ប្រទេសចិន គ្រោងបោះទុនវិនិយោគធំលើការផលិតសេរ៉ាមិច ឬកុលាលភាជន៍នៅខេត្តកំពង់ឆ្នាំង។ អាជ្ញាធរ និងពលរដ្ឋដែលមានមុខរបរផលិតកុលាលភាជន៍ ក្អម និងឆ្នាំងជាច្រើនឆ្នាំមកហើយនោះ សាទរចំពោះគម្រោងនេះដោយសង្ឃឹមថា អាចជួយលើកកម្ពស់ជីវភាពគ្រួសារ និងមានឱកាសបង្ហាញស្នាដៃខ្មែរតាមរយៈនាំផលិតផលចេញទៅលក់ក្រៅប្រទេស។
ប្រតិភូរបស់ចិន ពីក្រុងជីងទ័រជិន (Jing De Zhen) ខេត្ដជាំងស៊ី (Jaingxi) កាលពីថ្ងៃទី១៤ ខែកក្កដា ឆ្នាំ២០១៥ បានជួបអាជ្ញាធរខេត្តកំពង់ឆ្នាំង និងមន្ត្រីជំនាញពាក់ព័ន្ធ ដើម្បីសិក្សាលើថ្លៃដើម និងវត្ថុធាតុដើមសម្រាប់ដំណើរការផលិតសេរ៉ាមិច ឬកុលាលភាជន៍។ មន្ត្រីជំនាញនៃមន្ទីរឧស្សាហកម្ម និងសិប្បកម្មអះអាងថា នៅក្នុងជំនួបនោះ ប្រតិភូចិន ក៏បង្ហាញជំហរសិក្សាទីផ្សារគ្នាទៅវិញទៅមក ដើម្បីលើកកម្ពស់ផលិតភាពតាមបច្ចេកទេសដែលអាចផ្គត់ផ្គង់ក្នុងទីផ្សារអាស៊ី និងបង្កើតឲ្យមានការដាក់បង្ហាញផលិតផលនៅលើទីផ្សារអន្តរជាតិ។
ប្រធានមន្ទីរឧស្សាហកម្ម និងសិប្បកម្មខេត្តកំពង់ឆ្នាំង លោក ទិត្យ ណាន មានប្រសាសន៍នៅថ្ងៃទី២៤ ខែកក្កដា ថា កន្លងទៅអ្នកភូមិអណ្ដូងឫស្សី នៃឃុំស្រែថ្មី ដែលប៉ិនប្រសព្វខាងផលិតកុលាលភាជន៍ ឬសម្ភារៈប្រើប្រាស់អំពីដី ដោយមានជំនួយបច្ចេកទេសពីប្រទេសជប៉ុន និងអាល្លឺម៉ង់ សម្រាប់តែផ្គត់ផ្គង់ទីផ្សារក្នុងស្រុកប៉ុណ្ណោះ។ លោកថា ក្រុមហ៊ុនចិន ដែលគ្រោងបោះទុនវិនិយោគក្នុងទំហំទឹកប្រាក់រាប់លានដុល្លារនោះ នឹងមានលទ្ធភាពនាំចេញទៅលក់ក្រៅប្រទេស ខណៈដែលរដ្ឋាភិបាលកម្ពុជា កំពុងខ្នះខ្នែងកៀរគរអ្នកវិនិយោគទុនធំៗចូលមកវិនិយោគក្នុងប្រទេស៖ «ក្រុមហ៊ុនឯកជនរបស់ចិន ដែលគេប្រុងមកវិនិយោគ គឺគេមានទុនកម្រិតដល់រាប់លានដុល្លារឯណោះ! អ៊ីចឹងហើយគេមិនធ្វើត្រឹមតែអ្វីដែលយើងមានទេ គេនឹងពង្រីកទៀត»។
