អាជ្ញាធរ និងប្រជាពលរដ្ឋស្រុកភ្នំស្រួច ខេត្តកំពង់ស្ពឺ បានរអ៊ូរទាំថា សកម្មភាពកាប់ឈើតូចធំដឹកតាមរថយន្តធុនធ្ងន់ កំពុងកើតមាននៅក្នុងមូលដ្ឋានឃុំដំបូករ៉ូង អនាធិបតេយ្យ និងបំផ្លាញផ្លូវធ្វើដំណើរស្ទើរគ្មានសល់។ ពលរដ្ឋចោទថា បទល្មើសទាំងនេះគ្មានមន្ត្រីជំនាញចុះជួយទប់ស្កាត់ទេកន្លងមក។
ប្រជាពលរដ្ឋមូលដ្ឋានឃុំដំបូករ៉ូង ចោទថា សកម្មភាពកាប់បំផ្លាញព្រៃឈើក្នុងខេត្តកំពង់ស្ពឺ ស្ទើរតែរលាយហិនហោចទៅហើយ ដោយមិនឃើញមន្ត្រីជំនាញស្ថាប័នពាក់ព័ន្ធ ចេញមុខទប់ស្កាត់ទេ។ ជាងនេះ ផ្លូវលំក្នុងមូលដ្ឋាន ត្រូវបំផ្លាញអស់ស្ទើរតែទាំងស្រុង ដោយសាររថយន្តដឹកឈើធំៗរបស់ឈ្មួញដែលមានខ្នងបង្អែកជាមន្ត្រីយោធា។
ពលរដ្ឋឲ្យដឹងថា ជារៀងរាល់ថ្ងៃ មានរថយន្តធំៗមិនតិចជាង ៥គ្រឿង បានដឹកឈើគ្រប់ប្រភេទចេញពីមូលដ្ឋានឃុំដំបូងរ៉ូង ស្រុកភ្នំស្រួច និងបានបំផ្លាញផ្លូវលំក្នុងមូលដ្ឋានខូចខាតស្ទើរទាំងស្រុង។ ករណីនេះ ពលរដ្ឋអំពាវនាវដល់មន្ត្រីពាក់ព័ន្ធថ្នាក់ជាតិ ជួយមានវិធានការទប់ស្កាត់ ព្រោះការហាមឃាត់របស់មន្ត្រីមូលដ្ឋានគ្មានប្រសិទ្ធភាពទេ៖ «ដឹកៗអាក្រក់អាក្រីបំផុត គឺដឹកបំផ្លាញផ្លូវចោលតែម្តង។ ផ្លូវធ្លាប់តែប្រជាពលរដ្ឋបើកគោយន្តទៅស្រែភ្ជួររាស់បាន ប៉ុន្តែឥឡូវគ្រាន់តែបើកគោយន្តទទេ ក៏ជាប់ផុងដែរ។ កូនឈើទាំងអស់ហ្នឹងមានដើមផ្ចឹក សុក្រំ ឬខ្លុង ត្បែង ជាដើម។ ហើយឡានដឹកហ្នឹង ជាប្រភេទឡានយីឌុប គឺឡានកងទ័ព ឬឡានកងពល។ គេថា គេដឹករកស៊ីចិញ្ចឹមកងពល។ គេកាប់ឈើគ្រប់ប្រភេទ ហើយមកបំផុសបំផុលប្រជាជនឲ្យកាប់ឈើដាក់គោយន្ត ដាក់ត្រាក់ទ័រ ជញ្ជូនយ៉ាងគគ្រឹកគគ្រេងដាក់ចូលឡានរាល់ថ្ងៃ គឺឈើទាំងធំទាំងតូច។ មិនមែនឈ្មួញទេ គឺយោធាតែម្តង។ គេថាមកពីកងពលដឹកគគ្រឹកគគ្រេង ដឹកជញ្ជូនមួយថ្ងៃៗខូចផ្លូវអស់ហើយ។ ដឹកវាលើសទម្ងន់ឡានធំៗច្រើនគ្រឿង»។
