អង្ករកម្ពុជា ជាប់ចំណាត់ថ្នាក់លេខ១ ជាប្រភេទអង្ករក្រអូបឈ្ងុយឆ្ងាញ់ជាងគេក្នុងពិភពលោក សម្រាប់ឆ្នាំ២០១៤ នេះ។
ក្នុងការប្រកួតប្រជែងអង្ករពិភពលោកលើកទី៦ កាលពីថ្ងៃទី២០ ខែវិច្ឆិកា នៅរាជធានីភ្នំពេញ មានប្រឡងដាក់ឲ្យភ្លក់រសជាតិបាយចំនួន ២៥ប្រភេទពីប្រទេសចំនួន១៥ រួមមានប្រទេសកម្ពុជា ថៃ វៀតណាម ឥណ្ឌា ភូមា ជាដើម ដែលរៀបចំឡើងដោយសហព័ន្ធអង្ករកម្ពុជា (Cambodia Rice Federation)។ ក្នុងការប្រកួតប្រជែងនោះ អង្ករថៃ ក៏ទទួលបានចំណាត់ថ្នាក់លេខ១ ដែរ។
ប្រធានផ្នែកប្រតិបត្តិការនៃសហគ្រាសសេដាក (CEDAC) លោក ស៊ូ សាវ៉ន ដែលបានអញ្ជើញចូលរួមក្នុងការប្រកួតប្រជែងរសជាតិអង្ករសម្រាប់ឆ្នាំ២០១៤ នេះ មានប្រសាសន៍កាលពីយប់ថ្ងៃទី២០ វិច្ឆិកា ថា អង្ករខ្មែរក្រអូបផ្ការំដួល បានទទួលចំណាត់ថ្នាក់លេខ១ ចំនួន ៣ឆ្នាំជាប់ៗគ្នា ចាប់ពីឆ្នាំ២០១២ ដល់ឆ្នាំ២០១៤ នេះ៖ «នេះគេហៅថា Rice World Trader គឺគេធ្វើឡើងជាទូទៅនៅក្នុងតំបន់អាស៊ី។ ឆ្នាំទៅគេធ្វើនៅហុងកុង ខ្មែរយើងបានលេខ១ ដែរ។ ឆ្នាំនេះធ្វើនៅកម្ពុជា ខ្មែរយើងបានលេខ១ដូចថៃ ដែរ។ មានអ្នកដាក់ពិន្ទុចំនួន ៣រូប ទី១ អ្នកចម្អិនអាហារដែលល្បីជាងគេក្នុងពិភពលោក គាត់មកពីកាលីហ្វរនីញ៉ា (California) ដែលជាប្រធានក្រុមអ្នកឲ្យពិន្ទុ។ ទី២ គឺជនជាតិបារាំង និងម្នាក់ទៀត គឺមេចុងភៅលេខ១ ប្រចាំនៅកម្ពុជា យើង...»។
មន្ត្រីសហព័ន្ធអង្ករកម្ពុជា ឲ្យដឹងថា ក្នុងអំឡុង ១០ខែឆ្នាំ២០១៤ នេះ កម្ពុជា បាននាំអង្ករចេញទៅលក់នៅក្រៅប្រទេសចំនួនជាង ៣០ម៉ឺនតោន (៣០៤.៧៨៨តោន) គិតជាទឹកប្រាក់ប្រមាណ ១៨០លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។