ព្រះសង្ឃ​និង​ពលរដ្ឋ​មួយ​ចំនួន​បារម្ភ​ខ្លាច​មាន​ការ​ចាប់​ខ្លួន​លោក គឹម សុខ

ដោយ សេក បណ្ឌិត
2017-02-16
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
អ្នក​ឃ្លាំមើល​បញ្ហា​សង្គម និង​នយោបាយ លោក គឹម សុខ និង​ព្រះសង្ឃ ប៊ុត ប៊ុនតិញ ធ្វើ​ដំណើរ​ទៅ​សាលាដំបូង​រាជធានី​ភ្នំពេញ នៅ​ព្រឹក​ថ្ងៃ​ទី​១៧ កុម្ភៈ ឆ្នាំ​២០១៧។ RFA
អ្នក​ឃ្លាំមើល​បញ្ហា​សង្គម និង​នយោបាយ លោក គឹម សុខ និង​ព្រះសង្ឃ ប៊ុត ប៊ុនតិញ ធ្វើ​ដំណើរ​ទៅ​សាលាដំបូង​រាជធានី​ភ្នំពេញ នៅ​ព្រឹក​ថ្ងៃ​ទី​១៧ កុម្ភៈ ឆ្នាំ​២០១៧។ RFA
Photo: RFA

ព្រះសង្ឃ និង​ប្រជាពលរដ្ឋ​មួយ​ចំនួន​បារម្ភ​ខ្លាច​មាន​ការ​ចាប់​ខ្លួន​លោក គឹម សុខ អ្នក​ឃ្លាំមើល​បញ្ហា​សង្គម និង​នយោបាយ ដែល​លោក​ត្រូវ​ចូល​ខ្លួន​ទៅ​បំភ្លឺ​នៅ​សាលាដំបូង​រាជធានី​ភ្នំពេញ នៅ​ថ្ងៃ​សុក្រ ទី​១៧ ខែ​កុម្ភៈ ពាក់ព័ន្ធ​នឹង​បណ្ដឹង​របស់​លោក​នាយករដ្ឋមន្ត្រី ហ៊ុន សែន។

​ស្ថាបនិក​បណ្ដាញ​ព្រះសង្ឃ​ឯករាជ្យ​ដើម្បី​យុត្តិធម៌​សង្គម ព្រះអង្គ ប៊ុត ប៊ុនតិញ និង​ព្រះសង្ឃ​មួយ​ចំនួន​ទៀត អម​ដំណើរ​លោក គឹម សុខ ទៅ​តុលាការ និង​ចូលរួម​រៀបចំ​បង្កើត «មូលនិធិ គឹម សុខ» ដើម្បី​លើក​ទឹក​ចិត្ត និង​គាំទ្រ​លោក​ដែល​កំពុង​ស្ថិត​ក្នុង​ស្ថានភាព​លំបាក។ស្ថាបនិក​បណ្ដាញ​ព្រះសង្ឃ​ឯករាជ្យ ព្រះ​តេជគុណ ប៊ុត ប៊ុនតិញ ឲ្យ​ដឹង​ថា ការ​អម​ដំណើរ​នេះ​នឹង​មិន​ធ្វើ​ជា​ទ្រង់ទ្រាយ​ធំ​ដុំ​នោះ​ទេ ដើម្បី​ជៀសវាង​ការ​រំខាន​ពី​សមត្ថកិច្ច​អាជ្ញាធរ។
​ដំណើរ​នេះ អាច​មាន​ព្រះសង្ឃ​ប្រមាណ ៥​អង្គ និង​ប្រជាពលរដ្ឋ​ប្រមាណ​ជាង ១០​នាក់​ប៉ុណ្ណោះ។

​កម្មវិធី​នេះ គឺ​ចាប់​ផ្ដើម​ចេញ​ដំណើរ​ដោយ​ថ្មើរ​ជើង​ចេញ​ពី​វត្ត​ពោធិយារាម ហៅ​វត្ត​ចាស់ នៅ​សង្កាត់​ជ្រោយចង្វារ រាជធានី​ភ្នំពេញ នៅ​ម៉ោង ៧​កន្លះ​ព្រឹក ដោយ​ដំណើរ​យឺតៗ និង​ធ្វើ​សមាធិ​ផង ឆ្លង​កាត់​ទីតាំង​សំខាន់ៗ​ក្នុង​រាជធានី​ភ្នំពេញ ហើយ​ចុង​ក្រោយ​ឆ្ពោះ​ទៅ​សាលាដំបូង​រាជធានី​ភ្នំពេញ តែម្ដង៖ «អាត្មា​នាំ គឹម សុខ ដើរ​មើល​មាត់​ទន្លេ ដើរ​មើល​មុខ​វាំង វត្ត​ភ្នំ​អី​ហ្នឹង​ឲ្យ​អស់ ដើរ​ធ្វើ​សមាធិ អប់រំ​ចិត្ត​ឲ្យ​ហើយ លើក​ទឹក​ចិត្ត​លោក គឹម សុខ ថា​បើ​ជាប់​ពន្ធនាគារ គឺ​ជាប់​ដោយ​សេចក្ដី​ថ្លៃថ្នូរ ហើយ​ខ្មែរ​មួយ​នគរ​គាំទ្រ​លោក»

