អង្គការ​ក្រៅ​រដ្ឋាភិបាល​និង​ពលរដ្ឋ​នៅ​កំពង់ចាម​ប្រារព្ធ​បុណ្យ​ផ្កា​យក​ថវិកា​ជួយ​សាលា​រៀន

ដោយ សូត សុខប្រាថ្នា
2015.03.20
បុណ្យ​ផ្កា​ជួយ​សាលា​រៀន កំពង់ចាម ៦២០ សិស្សានុសិស្ស​ចូលរួម​បុណ្យ​ផ្កា​មហា​សាមគ្គី ដែល​ផ្ដួចផ្ដើម​ដោយ​វិទ្យាស្ថាន​ខ្មែរ​សម្រាប់​អភិវឌ្ឍន៍​ជាតិ និង​សម្ព័ន្ធ​គណនេយ្យ​ភាព​សង្គម​អាស៊ី​បូព៌ា និង​ប៉ាស៊ីហ្វិក នៅ​អនុវិទ្យាល័យ​គគរ ស្រុក​កំពង់សៀម ខេត្ត​កំពង់ចាម កាល​ពី​ថ្ងៃ​ទី​១៩ ខែ​មីនា ឆ្នាំ​២០១៥។
Photo Provided

អង្គការ​ក្រៅ​រដ្ឋាភិបាល​ចំនួន​ពីរ ចៅ​អធិការ​វត្ត អាជ្ញាធរ រួម​នឹង​គណៈ​គ្រប់គ្រង​សាលា​មួយ​ចំនួន​នៅ​ស្រុក​កំពង់សៀម ខេត្ត​កំពង់ចាម បាន​សហការ​គ្នា​ធ្វើ​ពិធី​បុណ្យ​ផ្កា​ប្រាក់​មហា​សាមគ្គី​រយៈពេល ៥​ថ្ងៃ ចាប់​ពី​ថ្ងៃ​ទី​១៩ ដល់​ថ្ងៃ​ទី​២៤ មីនា ក្នុង​គោល​បំណង​ប្រមូល​ថវិកា​ជួយ​បំពេញ​តម្រូវ​ការ​ចាំបាច់​របស់​សាលា​រៀន​ដែល​កំពុង​ខ្វះខាត។

គម្រោង​របស់​អង្គការ​ក្រៅ​រដ្ឋាភិបាល​មួយ​ឈ្មោះ​ថា ជួយ​មើល​សាលា​រៀន ឬ​ហៅ​ថា ឆែក​ម៉ាយ​ស្គូល (Check My School) ដែល​ជា​គម្រោង​របស់​អង្គការ​ក្រៅ​រដ្ឋាភិបាល​ចំនួន​ពីរ សហការ​ជាមួយ​ថ្នាក់​ដឹក​នាំ​សាលា បាន​បំផុស​ឲ្យ​មាន​ពិធី​បុណ្យ​ផ្កា​ប្រាក់​មហា​សាមគ្គី ដើម្បី​រក​ថវិកា​ជួយ​ឧបត្ថម្ភ​ការ​ខ្វះខាត​របស់​សាលា​រៀន​មួយ​ចំនួន​ក្នុង​ខេត្ត​កំពង់ចាម ដូចជា​បង្គន់​អនាម័យ បន្ទប់​ទឹក និង​សេវា​អប់រំ​ផ្សេងៗ​ទៀត។

នាយក​ប្រតិបត្តិ​នៃ​វិទ្យាស្ថាន​ខ្មែរ​សម្រាប់​អភិវឌ្ឍន៍​ជាតិ ហៅ​កាត់​ថា ខាញដ៍ (KIND) លោក សេង ឬទ្ធី មាន​ប្រសាសន៍​ថា នេះ​ជា​ពិធី​តាម​លក្ខណៈ​ប្រពៃណី​សាសនា។ លោក​ថា កម្មវិធី​បុណ្យ​ចាប់​ផ្ដើម​ដំបូង​នៅ​អនុវិទ្យាល័យ​គគរ ស្រុក​កំពង់សៀម ដោយ​មាន​ការ​ចូលរួម​ពី​សំណាក់​អាណាព្យាបាល​សិស្ស​ជាច្រើន​ក្នុង​សហគមន៍៖ «ប្រជាពលរដ្ឋ​ហាក់​ដូចជា​គាត់​យល់​ពី​តម្រូវ​ការ ទោះ​បី​ជា​ក្នុង​ពិធី​បុណ្យ​យើង​មិន​បាន​ធ្វើ​អធិកអធម​នោះ។ គាត់​អត់​ខ្វល់​ដែរ»

