មន្ត្រីធម្មការខេត្តកំពង់ឆ្នាំងសម្រេចមិនដកតំណែងព្រះចៅអធិការវត្តឧទុម្ពរ
2015.08.08
មន្ត្រីធម្មការ និងព្រះវិន័យធម៌គុណខេត្តកំពង់ឆ្នាំង សម្រេចមិនដកតំណែង ឬផ្លាស់ប្ដូរព្រះចៅអធិការវត្តឧទុម្ពរ តាមសំណើរបស់ពុទ្ធបរិស័ទជាង ៣០០នាក់នៅឡើយទេ។ ការសម្រេចបែបនេះ គឺដើម្បីទុកលទ្ធភាពឲ្យមន្ត្រីសង្ឃ និងអាជ្ញាធរពាក់ព័ន្ធ រម្ងាប់អធិករណ៍ ឬវិវាទនៅក្នុងវត្តសិន។
មន្ត្រីសង្ឃ និងអាជ្ញាធរដែនដីប្រមាណ ១០នាក់ នៅព្រឹកថ្ងៃទី៧ ខែសីហា បានប្រជុំដោះស្រាយវិវាទរបស់ចៅអធិការវត្តឧទុម្ពរ ព្រះនាម អឿ សំណាង ជាមួយពុទ្ធបរិស័ទនៅក្នុងបរិវេណវត្តព្រះវិហារហ្លួង នៅស្រុករលាប្អៀរ។
លទ្ធផលនៃកិច្ចប្រជុំ បានកំណត់យកថ្ងៃ ១៤រោច ត្រូវនឹងថ្ងៃទី១៣ ខែសីហា ឆ្នាំ២០១៥ ជាថ្ងៃជួបជុំពុទ្ធបរិស័ទ ព្រះសង្ឃ អាជ្ញាធរពាក់ព័ន្ធ នៅក្នុងបរិវេណវត្តឧទុម្ពរ ដើម្បីផ្សព្វផ្សាយពីវិន័យធម៌។ ពិធីនេះ ធ្វើឡើងក្នុងគោលបំណងរម្ងាប់អធិករណ៍ក្នុងវត្តឧទុម្ពរ និងបកស្រាយឲ្យពុទ្ធបរិស័ទ បានយល់ពីទោសកំហុសរបស់ចៅអធិការ ព្រះនាម អឿ សំណាង ដែលអ្នកភូមិចោទប្រកាន់កន្លងទៅ។
ប្រធានមន្ទីរធម្មការ និងកិច្ចការសាសនាស្ដីទីខេត្តកំពង់ឆ្នាំង លោក សរ លាង មានប្រសាសន៍ថា ពិធីជម្រះមន្ទិលរបស់ពលរដ្ឋលើទោសកំហុសរបស់ចៅអធិការវត្តឧទុម្ពរ ដែលប្រព្រឹត្តខុសវិន័យធម៌ នឹងមានការចូលរួមពីភាគីពាក់ព័ន្ធច្រើន ហើយពេលនោះនឹងមានលិខិតបទដ្ឋានខ្លះយកទៅផ្សព្វផ្សាយដល់ពុទ្ធបរិស័ទដែរ។ លោកថា កំហុសរបស់ចៅអធិការមិនធ្ងន់ធ្ងរដល់ថ្នាក់ដកពីតំណែងទេ៖ «ឥឡូវលោក (ព្រះវិន័យធម៌គុណខេត្ត) ថាទុកឱកាសហ្នឹងដើម្បីឲ្យលោកកែតម្រូវព្រះសង្ឃអង្គហ្នឹងបានមួយដងសិន ហើយទីពីរទៀត រដូវចូលវស្សានេះកាលណាយើងដកចៅអធិការក្នុងវស្សានេះ នឹងមានទោស (ទោសខាងពុទ្ធសាសនា) អ៊ីចឹងលោកសម្រួល»។
ចៅអធិការវត្តឧទុម្ពរ ព្រះនាម អឿ សំណាង ត្រូវពុទ្ធបរិស័ទចំណុះជើងវត្តនាំគ្នាផ្ដិតមេដៃបានចំនួន ៣៣២នាក់ ប្ដឹងទៅអាជ្ញាធរស្រុករលាប្អៀរ និងមន្ទីរធម្មការ ដើម្បីសុំដកតំណែង និងស្នើឲ្យលោកចេញពីវត្ត កាលពីអំឡុងខែកក្កដា ឆ្នាំ២០១៥។ ពុទ្ធបរិស័ទ បានចោទព្រះអង្គថាឆាន់ស្រា ដើរលេងយប់ លេងល្បែង និងកិបកេងបច្ច័យវត្ត ជាដើម ប៉ុន្តែការចោទប្រកាន់ត្រង់ចំណុចខ្លះ ត្រូវលោកបដិសេធ។
