សេចក្ដីថ្លែងការណ៍ចុះហត្ថលេខា លោក ជា មុនី ប្រធានសហជីពសេរីកម្មករកម្ពុជា ចុះថ្ងៃច័ន្ទ ទី៦ ខែមករា បានបញ្ជាក់ថា ការសម្រេចមិនចូលរួមប្រជុំដោះស្រាយជាមួយក្រសួងការងារ និងបណ្ដុះបណ្ដាលវិជ្ជាជីវៈ លើការតវ៉ាដំឡើងប្រាក់ខែគោល ឬការតវ៉ារបស់កម្មករ ព្រោះយល់ថា ជាជំនួបគ្មានខ្លឹមសារ។
សេចក្ដីថ្លែងការណ៍បានចាត់ទុកកិច្ចប្រជុំរវាងមន្ត្រីក្រសួងការងារ តំណាងថៅកែរោងចក្រ និងមេដឹកនាំសហជីពកម្មករ នឹងមិនមានលទ្ធផលទេ ព្រោះបើមានថ្នាក់ដឹកនាំសហជីពណាមួយក្នុងចំណោមសហជីពទាំង ៥ ត្រូវបានគេប្ដឹងទៅកាន់ស្ថាប័នតុលាការ ដើម្បីគាបសង្កត់ ឬគំរាមកំហែងនោះ។
សេចក្ដីថ្លែងការណ៍ដដែលក៏បានស្នើទៅតំណាងសមាគមរោងចក្រកាត់ដេរនៅកម្ពុជា និងថ្នាក់ដឹកនាំក្រសួងការងារ គួរអនុញ្ញាតឲ្យកម្មករ-កម្មការិនី ឈប់សម្រាកពីការងារមួយរយៈពេល ដោយមិនកាត់ប្រាក់អត្ថប្រយោជន៍ផ្សេងៗ ដើម្បីបញ្ចៀសនូវអំពើហិង្សានានា ដែលអាចនឹងកើតមានឡើងនាំឲ្យប៉ះពាល់ដល់អាយុជីវិតកម្មករ និងទ្រព្យសម្បត្តិរោងចក្រ សហគ្រាស តាមរយៈរូបភាពនៃការបង្ក្រាបផ្សេងៗ ពីសំណាក់អាជ្ញាធរមានសមត្ថកិច្ចក្រោមលេសចោទថា ជាក្រុមជនអនាធិបតេយ្យ។
បន្ថែមលើលិខិត លោក ជា មុនី ថ្លែងថា ជំនួបពិភាក្សារវាងក្រសួងការងារ និងមេដឹកនាំសហជីពដែលគាំទ្រការទាមទារដំឡើងប្រាក់ខែគោលកម្មករ អាចធ្វើទៅបានដរាបណាគ្មានការគំរាមកំហែង ឬការប្តឹងមេដឹកនាំសហជីព និងសមាគមទៅតុលាការ។
ក្រសួងការងារ កាលពីថ្ងៃទី៣ ខែមករា បានចេញលិខិតអញ្ជើញប្រជុំមេដឹកនាំសហជីពកម្មករចំនួន ៥រូប មានលោក ជា មុនី លោក អាត់ ធន់ លោក ប៉ាវ ស៊ីណា លោកស្រី ម៉ម ញឹម និងលោកស្រី យ៉ាង សោភ័ណ្ឌ ដែលតវ៉ាទាមទារដំឡើងប្រាក់ខែគោលកម្មករឆ្នាំ២០១៤ ចំនួន ១៦០ដុល្លារក្នុង១ខែនៅថ្ងៃទី៨ ខែមករា។
ក្រសួងការងារ កាលពីថ្ងៃទី៣១ ខែធ្នូ ឆ្នាំ២០១៣ បានសម្រេចដំឡើងប្រាក់ខែគោលកម្មករពី ៨០ដុល្លារ ក្នុង១ខែ ដល់ ១០០ដុល្លារ ដោយចាប់អនុវត្ត នៅថ្ងៃទី១ ខែកុម្ភៈ ឆ្នាំ២០១៤។ ប៉ុន្តែការដំឡើងនេះ ត្រូវមេដឹកនាំសហជីព និងកម្មករនៅតាមរោងចក្រកាត់ដេរ និងផលិតស្បែកជើងមួយចំនួន មិនព្រមទទួលយក និងបន្តប្រមូលផ្តុំធ្វើបាតុកម្មមិនចូលធ្វើការនៅមុខរោងចក្រ និងមានបិទផ្លូវជាតិខ្លះផង រហូតមានសកម្មភាពបង្ក្រាបដោយផ្ទុះអាវុធរបស់កងកម្លាំងចម្រុះរដ្ឋាភិបាលកាលពីថ្ងៃសុក្រ ទី៣ ខែមករា។
