សង្គមស៊ីវិលជំរុញឲ្យមានការគ្រប់គ្រងជនអន្តោប្រវេសន៍និងជនបរទេសឲ្យបានល្អ
2014.08.28
មន្ត្រីជាន់ខ្ពស់រាជរដ្ឋាភិបាល អះអាងថា ក្រសួងការងារ និងក្រសួងមហាផ្ទៃ កំពុងសហការគ្នាដើម្បីស្វែងរកយន្តការគ្រប់គ្រងជនបរទេស ដែលកំពុងធ្វើការក្នុងប្រទេសកម្ពុជា និងជួយដល់ពលករខ្មែរទៅធ្វើការនៅក្រៅប្រទេស មុនពេលដែលកម្ពុជា ធ្វើសមាហរណកម្មបង្កើតសហគមន៍សេដ្ឋកិច្ចអាស៊ាននៅចុងឆ្នាំ២០១៥ ខាងមុខ។
ការបញ្ជាក់នេះ ធ្វើឡើងក្នុងសិក្ខាសាលាមួយស្តីអំពី «ការគ្រប់គ្រងទេសន្តរប្រវេសន៍ឲ្យបានល្អប្រសើរ» កាលពីថ្ងៃពុធ ទី២៧ ខែសីហា នៅសណ្ឋាគារកាំបូឌីយ៉ាណា (Cambodiana Hotel) ក្រុង ភ្នំពេញ ដែលរៀបចំដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា ហៅកាត់ថា ស៊ី.ឌី.អ.ងាយ (CDRI)។
នាយកប្រតិបត្តិអង្គការខារ៉ាមកម្ពុជា (Caram Cambodia) លោក យ៉ា ណាវុធ ដែលជាវាគ្មិនមួយរូបក្នុងសិក្ខាសាលានេះមានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា ការធ្វើឲ្យប្រសើរឡើងនូវការគ្រប់គ្រងជនបរទេសដែលរស់នៅ និងធ្វើការក្នុងប្រទេសកម្ពុជា មានសារសំខាន់ណាស់ក្នុងការរកប្រាក់ចំណូលបន្ថែមដល់ថវិកាជាតិ។ បន្ថែមពីនេះ លោកថា កម្ពុជា ត្រូវការរៀបចំយន្តការឲ្យច្បាស់លាស់ ដើម្បីអាចឲ្យពលរដ្ឋកម្ពុជា អាចស្វែងរកការងារធ្វើបាន។
លោក យ៉ា ណាវុធ៖ «នៅក្នុងការគ្រប់គ្រងទេសន្តរប្រវេសន៍ហ្នឹងជាការល្អ ប្រសិនបើរដ្ឋាភិបាលរៀបចំឲ្យពលករកំពុងធ្វើការងារក្នុងស្រុកយើងហ្នឹង ក្លាយជាពលករស្របច្បាប់ ដោយចុះបញ្ជីឲ្យបានត្រឹមត្រូវ យើងអាចពង្រឹងទៅលើចំណូលសម្រាប់ជាតិដែរ។ ប្រសិនបើមានជនជាតិបរទេសធ្វើការនៅប្រទេសយើងច្រើន យើងអាចមានឱកាសយកពន្ធយកថ្លៃពិនិត្យសុខភាព ថ្លៃចុះបញ្ជី ថ្លៃស្នាក់នៅ។ ទង្វើនេះអាចបង្កើនចំណូលថវិកាជាតិ ក្រោយពីការចុះថយផ្នែកខាងពន្ធគយ នៅពេលអាស៊ានធ្វើសមាហរណកម្មសេដ្ឋកិច្ចនៅចុងឆ្នាំ២០១៥ នេះ»។
