កម្ពុជា-ស៊ែប ពង្រឹង​កិច្ច​សហប្រតិបត្តិការ​ពាណិជ្ជកម្ម

រដ្ឋមន្ត្រី​ក្រសួង​ការ​បរទេស​កម្ពុជា លោក ហោ ណាំហុង នៅ​ថ្ងៃ​ទី២៦ ខែ​កុម្ភៈ បាន​ចុះ​ហត្ថលេខា​ទ្វេភាគី​ជាមួយ​រដ្ឋមន្ត្រី​ក្រសួង​ការ​បរទេស​នៃ​ប្រទេស​ស៊ែប (Serbia) លោក អ៊ីវ៉ាន់ ម៉ាគីក (Ivan Mrkic) លើ​អនុសារណៈ​យោគយល់​គ្នា ផ្ដោត​លើ​កិច្ច​សហប្រតិបត្តិការ​រវាង​ប្រទេស​ទាំង​ពីរ ដើម្បី​ពង្រឹង​ចំណង​ទាក់ទង​ពាណិជ្ជកម្ម យោធា និង​ការទូត ជាដើម។
ដោយ សុខ សេរី
2013-02-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ហោ ណាំហុង អ៊ីវ៉ាន់ ម៉ាគីក [Ivan Mrkic] ៣០៥
រដ្ឋមន្ត្រី​ក្រសួង​ការ​បរទេស​កម្ពុជា លោក ហោ ណាំហុង (ស្ដាំ) ជួប​ពិភាក្សា​ទ្វេភាគី​ជាមួយ​រដ្ឋមន្ត្រី​ក្រសួង​ការ​បរទេស​នៃ​ប្រទេស​ស៊ែប (Serbia) លោក អ៊ីវ៉ាន់ ម៉ាគីក [Ivan Mrkic] (ឆ្វេង) កាល​ពី​ថ្ងៃ​ទី២៦ ខែ​កុម្ភៈ ឆ្នាំ​២០១៣។
RFA/Sok Serey

កិច្ច​ព្រមព្រៀង​នោះ ត្រូវ​បាន​ចុះ​ហត្ថលេខា​នៅ​ឯ​ក្រសួង​ការ​បរទេស​កម្ពុជា នៅ​ក្នុង​អំឡុង​ពេល​ដែល​លោក អ៊ីវ៉ាន់ ម៉ាគីក កំពុង​បំពេញ​ទស្សនកិច្ច​លើក​ដំបូង​រយៈពេល ២ថ្ងៃ នៅ​ប្រទេស​កម្ពុជា តាម​ការ​អញ្ជើញ​របស់​លោក ហោ ណាំហុង។

កិច្ច​សហប្រតិបត្តិការ​ទ្វេភាគី​នោះ បាន​ផ្ដោត​លើ​ចំណុច​សំខាន់ៗ មាន​ដូច​ជា កម្ពុជា គ្រោង​នាំ​អង្ករ​ទៅ​លក់​នៅ​ទីផ្សារ​នៅ​ប្រទេស​ស៊ែប នៅ​ថ្ងៃ​អនាគត រដ្ឋមន្ត្រី​ក្រសួង​ការពារ​ជាតិ​នៃ​ប្រទេស​ស៊ែប នឹង​មក​ទស្សនកិច្ច​នៅ​កម្ពុជា នៅ​ថ្ងៃ​អនាគត ដើម្បី​ពង្រឹង​ទំនាក់​ទំនង​វិស័យ​យោធា​ជាមួយ​កម្ពុជា ភាគី​ទាំង​ពីរ​គ្រោង​ផ្លាស់​ប្ដូរ​ប្រតិភូ​ពាណិជ្ជកម្ម​ទៅ​វិញ​ទៅ​មក នៅ​ថ្ងៃ​អនាគត ផ្ដោត​លើ​ពាណិជ្ជកម្ម និង​សេដ្ឋកិច្ច។

ក្រៅ​ពី​នេះ ប្រទេស​ស៊ែប បាន​យល់​ព្រម​ផ្តល់​អាហារូបករណ៍​ដល់​និស្សិត​កម្ពុជា មួយ​ចំនួន​ទៅ​សិក្សា​នៅ​ប្រទេស​ស៊ែប នៅ​ឆ្នាំ​២០១៣ និង​ឆ្នាំ​២០១៤ ខាង​មុខ​នេះ។ មួយ​វិញ​ទៀត ប្រទេស​ស៊ែប បាន​យល់​ព្រម​លុប​បំណុល​ជាង ១​លាន​ដុល្លារ​អាមេរិក ដែល​កម្ពុជា បាន​ជំពាក់​កាល​ពី​ឆ្នាំ​១៩៦៩ កន្លង​មក។