ពិធី​បុណ្យ​ផ្កា​ប្រាក់​មហា​សាមគ្គី គឺ​ប្រារព្ធ​ឡើង​ចំនួន ៥​ថ្ងៃ ដោយ​កំណត់​តំបន់​គោលដៅ​ចំនួន​៥ ក្នុង​ស្រុក​កំពង់សៀម ខេត្ត​កំពង់ចាម។ កម្មវិធី​បុណ្យ​ចាប់​ផ្ដើម​ពី​ថ្ងៃ​ទី​១៩ ខែ​មីនា គឺ​ធ្វើ​ឡើង​នៅ​អនុវិទ្យាល័យ​គគរ ឋិត​នៅ​ក្នុង​ភូមិ​គគរ​១ ឃុំ​គគរ។ នៅ​ថ្ងៃ​ទី​២០ ខែ​មីនា ធ្វើ​នៅ​អនុវិទ្យាល័យ​ខែល ជ័យ ឋិត​នៅ​ក្នុង​ភូមិ​ខែលជ័យ ឃុំ​អូរស្វាយ។ ដោយ​ឡែក​នៅ​ថ្ងៃ​ទី​២១ មីនា កម្មវិធី​ប្រារព្ធ​នៅ​អនុវិទ្យាល័យ​គៀនជ្រៃ ឋិត​នៅ​ក្នុង​ភូមិ​ស្ពានថ្មី ឃុំ​គៀនជ្រៃ។ នៅ​ថ្ងៃ​ទី​២៣ ខែ​មីនា គឺ​ប្រារព្ធ​ពិធី​នៅ​អនុវិទ្យាល័យ​កោះ​ទន្ទឹម ឋិត​នៅ​ក្នុង​ភូមិ​កោះប្រាក់លើ ឃុំ​កោះទន្ទឹម ស្រុក​កំពង់សៀម និង​ចុង​ក្រោយ​នៅ​ថ្ងៃ​ទី​២៤ ខែ​មីនា ពិធី​បុណ្យ​នឹង​ធ្វើ​ឡើង​នៅ​អនុវិទ្យាល័យ​អង្គរ ឋិត​នៅ​ក្នុង​ភូមិ​អំពិលលើ ឃុំ​អំពិល។ លោក សេង ឬទ្ធី បញ្ជាក់​ថា មូលហេតុ​ដែល​ខាង​លោក​ជ្រើស​រើស​យក​សាលា​ទាំង​៥ នេះ គឺ​ដោយសារ​រក​ឃើញ​ថា សាលា​ទាំង​នោះ​មាន​ការ​ខ្វះខាត​សេវា​អប់រំ​នៅ​ក្នុង​សាលា​ជា​ចាំបាច់ ពិសេស គឺ​បង្គន់​អនាម័យ។ លោក​ថា ថវិកា​ដែល​ប្រមូល​បាន នឹង​ប្រគល់​ឲ្យ​អ្នក​គ្រប់គ្រង​សាលា​យក​ទៅ​ប្រើប្រាស់​តាម​តម្រូវ​ការ​ជា​អាទិភាព​នៅ​ក្នុង​សាលា។