តាមកិច្ចព្រមព្រៀង ប្រទេសទាំង១០នៃសមាគមអាស៊ាន នឹងធ្វើសមាហរណកម្មទីផ្សារការងារអាស៊ាននៅចុងឆ្នាំ២០១៥។ នេះមានន័យថា ប្រទេសជាសមាជិកទាំងអស់ អនុញ្ញាតឲ្យមានលំហូរពលកម្មជំនាញ និងការអភិវឌ្ឍធនធានមនុស្សក្នុងតំបន់។ ការស្រាវជ្រាវមួយកាលពីពេលថ្មីៗនេះរបស់វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា ដែលផ្សព្វផ្សាយក្នុងវែបសាយ (Website) របស់ខ្លួន បង្ហាញថា កម្ពុជា ត្រូវការវិស្វករចំនួន ៣ម៉ឺន ៥ពាន់នាក់ និងអ្នកបច្ចេកទេសចំនួន ៤ម៉ឺន ៦ពាន់នាក់ ដើម្បីអាចរក្សាកំណើនសេដ្ឋកិច្ច គឺផលិតផលសរុបក្នុងស្រុក (GDP) ឲ្យបានពី ៦% ទៅ ៨% ក្នុងអំឡុងពេល ៥ឆ្នាំខាងមុខ។ បញ្ហានេះហើយ ដែលអ្នកវិភាគសេដ្ឋកិច្ចបារម្ភថា កម្ពុជា ត្រូវខិតខំបង្កើនគុណភាពនៃការអប់រំ ជាពិសេសបង្កើនកម្មករជំនាញការងារឲ្យបានច្រើន ដើម្បីអាចប្រកួតប្រជែងជាមួយសមាជិកប្រទេសអាស៊ានផ្សេងទៀតក្នុងតំបន់។
ពាក់ព័ន្ធនឹងចំនួនជនទេសន្តរប្រវេសន៍នៅក្នុងប្រទេសកម្ពុជា រហូតមកដល់ពេលនេះ គេនៅពុំទាន់មានស្ថិតិពិតប្រាកដនោះឡើយ សូម្បីតែជនអន្តោប្រវេសន៍វៀតណាម ទាំងស្រប និងមិនស្របច្បាប់ ក៏នៅមិនទាន់មានតួលេខពិតប្រាកដផងដែរ។ លោកនាយករដ្ឋមន្ត្រី ហ៊ុន សែន ធ្លាប់ប្រកាសថា ជនអន្តោប្រវេសន៍វៀតណាម នៅកម្ពុជា មានជាង ១០ម៉ឺននាក់ ប៉ុន្តែប្រធានគណបក្សសង្គ្រោះជាតិ លោក សម រង្ស៊ី អះអាងថា ជនអន្តោប្រវេសន៍វៀតណាម រស់នៅកម្ពុជា បច្ចុប្បន្ន ប្រមាណជា ៥សែននាក់។
ប៉ុន្តែ អ្នកនាំពាក្យក្រសួងការងារ លោក ហេង សួរ ដែលជាវាគ្មិនមួយរូបទៀតក្នុងសិក្ខាសាលានេះមានប្រសាសន៍ថា ស្ថាប័នមួយចំនួនរបស់រដ្ឋាភិបាល កំពុងសហការគ្នាធ្វើជំរឿនដល់ជនបរទេសដែលកំពុងធ្វើការ និងរស់នៅក្នុងប្រទេសកម្ពុជា៖ «ចំពោះពលករបរទេសដែលធ្វើការនៅប្រទេសកម្ពុជា ក្នុងរយៈពេលចុងក្រោយនេះ អគ្គនាយកដ្ឋានអត្តសញ្ញាណកម្ម បានរួមសហការជាមួយអគ្គនាយកដ្ឋានការងារ និងអភិបាលកិច្ច កំពុងតែធ្វើការហ្នឹង ដើម្បីធានាថា អ្នកទាំងនោះមានឯកសារគ្រប់គ្រាន់ គឺមានទិដ្ឋាការស្នាក់នៅ និងមានប័ណ្ណអនុញ្ញាតការងារពីក្រសួងការងារ»។