រដ្ឋមន្ត្រី​ក្រសួង​ការ​បរទេស​កម្ពុជា លោក ហោ ណាំហុង បាន​មាន​ប្រសាសន៍​នៅ​ក្នុង​សន្និសីទ​កាសែត​រួម​គ្នា​នៅ​ក្រសួង​ការ​បរទេស​កម្ពុជា នៅ​ថ្ងៃ​ទី២៦ ខែ​កុម្ភៈ ថា ការ​ពង្រឹង​ទំនាក់​ទំនង​ពាណិជ្ជកម្ម និង​វិស័យ​ដទៃ​ទៀត​នេះ នៅ​គ្រា​ដែល​កម្ពុជា កំពុង​តែ​មាន​ស្ថិរភាព​នយោបាយ និង​សន្តិភាព​ពេញ​លេញ៖ «យើង​មាន​ស្ថិរភាព​នយោបាយ យើង​មាន​របប​ប្រជាធិបតេយ្យ​ពហុបក្ស យើង​មាន​ការ​គោរព​សិទ្ធិ​មនុស្ស»

ជាមួយ​គ្នា​នេះ កម្ពុជា ក៏​បាន​គាំទ្រ​បេក្ខភាព​នៃ​ប្រទេស​ស៊ែប ឲ្យ​ក្លាយ​ជា​ដៃគូ​មិត្តភាព និង​សហប្រតិបត្តិការ​ជាមួយ​អាស៊ាន (Asean) នៅ​ថ្ងៃ​អនាគត​ឆាប់ៗ​នេះ។ ចំណែក​ឯ​រដ្ឋមន្ត្រី​ក្រសួង​ការ​បរទេស​នៃ​ប្រទេស​ស៊ែប លោក អ៊ីវ៉ាន់ ម៉ាគីក បាន​មាន​ប្រសាសន៍​ជា​ភាសា​អង់គ្លេស ហើយ​ត្រូវ​បាន​ប្រែ​សម្រួល​ជា​ភាសា​ខ្មែរ​ថា ការ​ចុះ​ហត្ថលេខា​នៅ​ថ្ងៃ​នេះ គឺ​ជា​កិច្ច​ព្រមព្រៀង​ទី១២ ហើយ ដែល​ប្រទេស​ស៊ែប បាន​ចុះ​ហត្ថលេខា​ជាមួយ​ប្រទេស​ដទៃ​ទៀត​កន្លង​មក។

ប្រទេស​ស៊ែប បាន​ភ្ជាប់​ទំនាក់​ទំនង​ការ​ទូត​ជាមួយ​កម្ពុជា រយៈពេល ៥៧​ឆ្នាំ​មក​ហើយ តាំង​ពី​ឆ្នាំ​១៩៥៦ កន្លង​មក។ ប្រទេស​ស៊ែប នា​ពេល​នេះ​ជា​ប្រទេស​ឯករាជ្យ ក្រោយ​ពី​បាន​ផ្តាច់​ខ្លួន​ពី​ប្រទេស​យូហ្គោស្លាវី។

គេ​បាន​កត់​សម្គាល់​ថា ប្រទេស​ស៊ែប គឺ​ជា​ប្រទេស​ទី២​ហើយ នៅ​តំបន់​អឺរ៉ុប​ខាង​កើត (East Europe) ដែល​កម្ពុជា ចុះ​ហត្ថលេខា​ទ្វេភាគី​នៅ​ដើម​ឆ្នាំ​២០១៣ ដើម្បី​ពង្រឹង​ទំនាក់​ទំនង​ពាណិជ្ជកម្ម និង​សេដ្ឋកិច្ច ក្រោយ​អនុប្រធាន​សភា​ពាណិជ្ជកម្ម​កម្ពុជា លោក​ឧកញ៉ា ស៊ន សុខណា បាន​ចុះ​ហត្ថលេខា​កាល​ពី​ថ្ងៃ​ទី១១ ខែ​កុម្ភៈ កន្លង​ទៅ​នេះ ជាមួយ​ប្រធាន​សភា​ពាណិជ្ជកម្ម​នៃ​ប្រទេស​បេឡារុស្ស (Balarus) លោក ម៉ីកហៀល មីយ៉ាតលីកូវ (Mikhail Myatlikov) ដើម្បី​ពង្រឹង​ទំនាក់​ទំនង​ពាណិជ្ជកម្ម និង​សេដ្ឋកិច្ច​រវាង​ប្រទេស​ទាំង​ពីរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ពី Phnom Penh

បងប្អូនយើងដែលកំពុងធ្វើការនៅក្នុងគណបក្សប្រជាជននៅក្នុងជួររាជរដ្ធាភិបាលសព្វថ្ងៃនេះ ពួកគាត់ពីបាក់និងដក់ខ្លួនឲ្យផុតពីគ្រោះកាចនេះណាស ព្រោះថាក្រញាំដៃដែកមច្ចុរាជចោរយួន កំពុងត្របាក់លេបយកទឹកដីខ្មែរយើងតាមរយះរដ្ធាភិបាលរបស់ លោក ហ៊ុន សែន សព្វថ្ងៃនេះឯង៕

Feb 26, 2013 08:59 AM