ទាក់ទិនបញ្ហានេះ លោក ខៀវ វណ្ណា មេឃុំដំបូករ៉ូង ស្រុកភ្នំស្រួច ទទួលស្គាល់ថា ពិតជាមានរថយន្តធំៗដឹកឈើអនាធិបតេយ្យក្នុងមូលដ្ឋានលោកពិតមែន។ លោកថា សកម្មភាពនេះ រូបលោករួមជាមួយពលរដ្ឋ ធ្លាប់បានណែនាំដល់ឈ្មួញទាំងនោះជាច្រើនលើកច្រើនសា ប៉ុន្តែម្ចាស់អាជីវកម្មដែលមានខ្នងបង្អែកជាមន្ត្រីយោធា មិនស្តាប់តាមទេ និងប្រើអំណាចគំរាមកំហែងថែមទៀត។ លោកបន្តថា បទល្មើសព្រៃឈើដោយប្រើរថយន្តដឹកលើសទម្ងន់នៅស្រុកភ្នំស្រួច រូបលោកបានសុំកិច្ចអន្តរាគមន៍ទៅមន្ត្រីរដ្ឋបាលព្រៃឈើ មន្ត្រីថ្នាក់ស្រុក និងថ្នាក់ដឹកនាំខេត្តកំពង់ស្ពឺ ជួយទប់ស្កាត់ ប៉ុន្តែមិនមានប្រសិទ្ធភាពទេ។
លោកអំពាវនាវដល់ប្រមុខរដ្ឋាភិបាល និងស្ថាប័នជំនាញថ្នាក់ជាតិ ជួយមានវិធានការបញ្ឈប់សកម្មភាពរថយន្តធំៗ ដឹកឈើលើសទម្ងន់ក្នុងមូលដ្ឋានស្រុកភ្នំស្រួច ឲ្យបានឆាប់៖ «ឡានទាហានវាដឹកឈើលើសចំណុះ ហើយយើងបានស្នើឲ្យជួយជួសជុលផ្លូវបានខ្លះ ក៏ប៉ុន្តែក្រោយមកទៀត មានឡានមួយចំនួន គេបានគោរពតាមគោលការណ៍ដឹកស្មើៗទ្រុងខ្លះដែរ។ ខ្ញុំបានរាយការណ៍ការងារហ្នឹងជូនលោកអភិបាលស្រុក និងមន្ត្រីមេព្រៃ ឬរដ្ឋបាលព្រៃឈើរួចហើយដែរ។ ប៉ុន្តែវិធានការទាំងអស់ហ្នឹង វាមិនបានជោគជ័យទេ ហើយឡានទាហានហ្នឹងបានបន្តដឹកអនាធិបតេយ្យ។ ប៉ុន្តែបើឡានខុសពីឡានទាហាន គឺមិនអីទេ គេគោរព តែបើឡានទាហានហ្នឹង ច្រើនតែមិនគោរព»។
អភិបាលស្រុកភ្នំស្រួច លោក ពេជ្រ ចន្ថា បដិសេធមិនធ្វើអត្ថាធិប្បាយជុំវិញបទល្មើសព្រៃឈើ ប្រើរថយន្តធំៗដឹកបំផ្លាញផ្លូវលំនៅស្រុកភ្នំស្រួច បានទេតាមទូរស័ព្ទ នៅថ្ងៃអង្គារ ទី១២ ខែសីហា។ ប៉ុន្តែបញ្ហានេះ កន្លងមក លោកនាយករដ្ឋមន្ត្រី ហ៊ុន សែន ធ្លាប់បានព្រមានដល់មន្ត្រីពាក់ព័ន្ធក្រោមឱវាទ ពិសេសមន្ត្រីយោធា មិនត្រូវជាប់ពាក់ព័ន្ធនឹងបទល្មើសព្រៃឈើនោះទេ និងបានព្រមានដកតួនាទី ព្រមទាំងចាត់វិធានការតាមផ្លូវច្បាប់ ចំពោះជនប្រព្រឹត្តិល្មើសថែមទៀត។ ជាងនេះ ប្រមុខដឹកនាំ ក៏បានដាក់បទបញ្ជាទៅដល់មន្ត្រីនៅតាមរាជធានីខេត្តនីមួយៗ ត្រូវថែរក្សា និងការពារផ្លូវដែលបណ្ដាលមកពីរថយន្តធុនធ្ងន់ដឹកលើសទម្ងន់ ជាដើម។
ទោះយ៉ាងណា ប្រជាពលរដ្ឋ និងសង្គមស៊ីវិលមួយចំនួនមើលឃើញថា បទបញ្ជា ឬសារអំពាវនាវរបស់លោកនាយករដ្ឋមន្ត្រី ហ៊ុន សែន មិនមានមន្ត្រីក្រោមឱវាទអនុវត្តតាមទេ ហើយបទល្មើសព្រៃឈើ ឬរថយន្តដឹកលើសទម្ងន់ នៅបន្តកើតមានជារៀងរាល់ថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។