នាយក​អនុវិទ្យាល័យ​គគរ លោក គង់ សុផាណារិទ្ធ សម្ដែង​អារម្មណ៍​រីករាយ​នៅ​ពេល​កម្មវិធី​បុណ្យ​ផ្កា​ប្រាក់​មហា​សាមគ្គី មាន​ការ​ចូលរួម​ពី​ពលរដ្ឋ​ច្រើន ពីព្រោះ​ជា​ការ​ជំរុញ​ស្មារតី​ប្រជាពលរដ្ឋ​ឲ្យ​មាន​ការ​ចូលរួម​ចំណែក​ក្នុង​កិច្ចការ​សង្គម។ លោក​ថា ថវិកា​ដែល​ប្រមូល​បាន​ពី​បុណ្យ​ផ្កា​ប្រមាណ ៣​លាន​រៀល គឺ​នឹង​យក​ទៅ​ធ្វើ​បង្គន់​អនាម័យ និង​បន្ទប់​ទឹក​សម្រាប់​សិស្ស​នារី​ក្នុង​ពេល​ឆាប់ៗ ទៅ​តាម​ការ​សម្រេច​របស់​ប្រជាពលរដ្ឋ ប៉ុន្តែ​លោក​ថា ថវិកា​នោះ​គឺ​នៅ​ខ្វះ​តិចតួច៖ «អ៊ីចឹង​បើ​ប្រជាជន​សម្រេច​ចិត្ត​យក​បន្ទប់​ទឹក​ហើយ អ៊ីចឹង​ធ្វើ​ឲ្យ​នារី​មួយ​ទៀត​ទៅ ឲ្យ​ដាច់​ដោយ​ឡែក​ហ្មង​ទៅ»

អនុវិទ្យាល័យ​គគរ មាន​សិស្ស​ចំនួន ១៦០​នាក់ ក្នុង​នោះ​ស្រី ៨០​នាក់ ហើយ​សាលា​នេះ​នៅ​ខ្វះខាត​សម្ភារៈ​ខ្លះ​ទៀត ដូចជា​របង​សាលា និង​បញ្ហា​ទីធ្លា​បរិស្ថាន​សាលា ជាដើម។

យ៉ាង​ណា តំណាង​សម្ព័ន្ធ​គណនេយ្យ​ភាព​សង្គម​អាស៊ី​បូព៌ា និង​ប៉ាស៊ីហ្វិក លោក សន ជ័យ មាន​ប្រសាសន៍​ថា កង្វះ​ខាត​សម្ភារៈ​នៅ​ក្នុង​សាលា ក៏​អាច​ជា​កត្តា​មួយ​នាំ​ឲ្យ​សិស្ស​សម្រេច​ចិត្ត​បោះ​បង់​ចោល​ការ​សិក្សា​ដែរ ហើយ​វា​ក៏​ជា​កត្តា​មួយ​ជំរុញ​ឲ្យ​សិស្ស​កាន់​តែ​ចង់​រៀន នៅ​ពេល​បរិស្ថាន​សាលា​ស្អាត និង​សេវា​អប់រំ​ក្នុង​សាលា​មាន​គ្រប់គ្រាន់៖ «ត្រូវ​ការ​ប្រើប្រាស់​សេវា​បន្ទប់​ទឹក បង្គន់​អនាម័យ ប្រសិន​បើ​សាលា​រៀន​មិន​មាន​ទេ គឺ​ធ្វើ​ឲ្យ​ពួក​គាត់​មាន​ការ​ធុញទ្រាន់។ យើង​ដឹង​ហើយ​សិស្ស​ស្រី​នៅ​ពេល​ធំ គាត់​អាច​មាន​ការ​ធុញទ្រាន់»

លោក​ថា ផែនការ​ទៅ​មុខ​ទៀត​អាច​នឹង​មាន​ពិធី​បែប​នេះ​នៅ​ខេត្ត​មួយ​ចំនួន ដែល​ឋិត​នៅ​ឆ្ងាយ​ពី​រាជធានី​ភ្នំពេញ ដូចជា​ខេត្ត​កំពង់ស្ពឺ ស្វាយរៀង បាត់ដំបង ជាដើម ប៉ុន្តែ​ខាង​លោក​ត្រូវ​ការ​ព័ត៌មាន​មួយ ដោយ​ផ្អែក​លើ​ភាព​ខ្វះខាត​របស់​សាលា​ទាំង​នោះ​ឲ្យ​បាន​ជាក់លាក់​ជា​មុន​សិន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។