អ្នកសារព័ត៌មានសហគមន៍ដែលជាអ្នកធ្វើការដោយស្ម័គ្រចិត្តឥតទទួលកម្រៃត្រូវបានត្រូវគេមើលឃើញថាមានសារសំខាន់ក្នុងការចូលរួមចំណែកជំរុញឲ្យការអភិវឌ្ឍន៍សង្គមមួយប្រកបដោយតម្លាភាព។ ដើម្បីជួយសម្រួលការងាររបស់ពួកគេ គេហទំព័រមួយបានត្រូវបង្កើតឡើង ។
មជ្ឈមណ្ឌលអប់រំច្បាប់សម្រាប់សហគមន៍ (CLEC) បានប្រកាសបើកដំណើរការគេហទំព័រថ្មីរបស់ខ្លួនដែលមានឈ្មោះថា «សំឡេងប្រជាពលរដ្ឋ» នៅព្រឹកថ្ងៃទី ៣០ ខែ មិថុនា។
នាយកប្រតិបត្តិមជ្ឈនៃមណ្ឌលអប់រំច្បាប់សំរាប់សហគមន៏ លោក យ៉េង វីរៈ មានប្រសាសន៍ថា នេះជាគំនិតផ្ដួចផ្ដើមនិងកិច្ចខិតខំប្រឹងប្រែងថ្មីមួយទៀតរបស់មជ្ឈមណ្ឌល ដើម្បីលើកកម្ពស់សិទ្ធិសេរីភាពក្នុងការ បញ្ចេញមតិ ព្រមទាំងសិទ្ធិសេរីភាពក្នុងការផ្ដល់ និងទទួលព័ត៌មាននៅកម្ពុជា ជាពិសេសសម្រាប់ប្រជាពលរដ្ឋដែលពុំសូវមានឱកាសក្នុងការបញ្ចេញសំឡេង ៖ «ថ្ងៃមុខទៅដោយសារថាយើងផ្សារភ្ជាប់គ្នារវាងគេហទំព័រសំឡេងប្រជាពលរដ្ឋបូកផ្សំជាមួយប្រព័ន្ធដែលសារឆ្លើយតបជាសំឡេងនេះនឹងធ្វើឲ្យមានលទ្ធភាពមួយគឺថា អ្នកអាចរាយការណ៍ព័ត៌មានហ្នឹងគឺមាននៅ គ្រប់ទីកន្លែង ។ អ៊ីចឹងវានឹងគេហៅថាបង្កើននូលលទ្ធភាពនៃការដែលអ្នកកាសែតអាជីពអាចដឹងថាតើរឿងរ៉ាវកើតនៅកន្លែងណាៗច្រើន បាទ !» ។
មន្ត្រីសម្របសម្រួលព័ត៌មាននៃមជ្ឈមណ្ឌលអប់រំច្បាប់សម្រាប់សហគមន៍ លោក ង៉ែត ម៉ូសេ ពន្យល់ថា គេហទំព័រនេះនឹងកត់ត្រាបណ្ដឹង ឬព័ត៌មានពីប្រជាសហគមន៍នានា ដែលប្រឈមនឹងហានិភ័យផ្សេងៗ ដោយភ្ជាប់ទៅអ្នកកាសែត និងសហគមន៍ដែលជាអ្នកប្រមូល ព្រមទាំងចែករំលែកព្រឹត្តិការណ៍នានា និងដំណឹងថ្មីៗទាន់ហេតុការណ៍ផ្សេងៗផង ៖ «វ៉ឹបសាយថ៍នេះគឺផ្សារភ្ជាប់ទៅនឹងប្រព័ន្ធផ្ញើសារជាសំឡេងដែលហៅថា អាយ . វី . អា (IVR System) នោះឯង គឺពេលប្រជាពលរដ្ឋដែលលោកអត់ចេះផ្នែកកុំព្យូទ័រ អ៊ីនធើណិតអីដើម្បីចូលមកមើលដើម្បីចូលមកមើលគេហទំព័រមួយនេះ លោកអាចអញ្ជើញខលទៅលេខទូរស័ព្ទដែលយើងបានដាក់បង្ហាញហ្នឹង គឺ ០៧០ ២២១ ១០២ ហ្នឹង គឺយើងយកសំឡេងដែលប្រជាពលរដ្ឋដែលរាយការណ៍នៅក្នុងប្រព័ន្ធផ្វើសារជាសំឡេងនោះមកដាក់នៅលើគេហទំព័រនោះឯង ។ អ៊ីចឹងទៅនៅក្នុងគេហទំព័រហ្នឹង ក្រៅពីអ្នកដែលចេះបច្ចេកទេស ចង់មានន័យថា អ្នកចេះអ៊ីនធើណិត អ្នកដែលចេះវាយកុំព្យូទ័រអីហ្នឹង ក្រៅពីពួកគាត់គឺថាអ្នកដែលអត់ចេះកិច្ចការទាំងអស់ហ្នឹងក៏អាចផ្ញើព័ត៌មានមកកាន់យើងបានដែរ ។ អ៊ីចឹងព័ត៌មានដែលនៅលើគេហទំព័រមួយនោះ មានតាំងពីអត្ថបទសរសេរ មានតាំងពីរូបភាព ឬក៏វីដេអូ ឬក៏សំឡេង ហើយនិងទីតាំងច្បាស់លាស់ដែលករណីនោះកើតឡើង បាទ !» ។
នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន លោក មឿន ឈានណារិទ្ធិ ស្វាគមន៍ការបង្កើតគេហទំព័រថ្មីនេះ ដោយលោកមានប្រសាសន៍ថាវាជាការប្រសើរក្នុងការលើកស្ទួយលទ្ធិប្រជាធិបតេយ្យនិងសេរីភាពបញ្ចេញមតិនៅកម្ពុជា៖ «ក្រោយពីការបោះឆ្នោតជាតិកាលពីខែកក្កដា ឆ្នាំ២០១៣ កន្លងមកនេះគឺថា មានការរឹតត្បិតព័ត៌មាន ជាពិសេសតាមរយៈការផ្សព្វផ្សាយរបស់ទូរទស្សន៍ដែលរឹតត្បិតមិនឲ្យការផ្សព្វផ្សាយព័ត៌មានពីគណបក្សប្រឆាំង គឺព័ត៌មានដែលមានការរិះគន់រដ្ឋាភិបាលហ្នឹងត្រូវគេបិទ ប៉ុន្តែសតវត្សទី២១នេះគឺយើងបិទលែងបានហើយ ។ ការបិទព័ត៌មានប្រៀបដូចជាការយកចង្អេរមួយទៅបាំងដំរីដែលស្លាប់អ៊ីចឹង គឺបិទអត់កើតទេ»។
គេហទំព័រ «សំឡេងប្រជាពលរដ្ឋ និងប្រព័ន្ធឆ្លើយតបជាសំឡេង» កើតឡើងក្រោមជំនួយឩបត្ថម្ភផ្នែកហិរញ្ញវត្ថុពីសហភាពអឺរ៉ុប ។ រហូតមកដល់ពេលនេះមជ្ឈមណ្ឌលអប់រំច្បាប់សម្រាប់សហគមន៍បណ្ដុះបណ្ដាលអ្នកសារព័ត៌មានសហគមន៍មានទាំងព្រះសង្ឃផងបានចំនួនជិត ១០០នាក់និងអង្គហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។