តំបន់ព្រែកក្តាម ដែលជាទីកន្លែងសាងសង់ពហុកីឡាដ្ឋានជាតិ "មរតកតេជោ" នោះ នឹងក្លាយជាទីក្រុងរណបនៅក្នុងរយៈពេល ១០ឆ្នាំទៀតនេះ។
គម្រោងសាងសង់ពហុកីឡាដ្ឋានជាតិថ្មីនោះ គឺត្រូវចំណាយពេលវេលាសាងសង់ចំនួន ៩ឆ្នាំ នៅលើផ្ទៃដីសរុបទំហំជាង ៨៥ហិកតារ នៅគ្រាដែលកម្ពុជា គ្រោងធ្វើជាម្ចាស់ផ្ទះនៃការប្រកួតកីឡាស៊ីហ្គេម (Sea Games) នៅឆ្នាំ២០២៣។
ឯកសារនៃគម្រោងសាងសង់ បានឲ្យដឹងថា ការសាងសង់នោះ គឺចែកជា ៣ដំណាក់កាលធំៗ។ ដំណាក់កាលទី១ សាងសង់រយៈពេល ៣២ខែ មានដូចជា មណ្ឌលកីឡាក្នុងសាលធំ មណ្ឌលកីឡាហែលទឹក សាលហាត់កីឡាប្រយុទ្ធ អគារស្នាក់នៅ អាហារដ្ឋាន និងទីលានហាត់នៅក្រៅអគារ។ ថវិកាចំណាយលើគម្រោងសាងសង់ដំណាក់កាលទី១ នេះ គឺចំនួនជិត ៣៩លានដុល្លារអាមេរិក។
ដំណាក់កាលទី២ គឺសាងសង់រយៈពេល ៣៦ខែ មានដូចជា កីឡាដ្ឋានដែលនឹងបំពាក់ឧបករណ៍បរិក្ខារកីឡា ប្រព័ន្ធហេដ្ឋារចនាសម្ពន្ធ ផ្លូវបេតុង បណ្ដាញទឹកស្អាត ប្រព័ន្ធអគ្គិសនី និងសួនច្បារជាដើម។ ដំណាក់កាលទី៣ គឺសាងសង់រយៈពេល ៤០ខែ មានដូចជា សាលវេជ្ជសាស្ត្រ វិទ្យាសាស្ត្រកីឡា សាលហាត់សាច់ដុំ សាលកាយសម្ព័ន្ធ សាលកីឡាបាញ់កាំភ្លើង មជ្ឈមណ្ឌលកីឡាហុកគី និងសាលកីឡាប្រពៃណីជាដើម។
ថវិកាចំណាយលើគម្រោងសាងសង់ដំណាក់កាលទី២ និងទី៣ នេះ មិនត្រូវបានឲ្យដឹងនៅឡើយទេ ប៉ុន្តែកម្ពុជា នៅមិនទាន់មានថវិកាគ្រប់គ្រាន់នៅឡើយទេសម្រាប់គម្រោងសាងសង់ទាំងពីរដំណាក់កាលនោះ។
លោក ហ៊ុន សែន នៅក្នុងពិធីបើកការដ្ឋានសាងសង់នៅថ្ងៃទី១២ ខែមេសា បានមានប្រសាសន៍ថា ពហុកីឡាដ្ឋានជាតិ "មរតកតេជោ" នេះ គឺមានន័យថា ជាមរតកតេជោមាស មរតកតេជោយ៉ត មរតកតេជោសែន និងមរតកតេជោដំឌិន ជាដើម៖ «កម្ពុជា បានធ្វើជាម្ចាស់ផ្ទះនៃការប្រជុំកំពូលអាស៊ាន (Asean Summit) ចំនួន ២លើករួចមកហើយនៅឆ្នាំ២០០២ និងឆ្នាំ២០១២ កន្លងផុតទៅ ក៏ប៉ុន្តែកម្ពុជា មិនទាន់មានលទ្ធភាពដើម្បីធ្វើជាម្ចាស់ផ្ទះនៃការប្រកួតកីឡាស៊ីហ្គេម នោះទេ។ ដូច្នេះ មិត្តភក្ដិមានការយោគយល់អំពីបញ្ហានេះ ដោយសារតែបើពិនិត្យពីស្ថានការណ៍ប្រទេសអាស៊ានទាំង១០ គ្មានប្រទេសណាមួយដែលខ្ទេចខ្ទាំដូចជាប្រទេសកម្ពុជា យើងនេះទេ»។