បន្ថែមពីលើការគ្រប់គ្រងទេសន្តរប្រវេសន៍នៅកម្ពុជា រដ្ឋាភិបាល ក៏កំពុងគិតគូរជួយដល់ពលករខ្មែរចំណាកស្រុក ទៅធ្វើការនៅក្រៅប្រទេសផងដែរ រួមមាន នៅប្រទេសថៃ កូរ៉េខាងត្បូង ជាដើម។ ចំពោះបញ្ហានេះ លោក ហេង សួរ អគ្គនាយករដ្ឋបាល និងហិរញ្ញវត្ថុនៃក្រសួងការងារ គូសបញ្ជាក់ថា ក្រៅពីបង្កើតយន្តការច្បាស់លាស់ក្នុងការទាក់ទងជាមួយប្រទេសដែលទទួលពលករខ្មែរ ក្រសួងពាក់ព័ន្ធបានព្យាយាមសម្រួលដល់ការធ្វើសំបុត្រស្នាម និងផ្តល់ព័ត៌មានដល់ពលករដែលមានបំណងចង់ទៅធ្វើការនៅក្រៅប្រទេសដោយស្របច្បាប់៖ «ព្យាយាមបង្កើតឲ្យមានសេវាព័ត៌មាន និងយន្តការច្បាស់លាស់សម្រាប់បងប្អូនយើង គាត់អនុវត្តកម្មវិធីហ្នឹង។ បន្ថែមទៀត សម្រាប់ពលករមានបំណងទៅធ្វើការប្រទេសក្រៅមានឯកសារគ្រប់គ្រាន់ រដ្ឋាភិបាលជួយ ១០០ដុល្លារ ចំណែកក្រសួងទទួលបន្ទុកការងារនេះ រួមមានក្រសួងមហាផ្ទៃ និងក្រសួងការងារ សម្រួលឲ្យកិច្ចការនេះចេញឆាប់រហ័ស។ ក្រៅពីនេះ យើងបានព្យាយាមទំនាក់ទំនងជាមួយប្រទេសទទួលពលករយើង ក្នុងនោះរួមទាំងប្រទេសថៃ ផង ដើម្បីជំរុញយន្តការ និងនីតិវិធីផ្សេងៗ ដើម្បីឲ្យពលករយើងមានភាពស្របច្បាប់ ដែលកំពុងស្នាក់នៅ និងធ្វើការ»។
នាយកប្រតិបត្តិអង្គការខារ៉ាមកម្ពុជា លោក យ៉ា ណាវុធ សម្ដែងក្តីសង្ឃឹមថា កម្ពុជា នឹងអាចពុះពារឧបសគ្គទាំងនោះបាន ប្រសិនបើរាជរដ្ឋាភិបាលអនុវត្តដោយយកចិត្តទុកដាក់ និងមានឆន្ទៈដោះស្រាយបញ្ហាពលករខ្មែរចំណាកស្រុក និងទេសន្តរប្រវេសន៍នៅកម្ពុជា៖ «ទី១ ដើម្បីគ្រប់គ្រងបញ្ហាទេសន្តរប្រវេសន៍ឲ្យបានល្អប្រសើរ រដ្ឋាភិបាលគួរបញ្ចូលបញ្ហាទេសន្តរប្រវេសន៍នេះទៅក្នុងគោលនយោបាយសាធារណៈ។ ចំណុចទី២ យើងគួរបង្កើតទិន្នន័យគ្រប់គ្រងទាំងថ្នាក់មូលដ្ឋាន និងថ្នាក់ជាតិ ហើយរៀបចំបណ្តុះបណ្តាលឲ្យគាត់ក្លាយជាពលករមានជំនាញទាំងនៅមជ្ឈមណ្ឌល និងនៅថ្នាក់មូលដ្ឋាន។ ទី៣ ត្រូវធ្វើការសិក្សាអំពីតម្រូវការ ដើម្បីឆ្លើយតបទៅនឹងបញ្ហាប្រឈមដែលពលករមាន»។
លោកគូសបញ្ជាក់ថា រដ្ឋាភិបាលមានអនុក្រឹត្យ និងគោលការណ៍ណែនាំល្អៗ ប៉ុន្តែទាមទារឲ្យការអនុវត្តមានប្រសិទ្ធភាព និងសហការជាមួយអង្គការសង្គមស៊ីវិល៕