ព្រះចៅអធិការវត្តជ័យមុនី នៅស្រុករំដួល ខេត្តស្វាយរៀង ត្រូវអាជ្ញាធរនិងមន្ត្រីធម្មការស្រុករំដួល ដកពីតំណែងនៅព្រឹកថ្ងៃទី៣ សីហា ដោយចោទថា បញ្ចុះបញ្ចូលពុទ្ធបរិស័ទរារាំងការជីកប្រឡាយទឹក និងអនុវត្តតួនាទីជាព្រះចៅអធិការមិនត្រឹមត្រូវ។ ប៉ុន្តែព្រះអង្គមានព្រះថេរដីកាបដិសេធថា ជារឿងប្រឌិតទម្លាក់កំហុសទាំងបង្ខំ ដោយសារកន្លងមកព្រះអង្គចូលរួមធ្វើបាតុកម្មញឹកញាប់នៅរាជធានីភ្នំពេញ។
ព្រះចៅអធិការនិងពុទ្ធបរិស័ទចំណុះជើងវត្តប្រតិកម្មភ្លាមៗបន្ទាប់ការពីមានប្រកាសដកតំណែងព្រះអង្គនោះដោយចាត់ទុកសកម្មភាពរបស់អាជ្ញាធរថា ជាទង្វើមួយតក់ក្រហល់ធ្វើឡើងដោយអយុត្តិធម៌និងគ្មានមូលហេតុច្បាស់លាស់។
ព្រះតេជព្រះគុណ អ៊ិន ពុទ្ធី មានព្រះថេរដីកាបន្ទាប់ពីដកតំណែងថា អាជ្ញាធររួមមានមន្ត្រីកងប្រដាប់អាវុធអភិបាលរងស្រុកមន្ត្រីធម្មការនិងសាសនា ព្រមទាំងព្រះអនុគណស្រុករំដួល បាននាំកម្លាំងប្រមាណ ៣០នាក់ចុះទៅដកតំណែងព្រះអង្គពីព្រះចៅអធិការវត្តខណៈដែលព្រះអង្គកំពុងឆាន់អាហារពេលព្រឹក ដោយចោទប្រកាន់ថា ព្រះអង្គធ្វើឲ្យរាំងស្ទះការសាងសង់ប្រឡាយទឹករបស់អាជ្ញាធរស្រុករំដួល និងខ្វះសមត្ថភាពជាព្រះចៅអធិការ។
ព្រះអង្គ អ៊ិន ពុទ្ធី មានព្រះថេរដីកាថា ការចោទប្រកាន់របស់អាជ្ញាធរនោះគឺជាការមួលបង្កាច់ទាំងស្រុងដើម្បីរារាំងមិនព្រះអង្គចូលរួមធ្វើសកម្មភាពតាមបែបប្រជាធិបតេយ្យក្នុងសង្គម៖ «ការប្រជុំដកតំណែងព្រឹកមិញហ្នឹង សូម្បីតែអាត្មាសុំធ្វើការតវ៉ាសុំបញ្ចេញមតិយោបល់ ហើយប្រជាពលរដ្ឋមួយចំនួនគាត់សុំធ្វើការជំទាស់ សុំតវ៉ាហ្នឹង ក៏គេបំបិទមិនឲ្យធ្វើការតវ៉ា មិនឲ្យនិយាយអីទាំងអស់។ ដល់ថ្នាក់អាត្មាបង្ខំចិត្តរត់ទៅបិទមីក្រូហើយគេលែងនិយាយ អាត្មានិយាយម្ដង កុំអីអាត្មាមិនបាននិយាយទេព្រឹកមិញ តែមួយម៉ាត់មិនបាននិយាយផង។ ប៉ុន្តែដោយសារអាត្មាជម្នះចិត្តក្នុងការនិយាយហ្នឹង និយាយបាន ពីរបីម៉ាត់គេបើកមីក្រូនិយាយវិញអ៊ីចឹងទៅ។ ដល់បញ្ចប់ហើយអាត្មាតវ៉ាទៀតក៏គេបំបិទសិទ្ធិទៀត គេថាឲ្យអាត្មាទៅតវ៉ានៅព្រះមេគណខេត្តទៅ មិនបាច់តវ៉ាអីត្រង់ហ្នឹងទេ គេនិយាយអ៊ីចឹងតែម្ដង។ និយាយទៅបែបកុម្មុយនិស្តសុទ្ធសាធ»។
ពុទ្ធបរិស័ទចំណុះជើងវត្តមួយចំនួនក៏ប្រតិកម្មចំពោះការដកហូតតំណែងពីព្រះចៅវត្តរបស់អាជ្ញាធរនេះដោយលើកឡើងថាគ្មានមូលដ្ឋានត្រឹមត្រូវ។
ប្រជាពលរដ្ឋម្នាក់គឺលោក ផាត់ វិជា រស់នៅភូមិវាល ឃុំម៉ឺនជ័យ ស្រុករំដួល ថ្លែងនៅថ្ងៃទី៣ សីហា ថា កន្លងមកព្រះអង្គតែងតែចូលរួមសកម្មភាពនយោបាយជាមួយគណបក្សសង្គ្រោះជាតិ និងធ្លាប់ដឹកនាំពុទ្ធបរិស័ទតវ៉ាទាមទាររឿងទំនាស់ដីធ្លីជាមួយអាជ្ញាធរជាប្រចាំ។