ព្រះវិន័យធម៌គុណខេត្តកំពង់ឆ្នាំង ព្រះនាម ខុន ថុន មានថេរដីកាថា តាមការស្រាវជ្រាវ និងការបកស្រាយរវាងចៅអធិការ ព្រះនាម អឿ សំណាង និងគណៈកម្មការវត្តឧទុម្ពរ ឃើញថា ព្រះចៅអធិការត្រូវអាបត្តិកត់ទុក ដែលទោសនេះស្រាលមិនដល់ថ្នាក់ដកតំណែង ឬបណ្ដេញចេញពីវត្តនោះទេ។ ព្រះអង្គបានលើកនូវទោសកំហុសចំនួន៤ តាមផ្លូវព្រះពុទ្ធសាសនា ដែលព្រះសង្ឃត្រូវដកពីតំណែង ឬបណ្ដេញចេញពីវត្តនោះ គឺទី១ សេពកាមលេងសើចជាមួយស្រីញី។ ទី២ លួចទ្រព្យសម្បត្តិអ្នកដទៃ។ ទី៣ សម្លាប់សត្វ និងទី៤ តាំងខ្លួនជាព្រះអរហន្ត៖ «មួយផ្នែកទៀតគណៈកម្មការជាមួយក្រុមវេនទាំងអស់ចំណុះជើងវត្ត បានសម្របសម្រួលគ្នាក៏ជាការល្អដែរ។ រយៈពេលបីខែក្នុងវស្សា តើអ្នកទាំងអស់គ្នាអាចសម្រុះសម្រួលគ្នាបានដែរ ឬអត់? បើមិនបានទេ ដល់ពេលចេញវស្សាហើយ នឹងរកនីតិវិធីថ្មីសម្រាប់ដោះស្រាយ»។
យ៉ាងណា តំណាងពលរដ្ឋ និងជាមេភូមិឧទុម្ពរ ឃុំស្វាយជ្រុំ លោក ហ៊ុន ភាន់ បញ្ជាក់ថា អ្នកភូមិឧទុម្ពរ សរុប ២៨៨គ្រួសារ សុទ្ធតែមិនពេញចិត្តចំពោះព្រះចៅអធិការរូបនេះ។ លោកយល់ថា ការសម្របសម្រួលបែបណាក៏ដោយ ក៏នៅតែភាគីប្រជាពលរដ្ឋមិនអាចទទួលយកបានដែរ បើចៅអធិការ ព្រះនាម អឿ សំណាង នៅតែមានតំណែងជាព្រះចៅអធិការ និងគង់នៅក្នុងវត្តឧទុម្ពរ ទៀតនោះ៖ «ប្រជាពលរដ្ឋខ្ញុំលទ្ធផលយ៉ាងណា ក៏គាត់អត់ទទួលយកដែរ ព្រោះកំហុសដែលលោកបានធ្វើហ្នឹងវាមិនដល់ថ្នាក់បារាជិកមែន ប៉ុន្តែមិនប្រជាជន មិនឲ្យយាយតាមានជំនឿ និងធ្វើបុណ្យក៏គាត់អត់មានជំនឿ។ អ្នកផ្ដិតមេដៃហ្នឹង បើដើរផ្ដិតវិញចំនួនប្រជាពលរដ្ឋវាយថាចាប់ពីអាយុ ១៨ឆ្នាំឡើងទៅ វាឡើងដល់ ៤០០នាក់ ទៅ ៥០០នាក់ អត់មាននរណាម្នាក់គាំទ្រលោកទេ»។
អធិករណ៍ ឬជម្លោះរកាំរកូសនៅក្នុងវត្តឧទុម្ពរ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង កើតមានខ្លាំងតាំងពីអំឡុងខែមិថុនា ឆ្នាំ២០១៥។ ពលរដ្ឋខ្លះព្រមានធ្វើបាតុកម្ម និងខ្លះឈប់ធ្វើបុណ្យនៅក្នុងវត្តនេះ បើអាជ្ញាធរ ឬមន្ត្រីសង្ឃមិនអាចប្ដូរចៅអធិការ ព្រះនាម អឿ សំណាង ចេញពីវត្តឧទុម្ពរ បាននោះ៕