មន្ត្រីអង្គការការពារសិទ្ធិមនុស្ស បានឲ្យដឹងថា សកម្មភាពបង្ក្រាបដោយហិង្សាទៅលើក្រុមកម្មករផ្ដើមដោយកម្លាំងប្រដាប់អាវុធចម្រុះរដ្ឋាភិបាល កាលពីសប្ដាហ៍មុន គឺបានបណ្ដាលឲ្យកម្មករ- សិស្សសាលា និងប្រជាពលរដ្ឋខ្មែរ ស្លាប់ចំនួន ៤នាក់ និងរបួសជិត ៤០នាក់ ដោយអាជ្ញាធរចោទថា ក្រុមកម្មករបានប្រើហិង្សាទៅលើសមត្ថកិច្ច។
ព្រឹត្តិការណ៍បង្ហូរឈាមរវាងខ្មែរគ្នាឯងនេះ ប៉ុន្មានថ្ងៃមកនេះ កម្លាំងប្រដាប់អាវុធចម្រុះរបស់រដ្ឋាភិបាល បានចាប់បញ្ជូនមេដឹកនាំសហជីព តំណាងកម្មករ និងពលរដ្ឋចំនួន ២៣នាក់ដាក់ពន្ធនាគារ ដោយចោទពីបទញុះញង់បង្កឲ្យមានអសន្តិសុខសង្គម ឬអំពើហិង្សាបំផ្លិចបំផ្លាញទ្រព្យសម្បត្តិសាធារណៈ ឬក្រុមហ៊ុនជាដើម។
លោក គៀត ច័ន្ទថារិទ្ធ មន្ត្រីនាំពាក្យអគ្គស្នងការនគរបាលជាតិ នៃក្រសួងមហាផ្ទៃ បានចោទការប្រមូលផ្តុំតវ៉ារបស់ក្រុមកម្មករដំឡើងប្រាក់ខែគោល ថាធ្វើឡើងអនាធិបតេយ្យ និងបានបង្កឲ្យមានបញ្ហាវឹកវរក្នុងសង្គម ព្រមទាំងបំផ្លាញទ្រព្យសម្បត្តិរបស់វិនិយោគទុន ឬទ្រព្យសម្បត្តិសាធារណៈ។ លោកបន្តថា ការអនុវត្តរបស់កម្លាំងសមត្ថកិច្ច គឺដើម្បីរក្សាសន្តិសុខ និងស្ថិរភាពក្នុងសង្គមជាតិ។
អ្នកនាំពាក្យរូបនេះ បានឲ្យដឹងថា យុទ្ធនាការបោសសម្អាតក្រុមកម្មករអនាធិបតេយ្យ បានបណ្ដាលឲ្យកម្លាំងសមត្ថកិច្ចរងរបួសមួយចំនួន ដោយសារការគប់ដុំថ្មការបាញ់ចម្ពាមកៅស៊ូ និងការគប់ដបសាំង ទៅលើកម្លាំងចម្រុះរបស់ក្រុមជ្រុលនិយម។
លោក កេន លូ អគ្គលេខាធិការសមាគមកាត់ដេរនៅកម្ពុជា ឬហៅកាត់ ជីម៉ាក់ (GMAC) ត្រូវបានកាសែត ខេមបូឌា ដេលី (Daily) ដកស្រង់សម្តីមកចុះចេញផ្សាយនៅថ្ងៃច័ន្ទ ទី៦ ខែមករា បានប្រកាសគាំទ្រសកម្មភាពបង្ក្រាបរបស់កម្លាំងប្រដាប់អាវុធរបស់រដ្ឋាភិបាលទៅលើការប្រមូលផ្តុំតវ៉ារបស់ក្រុមកម្មករក្នុងប៉ុន្មានថ្ងៃមកនេះ។ តំណាងថៅកែរោងចក្ររូបនេះ បានបានចាត់ទុកការប្រើប្រាស់អាវុធ សម្លាប់ ឬបង្ក្រាបសកម្មភាពតវ៉ារបស់កម្លាំងប្រដាប់អាវុធចម្រុះលើកម្មករ ថាជារឿងត្រឹមត្រូវ ដើម្បីបញ្ឈប់សកម្មភាពអនាធិបតេយ្យ ដែលបង្កហិង្សាដោយគប់ដុំថ្ម ឬសកម្មភាពបំផ្លាញទ្រព្យសម្បត្តិរោងចក្រជាដើម។