​ទន្ទឹម​គ្នា​នោះ​ដែរ ព្រះអង្គ ប៊ុត ប៊ុនតិញ ក៏​កំពុង​ស្វែង​រក​អ្នក​គ្រប់គ្រង​ចាត់ចែង​ថវិកា​តាម​រយៈ​គណៈកម្មការ​មួយ​ច្បាស់លាស់​នៅ​ពេល «មូលនិធិ គឹម សុខ» ត្រូវ​បាន​បង្កើត​ឡើង​ជា​ផ្លូវការ​ហើយ​នោះ។

ព្រះអង្គ​ក៏​បាន​បញ្ជាក់​ពី​ទស្សនវិស័យ និង​គោលបំណង​នៃ​ការ​បង្កើត​មូលនិធិ​នេះ​ផង​ដែរ៖ «បង្កើត​មូលនិធិ​នេះ​យើង​ចង់​ជួយ​ដល់​សង្គម​ជាតិ​ជួយ​ដល់​ការ​អប់រំ​មនុស្ស​ឲ្យ​យល់​ដឹង រស់​នៅ​ក្នុង​សង្គម​មនុស្ស​ដោយ​សេចក្ដី​ថ្លៃថ្នូរ មាន​ការ​ចេះ​ដឹង រស់​នៅ​ដោយ​ស្មើ​ភាព​គ្នា ជួយ​កិច្ចការ​សង្គម និង​ជួយ​ដល់​គ្រួសារ​លោក គឹម សុខ បើសិនជា​លោក​ត្រូវ​ជាប់​ពន្ធនាគារ»

​ព្រះអង្គ​បញ្ជាក់​ទៀត​ថា ថវិកា​ដែល​ចូល​មក​ក្នុង​មូលនិធិ​នេះ​មិន​ដើម្បី​យក​ទៅ​សម្រាប់​សង​ជំងឺ​ចិត្ត​លោក ហ៊ុន សែន នោះ​ទេ និង​ខុស​ស្រឡះ​ពី​គោលបំណង​របស់​លោក ហ៊ុន សែន ដែល​ប្តឹង​ចង់​ឲ្យ គឹម សុខ ជាប់​គុក និង​ទារ​ប្រាក់​ដ៏​ច្រើន​លើសលប់​រហូត​ដល់​ទៅ ៥០​ម៉ឺន​ដុល្លារ ពី​ចុងចោទ​ក្រីក្រ​ស្នាក់​នៅ​ផ្ទះ​ជួល ពាក់​តែ​ខោអាវ​ជជុះ​នោះ៖ «ពួក​យើង​បាន​ពិភាក្សា​គ្នា​ច្បាស់​ណាស់​ថា បើ​ជន​រួម​ជាតិ​គាត់​ចង់​ជួយ​គ្រាន់​តែ​ប្រមូល​ថវិកា​មក​ដើម្បី​សង​ជំងឺ​ចិត្ត​លោក​នាយករដ្ឋមន្ត្រី​គឺ​វា​ខុស​ព្រោះ​លោក​ជា​អ្នក​មាន ប៉ុន្តែ​បើ​តាម​ប្រសាសន៍​របស់​លោក​នាយករដ្ឋមន្ត្រី​ថា យក​លុយ​ទាំ ៥០​ម៉ឺន​នោះ​ទៅ​ជួយ​ជន​ពិការ អាត្មា​ថា​ទេ! ព្រោះ​អា​លុយ​នោះ​វា​ក្ដៅ​យក​ទៅ​ជួយ​ជន​ពិការ វា​ក្ដៅ​ដល់​ជន​ពិការ​ទៀត»

​មូលនិធិ​នេះ គ្រោង​បង្កើត​នៅ​ធនាគារ អេស៊ីលីដា (ACLEDA) និង​មីក្រូហិរញ្ញវត្ថុ វីង (Wing) ប៉ុន្តែ​មិន​ទាន់​មាន​ឈ្មោះ​គណនី​ធនាគារ (Bank Account) នោះ​ជាក់លាក់​នៅ​ឡើយ។

