស ១៩នាក់ចេញពីពន្ធនាគារ ថាជាចេតនាបង្ខូចកេរ្តិ៍ឈ្មោះរាជរដ្ឋាភិបាល។
ក្រោមសីតុណ្ហភាពត្រជាក់ដក៨អង្សាសេ នៅទីក្រុងសេអ៊ូល ពលករខ្មែរ សិស្សនិស្សិត និងស្ត្រីខ្មែររៀបការប្តីជនជាតិកូរ៉េជាង ៥០០នាក់ ជួបជុំគ្នានៅចុងកាក់ ដើម្បីសំដែងមតិពីទុក្ខកង្វល់របស់ពួកគេចំពោះបញ្ហាអយុត្តិធម៌មួយចំនួននៅកម្ពុជា។
"តុលាការត្រូវតែឯករាជ្យ" "ពួកយើងស្អប់ខ្ពើមរបបផ្ដាច់ការនៅកម្ពុជា" គឺជាពាក្យស្លោកដែលក្រុមអ្នកតវ៉ាលើកដើម្បីជាសារមួយផ្ញើទៅដល់រដ្ឋាភិបាល។
ប្រធានចលនាយុវជនខ្មែរដើម្បីលទ្ធិប្រជាធិបតេយ្យប្រចាំសាធារណរដ្ឋកូរ៉េ លោក យឹម ស៊ីណន ឲ្យដឹងពីប្រទេសកូរ៉េថា ក្នុងញត្តិទាមទាររបស់ពួកគេដែលដាក់ជូនមន្ត្រីស្ថានទូតខ្មែរប្រចាំកូរ៉េ ទាមទារឲ្យរដ្ឋាភិបាលយកចិត្តទុកដាក់ពង្រឹងច្បាប់ស្ដីពីអាពាហ៍ពិពាហ៍រវាងពលរដ្ឋខ្មែរជាមួយបុរសជនជាតិកូរ៉េ និងស្រាវជ្រាវបន្ថែមជុំវិញករណីមានពលករខ្មែរស្លាប់នៅប្រទេសកូរ៉េច្រើន ក្នុងរយៈពេលចុងក្រោយនេះ ពិសេសស្នើសុំឲ្យរដ្ឋាភិបាលដោះលែងមនុស្ស ១៩នាក់ដែលកំពុងជាប់ឃុំ៖ «នៅកម្ពុជាយើងទាមទារឲ្យដោះលែងសកម្មជនដែលជាប់ឃុំឃាំងជាបន្ទាន់ ដោយគ្មានលក្ខខណ្ឌ។ មានចំណុចផ្សេងទៀតជាង ១០ចំណុច។ នៅប្រទេសកូរ៉េ យើងទាមទារឲ្យនាយករដ្ឋមន្ត្រីខ្មែរជួយពិភាក្សាបញ្ហាពលករខ្មែរធ្វើការខុសច្បាប់នៅទីនេះ ឲ្យពួកគាត់មានសិទ្ធិធ្វើការដោយស្របច្បាប់»។
ឯកអគ្គរាជទូតខ្មែរប្រចាំកូរ៉េខាងត្បូង លោក ស៊ុត ឌីណា មិនបានចូលរួមតបតាមការអញ្ជើញរបស់ក្រុមអ្នកតវ៉ាដើម្បីជាទទួលញត្តិជាផ្លូវការនោះទេ។ ប៉ុន្តែលោក ស៊ុត ឌីណា ដែលជាមេដឹកនាំយុវជនដ៏ខ្លាំង ធ្លាប់ជាតួអង្គប្រឆាំងនឹងការដឹកនាំរបស់គណបក្សប្រជាជនកម្ពុជា យ៉ាងស្រួចស្រាល់កាលពីជាង ១០ឆ្នាំមុននោះ បែរជាដើរឆ្វែលក្រៅពិធី ហើយឃ្លាំមើលសកម្មភាពក្រុមបាតុករទៅវិញ។
