មេ​ឃុំ​ខេត្ត​ស្ទឹងត្រែង​រង​ការ​ចោទ​ថា​មិន​បើក​ប្រាក់​ខែ​ឲ្យ​សមាជិក​ក្រុម​ប្រឹក្សា​មក​ពី​បក្ស​ប្រឆាំង

ដោយ ម៉ែន សុធីរ
2016-02-14
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
២១-ធ្នូ-២០១៥៖ ទី​រួម​ខេត្ត​ស្ទឹងត្រែង។
២១-ធ្នូ-២០១៥៖ ទី​រួម​ខេត្ត​ស្ទឹងត្រែង។
RFA/Men Sothyr

សមាជិក​ក្រុមប្រឹក្សា​ឃុំ​តាឡាត ស្រុក​សេសាន ខេត្ត​ស្ទឹងត្រែង មក​ពី​គណបក្ស សម រង្ស៊ី ចោទ​មេ​ឃុំ​តាឡាត ថា​បង្កក​ប្រាក់​ខែ​ក្រោម​ហេតុផល​នយោបាយ។ ការ​ចោទ​ប្រកាន់​នេះ បន្ទាប់​ពី​មេ​ឃុំ​តាឡាត លោក សឿង ខង មិន​បាន​បើក​ប្រាក់​ខែ​ឲ្យ​សមាជិក​ក្រុមប្រឹក្សា​ឃុំ​ម្នាក់​តាំង​ពី​ខែ​សីហា ឆ្នាំ​២០១៥ រហូត​ដល់​បច្ចុប្បន្ន ដោយ​សំអាង​ថា សមាជិក​ក្រុមប្រឹក្សា​ឃុំ​រូប​នោះ មិន​បាន​បំពេញ​កាតព្វកិច្ច​ការងារ។

សមាជិក​ក្រុមប្រឹក្សា​ឃុំ​តាឡាត ស្រុក​សេសាន មក​ពី​គណបក្ស សម រង្ស៊ី អំពាវនាវ​ឲ្យ​អាជ្ញាធរ​ខេត្ត អន្តរាគមន៍​ទាក់ទិន​ការ​បង្កក​ប្រាក់​ខែ​របស់​លោក​ដោយ​គ្មាន​មូលដ្ឋាន ផ្ទុយ​ពី​គោលការណ៍​ណែនាំ​របស់​ប្រមុខ​រដ្ឋាភិបាល និង​ច្បាប់​ស្ដីពី​បក្ស​នយោបាយ។

ក្រុមប្រឹក្សា​ឃុំ​តាឡាត មក​ពី​គណបក្ស សម រង្ស៊ី លោក អូទ ឃុន ចោទ​ប្រកាន់​ថា មេ​ឃុំ​តាឡាត លោក សឿង ខង មាន​ចេតនា​បង្កក​ប្រាក់​ខែ​លោក ក្រោម​ហេតុផល​មិន​បាន​បំពេញ​តួនាទី​ជា​ក្រុមប្រឹក្សា​ឃុំ ដោយ​ខកខាន​មិន​បាន​មក​ប្រជុំ​តាម​ការ​អញ្ជើញ​របស់​មេ​ឃុំ​កន្លង​មក។ លោក​ចាត់​ទុក​ថា ការ​មិន​បើក​ប្រាក់​ជាច្រើន​ខែ​មក​នេះ គឺ​ជា​ចេតនា​រើសអើង​បក្ស​នយោបាយ៖ «ខែ​៨ មក​ដល់​ឥឡូវ គេ​មិន​បាន​បើក​ប្រាក់​ខែ​ឲ្យ​ខ្ញុំ​ទេ។ ថ្ងៃ​២៥ គេ​បាន​ហៅ​ខ្ញុំ​ទៅ​ប្រជុំ គេ​ប្រជុំ​ថ្ងៃ​២៥ មេ​ឃុំ​បោក​ខ្ញុំ​ទៅ​ប្រជុំ​នៅ​សាលា​ខេត្ត​វិញ»

វិទ្យុ​អាស៊ីសេរី មិន​អាច​ទាក់ទង​មេ​ឃុំ​តាឡាត លោក សឿង ខង ដើម្បី​សុំ​ការ​បំភ្លឺ​ជុំវិញ​ការ​ចោទ​ប្រកាន់​នេះ​បាន​ទេ នៅ​ថ្ងៃ​ទី​១៣ កុម្ភៈ ព្រោះ​ទូរស័ព្ទ​ហៅ​ចូល​ច្រើន​ដង​ពុំ​មាន​អ្នក​ទទួល។