លោក ផាត់ វិជា ចាត់ទុកការ ដកហូតតំណែងពីព្រះចៅអធិការវត្តរបស់អាជ្ញាធរនេះថា ជាការកាច់បំបាក់អ្នកមាននិន្នាការប្រជាធិបតេយ្យ៖ «បាទ! គឺខ្ញុំហ្នឹងឯងអ្នកនិយាយទូរស័ព្ទផ្ទាល់គឺគាំទ្រលោកមួយរយភាគរយតែម្ដង។ លោកជួយតែអ្នកទុក្ខលំបាកលោកជួយឃើញញាតិណាទុក្ខលំបាកលោកជួយជាតិ ឃើញប្រជាពលរដ្ឋមានខ្វះខាតដូចជាអណ្ដូងទឹក ឬបង្គន់លោកក៏សុំបិណ្ឌបាតពីក្រៅមក យកមកឲ្យ ជាក់ស្ដែងលោកក៏ជួយធ្វើការងារផ្ទាល់ដោយដៃរបស់លោកទៀត»។
ឆ្លើយតបនឹងបញ្ហានេះ អនុគណស្រុករំដួល ព្រះតេជព្រះគុណ កែវ ចាន់ មានព្រះថេរដីកាថា ការដកព្រះចៅអធិការពីតំណែងនោះពុំមានពាក់ព័ន្ធនឹងរឿងនយោបាយឡើយ គឺធ្វើឡើងដោយសារព្រះអង្គអនុវត្តតួនាទីជាព្រះចៅអធិការវត្តពុំបានត្រឹមត្រូវ។ ចំណែកឯកម្លាំងដែលទៅចូលរួមជាង ៣០នាក់នោះ ដើម្បីការពារសន្តិសុខក្រែងកើតមានអំពើហិង្សាណាមួយខណៈប្ដូរព្រះចៅអធិការថ្មី។
ព្រះតេជព្រះគុណ កែវ ចាន់៖ «មិនអាចទុកឲ្យវត្តហ្នឹងនៅត្រងោលខោលបានទេ ត្រូវមានចៅអធិការថ្មី។ ចៅអធិការហ្នឹងគឺខានមកប្រជុំ៨ដងហ្នឹង វាអស់មានសុពលភាពហើយ ហើយវាដាច់សង្វាក់ពីមន្ត្រីសង្ឃខ្វះការទំនាក់ទំនងគ្នាទៅវិញទៅមក។ អត់មានត្រូវការបញ្ចេញពាក្យសម្ដីអីទេ ព្រោះសម្រេចចិត្តពីមេគណខេត្ត ហើយសាលាមេគណខេត្តអ្នកសម្រេច ហើយអ៊ីចឹងលោកមិនអាចនិយាយតបតអីទៀតបានទេ ព្រោះកិច្ចការហ្នឹងវាចប់និយាយហើយវាអស់សុពលភាពនិយាយរួម»។
មន្ត្រីអង្គការសង្គមស៊ីវិលលើកឡើងថា ការដកព្រះចៅអធិការពីតំណែងនេះជារឿងនយោបាយ ពីព្រោះថាកន្លងមកព្រះចៅអធិការចូលរួមសកម្មភាពនានាជាមួយគណបក្សប្រឆាំងនិងដឹកនាំប្រជាពលរដ្ឋទាមទារសិទ្ធិសេរីភាពក្នុងសង្គម។
មន្ត្រីសម្របសម្រួលអង្គការលីកាដូ (Licadho) ប្រចាំខេត្តស្វាយរៀង លោក នុត ប៊ូពិនណារ័ត្ន មានប្រសាសន៍ថា ការអាជ្ញាធរដកព្រះចៅអធិការវត្តពីតំណែងធ្វើឡើងដោយតក់ក្រហល់ ហើយចាត់ទុកការដឹកនាំកម្លាំងកងប្រដាប់អាវុធរបស់អាជ្ញាធរស្រុករំដួល នោះថាជាការបំភិតបំភ័យប្រជាពលរដ្ឋដោយខុសច្បាប់៖ «បើយើងនិយាយពីច្បាប់វិញវាគឺខុសទៅលើច្បាប់សាសនា ហើយសាសនាគេមិនដែលធ្វើកម្លាំងប៉ូលិសអីអ៊ីចឹងចុះទៅធ្វើអ៊ីចឹងទេ។ ព្រោះលោកមិនមែនប្រព្រឹត្តបទល្មើសព្រហ្មទណ្ឌអីទេ គឺអត់មានទេគ្រាន់ថា ប៉ះពាល់លើវិន័យសង្ឃ អាហ្នឹងគឺព្រះសង្ឃដោះស្រាយ ព្រះសង្ឃមិនមែនយកកម្លាំងសមត្ថកិច្ចទៅធ្វើអ៊ីចឹងវាខុស ហាក់បីដូចជាធ្វើលក្ខណៈមួយគំរាមកំហែងទៅលើសិទ្ធិសេរីភាពដល់ព្រះសង្ឃហ្នឹង រហូតធ្វើឲ្យមានភិតភ័យប្រជាពលរដ្ឋជិតខាងហ្នឹង»។
ព្រះអនុគណស្រុកឲ្យដឹងថា ប្រធានសង្ឃខេត្តស្វាយរៀង បានតែងតាំងព្រះសង្ឃក្នុងវត្តមួយព្រះអង្គព្រះនាម គិម ហ៊ឹង ជាព្រះចៅអធិការថ្មីភ្លាមជំនួសតំណែងព្រះចៅអធិការចាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។