ត្រង់ចំណុចនេះ លោក នី ចរិយា អនុបណ្ឌិតច្បាប់និងជាប្រធានផ្នែកអង្កេតរបស់សមាគមការពារសិទ្ធិមនុស្សអាដហុក (ADHOC)។ លោកបានរិះគន់អគ្គលេខាធិការសមាគមកាត់ដេរកម្ពុជា លោក កេន លូ ជាតំណាងឲ្យថៅកែរោងចក្រ ដែលប្រកាសគាំទ្រការបង្ហូរឈាម ផ្ដើមដោយកម្លាំងប្រដាប់អាវុធចម្រុះរដ្ឋាភិបាលទៅលើកម្មករកាលពីសប្ដាហ៍មុន។
មន្ត្រីសិទ្ធិមនុស្សរូបនេះបានចាត់ទុក សកម្មភាពបង្ក្រាបទៅលើជនស៊ីវិល ឬកម្មករដែលប្រមូលផ្តុំគ្នាតវ៉ាដំឡើងប្រាក់ខែ ថាជាអំពើផ្ដាច់ការ រំលោភសិទ្ធិមនុស្ស និងរំលោភច្បាប់រដ្ឋធមុ្មនុញ្ញកម្ពុជា ធ្ងន់ធ្ងរ។
បញ្ហានេះដែរ លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍នៅថ្ងៃច័ន្ទ ទី៦ ខែមករា ថា ក្រសួងការងារមិនបានហៅរូបលោកទៅជួបប្រជុំនៅថ្ងៃទី៨ ខែមករា ខាងមុខទេ គឺបានហៅមេដឹកនាំសហជីពតែចំនួន ៥ ទេ ទៅប្រជុំ។ ប៉ុន្តែលោកថា រូបលោកត្រូវតុលាការសាលាដំបូងចេញដីកាកោះឲ្យចូលខ្លួនទៅបំភ្លឺនៅថ្ងៃទី១៤ ខែមករា ដោយចោទពីបទញុះញង់កម្មករធ្វើបាតុកម្ម និងឲ្យមានអំពើហិង្សាផ្សេងៗ។ លោក រ៉ុង ឈុន បានថ្លែងថា មិនបានប្រព្រឹត្តកំហុសឆ្គងអ្វីទេ ហើយនឹងទៅបំភ្លឺនៅតុលាការតាមការកោះហៅ។
យ៉ាងណាក៏ដោយ សេចក្ដីប្រកាសព័ត៌មានរបស់ក្រសួងការងារ បានឲ្យដឹងថា បន្ទាប់ពីក្រសួងបានចេញប្រកាសស្តីពីការកំណត់ប្រាក់ឈ្នួលអប្បបរមា ឬប្រាក់ខែគោលកម្មករពី ៨០ដុល្លារក្នុង១ខែ ដល់ ១០០ដុល្លារ គិតចាប់ពីថ្ងៃទី១ ខែកុម្ភៈ ឆ្នាំ២០១៤ បន្ថែមពីលើអត្ថប្រយោជន៍ផ្សេងៗ ដែលមានស្រាប់កាលពីថ្ងៃទី៣១ ខែធ្នូ ឆ្នាំ២០១៣ មានក្រុមកម្មករតាមរោងចក្រនានា និងសហជីពភាគច្រើនបានអបអរសាទរ និងព្រមទទួលយក ហើយពួកគេបានព្រមវិលចូលធ្វើការជាធម្មតាវិញ នៅថ្ងៃទី២ ខែមករា តាមការកំណត់របស់ក្រសួង។ ប៉ុន្តែការដំឡើងនេះ ត្រូវមេដឹកនាំសហជីព និងកម្មករនៅតាមរោងចក្រកាត់ដេរ និងផលិតស្បែកជើងមួយចំនួនមិនព្រមទទួលយក និងបន្តប្រមូលផ្តុំធ្វើបាតុកម្ម រហូតមានការបង្ក្រាបដោយហិង្សាពីសំណាក់កងកម្លាំងប្រដាប់អាវុធចម្រុះ រដ្ឋាភិបាលកាលពីសប្ដាហ៍មុន។
មន្ត្រីក្រសួងការងារមិនបញ្ចេញឈ្មោះម្នាក់ បានឲ្យដឹងនៅថ្ងៃទី៦ ខែមករា ថា ចំពោះកិច្ចប្រជុំរវាងថ្នាក់ដឹកនាំក្រសួងការងារ និងមេដឹកនាំសហជីពកម្មករចំនួន ៥ ដែលគ្រោងរៀបចំនៅរសៀលថ្ងៃទី៨ ខែមករា ត្រូវប្រកាសលើកពេលទៅថ្ងៃក្រោយ ដោយមិនទាន់កំណត់កាលបរិច្ឆេទ និងមូលហេតុច្បាស់លាស់ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។