លោក ស៊ុត ឌីណា ពន្យល់ថា ការឃ្លាំមើលសកម្មភាពក្រុមបាតុករទាំងនោះ ព្រោះវាគឺជាកាតព្វកិច្ចរបស់លោក ក្រែងក្រុមបាតុករធ្វើឲ្យប៉ះពាល់ដល់សណ្ដាប់ធ្នាប់នៅប្រទេសកូរ៉េ។ លោកបញ្ជាក់ថា លោកមិនបានទទួលញត្តិពីក្រុមអ្នកតវ៉ាទាំងនោះទេ។ លោកសំដែងការសោកស្តាយចំពោះការសម្រេចចិត្តធ្វើបាតុកម្មរបស់ក្រុមអ្នកតវ៉ាដែលលោកគិតថា អ្នកតវ៉ាទាំងនោះគឺជាក្រុមគណបក្សប្រឆាំងដែលធ្វើសកម្មភាពកេងចំណេញនយោបាយ៖ «ចង់បង្ខូចកេរ្តិ៍ឈ្មោះប្រមុខរដ្ឋាភិបាល វាមិនអាចទៅរួចទេ»។
ថ្វីបើមានការអះអាងពីលោក ស៊ុត ឌីណា បែបនេះក្តី ក៏ក្រុមអ្នកតវ៉ាបញ្ជាក់ថា ពួកគេធ្វើបាតុកម្មនោះមិនជាប់ពាក់ព័ន្ធបញ្ហានយោបាយឡើយ។ ផ្ទុយទៅវិញ ពួកគេចង់លើកយកបញ្ហាអយុត្តិធម៌នានាដែលកំពុងកើតមាននៅក្នុងប្រទេសកម្ពុជា ដាក់ទៅលោកនាយករដ្ឋមន្ត្រី ហ៊ុន សែន តាមរយៈឯកអគ្គរាជទូតខ្មែរប្រចាំប្រទេសកូរ៉េ ដើម្បីឲ្យដោះស្រាយបញ្ហាទាំងនោះជូនពលរដ្ឋ។
តាមគម្រោង លោកនាយករដ្ឋមន្ត្រី ហ៊ុន សែន នឹងធ្វើដំណើរទៅប្រទេសកូរ៉េខាងត្បូង ចាប់ពីថ្ងៃទី១១ ដល់ថ្ងៃទី១៤ ខែធ្នូ ដើម្បីចូលរួមកិច្ចប្រជុំកំពូលរំលឹកខួបអនុស្សាវរីយ៍ ២៥ឆ្នាំ នៃទំនាក់ទំនងដៃគូអាស៊ាន-សាធារណរដ្ឋកូរ៉េ។
ប្រធានចលនាយុវជនខ្មែរដើម្បីលទ្ធិប្រជាធិបតេយ្យប្រចាំសាធារណរដ្ឋកូរ៉េ លោក យឹម ស៊ីណន បញ្ជាក់ថា ប្រសិនបើសំណើរបស់ពួកគេមិនទៅដល់ដៃលោកនាយករដ្ឋមន្ត្រី ហ៊ុន សែន ឬគ្មានការឆ្លើយតបណាមួយនោះ ពលរដ្ឋខ្មែរដែលរស់នៅប្រទេសកូរ៉េខាងត្បូង នឹងធ្វើការជួបជុំគ្នាម្ដងទៀតនៅថ្ងៃទី១៤ ធ្នូ គឺចំពេលដែលលោកនាយករដ្ឋមន្ត្រី កំពុងស្ថិតនៅក្នុងប្រទេសកូរ៉េ តែម្ដង។
មនុស្ស ១៩នាក់ដែលពលរដ្ឋខ្មែររស់នៅប្រទេសកូរ៉េខាងត្បូង ធ្វើបាតុកម្មទាមទារឲ្យរដ្ឋាភិបាលដោះលែងចេញពីពន្ធនាគារនោះ បច្ចុប្បន្ននៅសល់តែ ១៨នាក់ទេ ដោយសារលោក លី ស្រ៊ាងខេង ត្រូវបានចៅក្រមសាលាដំបូងរាជធានីភ្នំពេញ សម្រេចដោះលែងឲ្យនៅក្រោមការឃ្លាំមើលរបស់តុលាការ កាលពីថ្ងៃសុក្រ ទី៥ ខែធ្នូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។