អភិបាលរាជធានីភ្នំពេញ លោក កែប ជុតិមា បានមានប្រសាសន៍ថា ពហុកីឡាដ្ឋានជាតិ "មរតកតេជោ" នេះ មានសមត្ថភាពផ្ទុកមនុស្សចំនួនសរុបជាង ១សែននាក់៖ «ពហុកីឡាដ្ឋានជាតិមរតកតេជោ ត្រូវបានសិក្សាគម្រោងប្លង់ដោយក្រុមហ៊ុនស្ថាបត្យករអាស៊ីតិច សូលូសិន (Architech Solutions) ជាក្រុមសិក្សាគម្រោងប្លង់ក្នុងស្រុកប្រមូលផ្តុំដោយស្ថាបត្យករ វិស្វករ និងជំនាញខ្មែរ ប្រកបដោយចំណេះដឹង បទពិសោធន៍ខ្ពស់ ដែលត្រូវសាងសង់ដោយក្រុមហ៊ុន អិល.វាយ.ភី គ្រុប»។
ទាក់ទងនឹងការត្រៀមរៀបចំធ្វើជាម្ចាស់ផ្ទះនៃការប្រកួតកីឡាស៊ីហ្គេម នៅឆ្នាំ២០២៣ នោះ អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី១២ ខែមេសា ថា កម្ពុជា មានសក្ដានុពលនៃកីឡាចំនួន៨ នៅក្នុងចំណោមកីឡាស៊ីហ្គេម សរុបចំនួន ២២ប្រភេទ៖ «យើងមានកីឡាខាងផ្នែកកីឡាប្រយុទ្ធហ្នឹង មានច្រើន ដូចមានកីឡាតៃក្វាន់ដូ មានចំបាប់ មានវូវៀតណាម មានហូស៊ូ ហើយបានយើងមាន ថេននីស (Tennis = វាយសី) ហើយបានមានប៉េតង់ (ប៊ូល) ហើយយើងមានកីឡាផ្សេងៗទៀតដែលកំពុងតែរីកចម្រើន»។
លោក ហ៊ុន សែន ធ្លាប់បានសុំពន្យារពេលធ្វើជាម្ចាស់ផ្ទះនៃកីឡាស៊ីហ្គេម នេះជាច្រើនលើករួចមកហើយ ដោយសារតែកម្ពុជា ខ្វះថវិកាសាងសង់ពហុកីឡាដ្ឋានជាតិថ្មី នៅគ្រាដែលប្រទេសឥណ្ឌូនេស៊ី (Indonesia) បានធ្វើជាម្ចាស់ផ្ទះនៃកីឡាស៊ីហ្គេម នៅឆ្នាំ២០១១ កន្លងទៅនេះ។ ប្រទេសឡាវ បានធ្វើជាម្ចាស់ផ្ទះនៅឆ្នាំ២០០៩ កន្លងទៅនេះ និងប្រទេសភូមា ឬមីយ៉ាន់ម៉ា ធ្វើជាម្ចាស់ផ្ទះនៅឆ្នាំ២០១៣ នេះ។
កីឡាករកម្ពុជា បានប្រកួតដណ្ដើមយកមេដាយសរុបចំនួន ៥០ ក្នុងនោះមានមេដាយមាសចំនួន ៨ នៅក្នុងការប្រកួតកីឡាស៊ីហ្គេម នៅប្រទេសឥណ្ឌូនេស៊ី ឆ្នាំ២០១១ កន្លងទៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។