អនុប្រធាន​ប្រតិបត្តិ​គណបក្ស​សង្គ្រោះ​ជាតិ ខេត្ត​ស្ទឹងត្រែង លោក សាត ស៊ិន អះអាង​ថា ការ​បង្កក​ប្រាក់​ខែ​របស់​សមាជិក​ក្រុមប្រឹក្សា​ឃុំ គឺ​ជា​ទង្វើ​ខុស​នីតិវិធី ព្រោះ​ការ​ឡើង​កាន់​តំណែង​របស់​សមាជិក​ក្រុមប្រឹក្សា​ឃុំ គឺ​ឡើង​តាម​ប្រព័ន្ធ​សមាមាត្រ​ដោយ​បោះ​ឆ្នោត​ជ្រើស​តាំង​ពី​ពលរដ្ឋ។ ដូច្នេះ ការ​បង្កក​ប្រាក់​ខែ​អាច​ធ្វើ​បាន លុះត្រា​តែ​មាន​លិខិត​ស្នើសុំ​ពី​គណបក្ស​នយោបាយ ទៅ​ក្រសួង​មហាផ្ទៃ ដើម្បី​ធ្វើ​ការ​ផ្លាស់ប្ដូរ​សមាសភាព​ក្រុមប្រឹក្សា​ឃុំ​ជា​មុន​សិន៖ «មេ​ឃុំ​ពេល​ឃើញ​បុគ្គល​អនុវត្ត ឧបមា​ថា ៣​ខែ​ជាប់ៗ​គ្នា ប្រជុំ​មួយ​ខែ​ម្តង ក្រុមប្រឹក្សា​ឃុំ​ស្រាប់​តែ​គាត់​មិន​បាន​មក​ប្រជុំ​ទេ។ ចឹង​មេ​ឃុំ​គាត់​ធ្វើ​លិខិត​មួយ​ស្នើ​មក​គណបក្ស សុំ​ធ្វើ​ការ​ផ្លាស់ប្ដូរ​បុគ្គល នៅ​ពេល​ធ្វើ​ការ​ផ្លាស់ប្ដូរ​គណបក្ស គេ​ហៅ​មក​អប់រំ បើ​បុគ្គល​នៅ​តែ​ប្រព្រឹត្ត​អា​ហ្នឹង គណបក្ស​ធ្វើ​លិខិត​មួយ​ផ្ញើ​ទៅ​ក្រសួង​មហាផ្ទៃ ដើម្បី​ធ្វើ​ការ​ដោះ​ដូរ។ ប៉ុន្តែ​នេះ​មេ​ឃុំ​អត់​មាន​ទេ គាត់​មាន​ចេតនា​ធ្វើ​ចឹង​ទេ ហើយ​ផ្លូវ​ច្បាប់​គាត់​អត់​បាន​ធ្វើ​អី​ទាំងអស់ ស្រាប់​គាត់​យក​ប្រាក់​ខែ​ពី​ធនាគារ​អេស៊ីលីដា (ACLEDA Bank) គាត់​យក​បំបាត់​របស់​គេ​តាំង​ពី​ខែ​៨ ដល់​ខែ​ហ្នឹង»

មន្ត្រី​សម្រប​សម្រួល​នៃ​សមាគម​អាដហុក (ADHOC) ខេត្ត​ស្ទឹងត្រែង លោក ហូ សំអុល ស្នើ​ឲ្យ​អាជ្ញាធរ​ខេត្ត ចុះ​ស៊ើប​អង្កេត​ករណី​នេះ ដើម្បី​ចៀសវាង​ប៉ះពាល់​ដល់​ដំណើរ​ការ​អភិវឌ្ឍ​មូលដ្ឋាន។ លោក​ចាត់​ទុក​ការ​បង្កក​ប្រាក់​ខែ អាច​មាន​ភាព​មិន​ប្រក្រតី ព្រោះ​មេ​ឃុំ​ពុំ​មាន​សិទ្ធិ​សម្រេច​បង្កក​ប្រាក់​ខែ​ដល់​ក្រុមប្រឹក្សា​ឃុំ​ណា​មួយ​ឡើយ៖ «មេ​ឃុំ​មិន​បើក​ប្រាក់​ខែ​ឲ្យ​គេ មេ​ឃុំ​គឺ​ត្រូវ​ទទួល​ខុស​ត្រូវ​តាម​ផ្លូវ​ច្បាប់។ ខាង​ក្រុមប្រឹក្សា​ឃុំ​ដែល​មិន​បាន​ប្រាក់​ខែ គាត់​ត្រូវ​តែ​ធ្វើ​របាយការណ៍​ទៅ​ខេត្ត ឬ​ក្រសួង​មហាផ្ទៃ»

ប្រធាន​ប្រតិបត្តិ​គណបក្ស​សង្គ្រោះ​ជាតិ ខេត្ត​ស្ទឹងត្រែង លោក ពុយ ចាន់ថាឡា អះអាង​ថា គណបក្ស​លោក​នឹង​រៀបចំ​ពាក្យ​បណ្ដឹង​ទៅ​អង្គភាព​ប្រឆាំង​អំពើ​ពុក​រលួយ បើ​មេ​ឃុំ​នៅ​តែ​មានៈ​មិន​បើក​ប្រាក់​ខែ​ឲ្យ​សមាជិក​ក្រុមប្រឹក្សា​ឃុំ។ លោក​ថា ការ​បង្កក​ប្រាក់​ខែ គឺ​ជា​ចេតនា​លេស​នយោបាយ​មិន​ចង់​មាន​វត្តមាន​គណបក្ស​ជំទាស់​នៅ​មូលដ្ឋាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

លុយជាតិមិនមែនលុយម៉ែមេឃុំហ្នឹងទេ ហេតុអ្វីមិនបើកឲ្យគេ???

Feb 15, 2016 12:48 AM

គេហទំព័រ​ទាំងមូល