អ្នកបើកបររថយន្តក្រុងឲ្យក្រុមហ៊ុន កាពីតូល (Capitol) ព្រមចូលធ្វើការវិញហើយនៅថ្ងៃទី៧ ខែសីហា ដោយបារម្ភខ្លាចបាត់បង់ការងារ។ ពួកគេបានតវ៉ាដោយមិនចូលធ្វើការអស់ជាច្រើនសប្ដាហ៍ ដើម្បីឲ្យក្រុមហ៊ុននេះគោរពច្បាប់ការងារ។
អ្នកបើកបររថយន្តក្រុងឲ្យក្រុមហ៊ុន កាពីតូល ជាង ៣០នាក់ បានចូលធ្វើការវិញ បន្ទាប់ពីពួកគេត្រូវបានតុលាការរាជធានីភ្នំពេញ ចេញសេចក្តីបង្គាប់ឲ្យចូលធ្វើការ បើមិនចូលទេ នឹងអស់សិទ្ធិក្នុងការបម្រើការងារ។
តំណាងអ្នកបើកបរ លោក គង់ ប៊ុនធឿន ថ្លែងថា ពួកគាត់ព្រមផ្ដិតមេដៃចូលធ្វើការនេះ គឺគោរពតាមដីកាចំនួន២ គឺទី១ ដីកាបង្គាប់របស់ក្រុមប្រឹក្សាអាជ្ញាកណ្ដាល ឲ្យក្រុមហ៊ុន កាពីតូល ទទួលយកបុគ្គលិកកូដកម្មទាំងអស់ចូលធ្វើការ។ រីឯដីកាទី២ គឺក្រុមហ៊ុនប្ដឹងទៅតុលាការ សុំដីការក្សាការពារ ដោយកំណត់ឲ្យអ្នកបើកបរទាំងអស់ដែលធ្វើកូដកម្ម ត្រូវចូលធ្វើការវិញមិនឲ្យហួសថ្ងៃទី៧ ខែសីហា បើអ្នកណាតវ៉ាមិនព្រមចូលធ្វើការតាមថ្ងៃកំណត់ នឹងអស់សិទ្ធិបើកបរ៖ «ដោយសារតែយើងគោរពតាមដីការបស់តុលាការទេ បើសិនជាថាយ៉ាងណាយ៉ាងណីទៀត ដូចជាខាងភាគីក្រុមហ៊ុនហ្នឹង គាត់ដាក់ជាកិច្ចសន្យា ឬមួយក៏មានបទបញ្ជាអីមួយ ឬក៏មានលក្ខខណ្ឌអីផ្សេង ពួកខ្ញុំនឹងពិចារណាទៅតាមនឹងទៀត ព្រោះយើងធ្វើកុំឲ្យហួសថ្ងៃ ហួសម៉ោង។ អ៊ីចឹងម៉ោងនេះ យើងកំពុងតែនៅជុំគ្នាមកដាក់ពាក្យ ហើយយើងនឹងផ្ដិតមេដៃចូលធ្វើការវិញ»។
អ្នកបើកបររថយន្តក្រុងមួយរូបទៀត ឲ្យដឹងថា ពួកគាត់ធ្វើកូដកម្មច្រើនថ្ងៃ គឺចង់ឲ្យក្រុមហ៊ុនគោរពច្បាប់ការងារក្នុងប្រទេសកម្ពុជា។ លោកថា ពួកគាត់ធ្វើកូដកម្មអហិង្សានេះ គឺចង់ឲ្យអ្នករកស៊ីដែលប្រើមនុស្សក្នុងប្រទេសកម្ពុជា ត្រូវគោរពច្បាប់ការងារ ដូចជាឲ្យមានថ្ងៃសម្រាកប្រចាំឆ្នាំ ថ្ងៃបុណ្យជាតិ និងមានឲ្យប្រាក់រំឭកអតីតភាពការងារ ជាដើម៖ «ខ្ញុំផ្ដិតមេដៃឲ្យក្រុមហ៊ុនចូលធ្វើការវិញ។ ទី១ ខាតលុយ ប៉ុន្តែយើងបានមកវិញ គឺមានច្បាប់ការងារ»។
តំណាងក្រុមហ៊ុន កាពីតូល លោក ហូ កុកវណ្ណ ថ្លែងថា ក្រុមហ៊ុនឲ្យអ្នកបើកបរទាំងអស់ដែលក្រុមហ៊ុនមិនបានបញ្ឈប់ មកចូលធ្វើការវិញ ហើយត្រូវគោរពបទបញ្ជាផ្ទៃក្នុងថ្មីរបស់ក្រុមហ៊ុន៖ «ការតវ៉ាហ្នឹងឥឡូវឈានដល់ដំណាក់កាលមួយ ដែលថាជិតរួចស្រេចហើយ ឥឡូវខ្ញុំកំពុងតែជាប់ប្រជុំជាមួយគាត់ ដើម្បីប្រមូលគាត់ចូលធ្វើការវិញ»។
កាលពីថ្ងៃទី២២ ខែកក្កដា អ្នកបើកបររថយន្តក្រុងរបស់ក្រុមហ៊ុន កាពីតូល ជាង ៤០នាក់ ឈរតវ៉ាលើកបដានៅមុខក្រុមហ៊ុន ទាមទារសុំឲ្យក្រុមហ៊ុនគោរពច្បាប់ការងារ។ ពួកគេសុំឲ្យក្រុមហ៊ុនអនុញ្ញាតច្បាប់ឈប់សម្រាកចំនួន ១៨ថ្ងៃទៅ ២០ថ្ងៃក្នុង ១ឆ្នាំ នឹងបានឈប់នៅថ្ងៃបុណ្យជាតិផង។ ក្រៅពីនោះ ពួកគេបានទាមទារឲ្យក្រុមហ៊ុន កាពីតូល ទទួលយកអ្នកបើកបរ ៧នាក់ដែលក្រុមហ៊ុនបញ្ឈប់ ព្រោះតែពួកគេសុំបង្កើតសហជីពនៅក្នុងក្រុមហ៊ុន។
បំភ្លឺចំពោះបញ្ហានោះ លោក ហូ កុកវណ្ណ ឲ្យដឹងថា ក្រុមហ៊ុនបញ្ឈប់អ្នកបើកបរ ៧នាក់ មកពីពួកគេមិនគោរពបទបញ្ជាផ្ទៃក្នុងក្រុមហ៊ុន គឺមិនពាក់ព័ន្ធនឹងការសុំបង្កើតសហជីពទេ។ អ្នកទាំង ៧នាក់នោះ ក្រុមហ៊ុននៅតែបន្តមិនឲ្យពួកគេចូលធ្វើការដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។