ក្រសួងការពារជាតិកម្ពុជា បញ្ជូនឧទ្ធម្ភាគចក្រចំនួន ៤គ្រឿង និងនាវា ២គ្រឿង ទៅជួយរកយន្តហោះម៉ាឡេស៊ី ដែលបានបាត់ដំណឹងជាង១សប្ដាហ៍កន្លងទៅ។
ក្នុងសេចក្តីប្រកាសព័ត៌មានរបស់ក្រសួងការពារជាតិ ចេញផ្សាយនៅថ្ងៃទី១៨ ខែមីនា បញ្ជាក់ថា ក្រសួងការពារជាតិកម្ពុជា ចូលរួមរំលែកទុក្ខ និងសោកស្ដាយចំពោះគ្រោះថ្នាក់នេះ។ សេចក្តីថ្លែងការណ៍បន្តថា ក្រសួងការពារជាតិកម្ពុជា បានចេញបញ្ជាគ្រប់អង្គភាពចំណុះកងទ័ពជើងគោក ជើងទឹក ជើងអាកាស បណ្ដាអង្គភាពតាមបណ្ដាកោះ នាវាល្បាតក្នុងដែនទឹក អ្នកប្រកបរបរនេសាទ កំពុងស្វែងរកសញ្ញានានាពាក់ព័ន្ធនឹងការបាត់បង់យន្តហោះនេះ។
ឧទ្ធម្ភាគចក្រទាំង ៤គ្រឿងជាប្រភេទឧទ្ធម្ភាគចក្រ Z9 និងនាវា P46។
មន្ត្រីក្រសួងការពារជាតិ បានប្រាប់អ្នកកាសែតថា នាវាទាំងពីរផ្ទុកកងទ័ពជើងទឹកចំនួន ២៥នាក់ក្នុង១នាវា។ ក្រុមរុករករបស់កម្ពុជា នឹងធ្វើការល្បាតនៅតាមបណ្ដាដែនកោះ និងដែនសមុទ្រជាប់ព្រំដែនកម្ពុជា-វៀតណាម។
យន្តហោះរបស់ក្រុមហ៊ុនអាកាសចរណ៍ម៉ាឡេស៊ី ធ្វើដំណើរពីទីក្រុងកូឡាឡាំពួរ ទៅកាន់ទីក្រុងប៉េកាំង ដោយផ្ទុកអ្នកដំណើរ និងបុគ្គលិកចំនួន ២៣៩នាក់ ហើយបានបាត់ដំណឹងតាំងពីថ្ងៃសៅរ៍ ទី៨ ខែមីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។