វិទ្យុអាស៊ីសេរី មិនអាចសុំការអត្ថាធិប្បាយពីអភិបាលរងខេត្តកំពង់ឆ្នាំង លោក ហ៊ី ណាត ដែលបានជួបប្រតិភូចិន ពិភាក្សាលើគម្រោងវិនិយោគនេះ ដើម្បីសួរលម្អិតអំពីទំហំទឹកប្រាក់វិនិយោគ និងចាប់ផ្ដើមនៅពេលណានោះទេ ដោយទូរស័ព្ទចូលហើយពុំមានអ្នកទទួល។ ប៉ុន្ដែប្រភពពីមន្ដ្រីជំនាញ និងពលរដ្ឋខ្លះបង្ហើបថា ភាគីកម្ពុជា និងចិន ប្ដេជ្ញាបង្កើតក្រុមហ៊ុនវិនិយោគនេះឲ្យចេញជារូបរាងក្នុងពេលឆាប់ៗ។
ប្រជាពលរដ្ឋ និងមេភូមិអណ្ដូងឫស្សី ខេត្តកំពង់ឆ្នាំង ទន្ទឹងរង់ចាំមើលគម្រោងវិនិយោគនេះ ហើយស្នើឲ្យអ្នកវិនិយោគ ឬអាជ្ញាធររៀបចំចងក្រងក្រុមអ្នកផលិត ដើម្បីផ្ដល់បច្ចេកទេសបន្ថែម និងសង់ឡដុតកុលាលភាជន៍។ អ្នកភូមិបារម្ភថា បច្ចុប្បន្នក្រុមពលរដ្ឋមិនអាចផលិតសេរ៉ាមិច ឬកុលាលភាជន៍ដែលមានគុណភាព និងរចនាបថល្អប្រណីតយកទៅប្រកួតប្រជែងលើទីផ្សារអន្តរជាតិ បាននៅឡើយ។
មេភូមិអណ្ដូងឫស្សី លោក ឡេង ហេង ឲ្យដឹងថា អ្នកភូមិរបស់លោកជិត ២០០គ្រួសារ ក្នុងនោះមានប្រហែល ១០០គ្រួសារ បានផលិតកុលាលភាជន៍ ឬសេរ៉ាមិចជាលក្ខណៈគ្រួសារ ហើយពលរដ្ឋក្រៅពីនេះនាំគ្នាផលិតក្អម ឆ្នាំង និងជើងក្រាន។ លោកសប្បាយចិត្តបើក្រុមហ៊ុនវិនិយោគចិន អាចពង្រីកអាជីវកម្ម និងទីផ្សាររបស់ពលរដ្ឋក្នុងភូមិ ក្រោយពីគម្រោងរបស់ជប៉ុន បានបញ្ចប់ទៅ៖ «ព្រោះយើងសព្វថ្ងៃអត់មាន (ឡដុតកម្ដៅខ្ពស់) មានដែរ តែរបស់ជប៉ុន! អ៊ីចឹងក្រៅពីហ្នឹងអត់មានក្រុមហ៊ុនណាមកធ្វើសកម្មភាព។ បើបានចិន មកជួយអ៊ីចឹងខ្ញុំអរណាស់ ហើយពលរដ្ឋយើងសព្វថ្ងៃក៏ចង់បានអ៊ីចឹងដែរ»។
ភូមិអណ្ដូងឫស្សី ឃុំស្រែថ្មី ស្រុករលាប្អៀរ គឺជាភូមិមួយរបស់ខេត្តកំពង់ឆ្នាំង មានការផលិតក្អម ឆ្នាំង ជើងក្រាន កុលាលភាជន៍ និងសេរ៉ាមិច ច្រើនជាងគេ។ គម្រោងផលិត ឬអភិវឌ្ឍន៍ផ្នែកបច្ចេកទេសស្មូនសម្ភារៈប្រើប្រាស់ និងវត្ថុអនុស្សាវរីយ៍អំពីដី ឬហៅថា សេរ៉ាមិចនោះ គឺមានច្រើននៅក្នុងភូមិនេះ។ ជាក់ស្ដែងប្រទេសជប៉ុន បានសង់ឡដុតសេរ៉ាមិចតម្លៃ ៥ម៉ឺនដុល្លារ និងបណ្ដុះបណ្ដាលបច្ចេកទេសផលិតជូនពលរដ្ឋក្នុងភូមិមួយក្រុម មានគ្នា ១០នាក់ ប៉ុន្តែគម្រោងនឹងត្រូវបញ្ចប់នៅចុងឆ្នាំ២០១៥ បន្ទាប់ពីអនុវត្តបានរយៈពេល ៥ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។