​លោក គឹម សុខ បាន​គាំទ្រ​ការ​ផ្ដួចផ្ដើម​បង្កើត​មូលនិធិ​នេះ និង​បាន​សម្រេច​ប្រគល់​សិទ្ធិ​ជូន​ព្រះតេជព្រះគុណ ប៊ុត ប៊ុនតិញ និង​លោក ប៉ា ងួនទៀង ជា​អ្នក​រៀបចំ​ចាត់ចែង​ទាំង​ស្រុង។ លោក​បន្ត​ថា មូលនិធិ​នេះ​នឹង​បម្រើ​ដល់​ប្រយោជន៍​ប្រជារាស្ត្រ​រងគ្រោះ​ក្រីក្រ​ជា​សំខាន់។

ព្រះអង្គ ប៊ុត ប៊ុនតិញ បាន​ទទួល​យក​នូវ​សំណើ​នេះ​ហើយ ប៉ុន្តែ​មិន​ទាន់​មាន​ការ​ឆ្លើយ​តប​ពី​ប្រធាន​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ លោក ប៉ា ងួនទៀង នៅ​ឡើយ​ទេ ប៉ុន្តែ​សកម្មភាព​នេះ​កំពុង​ធ្វើ​ដំណើរ​ទៅ​មុខ​ជា​បណ្តើរៗ​ហើយ។

លោក គឹម សុខ បាន​ដាក់​លិខិត​សុំ​ពន្យារ​ពេល​ចូល​ឆ្លើយ​បំភ្លឺ​មុន​មួយ​ថ្ងៃ​នៃ​ដីកា​កោះ​ឲ្យ​បង្ហាញ​ខ្លួន​នៅ​ថ្ងៃ​ទី​១៧ ខែ​កុម្ភៈ នេះ នៅ​តុលាការ​ក្រុង​ភ្នំពេញ។ ប៉ុន្តែ​សំណើ​របស់​អ្នក​ឃ្លាំមើល​សង្គម និង​នយោបាយ​ដែល​រង​ការ​ប្ដឹង​ពី​លោក ហ៊ុន សែន ត្រូវ​តុលាការ​ក្រុង​ភ្នំពេញ ច្រាន​ចោល​ភ្លាមៗ។

នៅ​ស្រប​ពេល​នៃ​ការ​សុំ​ពន្យារ​ពេល​ចូល​បំភ្លឺ​របស់​លោក គឹម សុខ នេះ មេធាវី​តំណាង​ដោយ​អាណត្តិ​របស់​លោក ហ៊ុន សែន បាន​យក​បណ្ដឹង​មួយ​ថ្មី​មួយ​ទៀត ប្ដឹង​អ្នក​ឃ្លាំមើល​សង្គម និង​នយោបាយ​រូប​នេះ កាល​ពី​​ព្រឹក​ថ្ងៃ​ទី​១៦ ខែ​កុម្ភៈ។ បណ្ដឹង​ដាច់​ដោយ​ឡែក​មួយ​ទៀត​នេះ ត្រូវ​បាន​លោក គី តិច បញ្ជាក់​ថា លោក​ប្ដឹង​ពី​បទ​ថា លោក គឹម សុខ បរិហារកេរ្តិ៍​រដ្ឋាភិបាល​ថា បាន​រៀបចំ​ជា​ប្រព័ន្ធ​ក្នុង​ការ​សម្លាប់​មនុស្ស។

​ថ្លែង​ក្រោយ​ចេញ​ពី​តុលាការ​វិញ លោក គី តិច បាន​ប្រាប់​អ្នក​កាសែត​ថា បណ្ដឹង​ទី​២​នេះ គឺ​លោក ហ៊ុន សែន ទាមទារ​សំណង​ជំងឺ​ចិត្ត​ចំនួន ១០​លាន​រៀល​បន្ថែម​ទៀត។ លោក​បន្ត​ថា ប្រសិនបើ​លោក គឹម សុខ ពុំ​មាន​លទ្ធភាព​បង់​សង​ទេ តុលាការ​នឹង​ប្រើប្រាស់​វិធានការ​តាម​ផ្លូវ​ច្បាប់៖ «តែ​អត់​មាន​អី​សង អា​ហ្នឹង​គេ​មាន​នីតិវិធី​គេ គេ​អាច​ចាប់​ឃុំ​ខ្លួន​ដាក់​ពន្ធនាគារ​បង្ខំ​លើ​រូប​កាយ​ទាមទារ​សំណង»

​លោក គឹម សុខ នៅ​តែ​បញ្ជាក់​ជំហរ​ថា លោក​នឹង​នៅ​តែ​វិភាគ​ពី​ព្រឹត្តិការណ៍​សង្គម ប្រសិន​បើ​លោក​នៅ​មាន​ឱកាស៖ «ខ្ញុំ​មាន​លុយ​ឯ​ណា​ដូច​អ្នក​កាប់​ឈើ ដូច​អ្នក​លក់​ដី​រដ្ឋ លក់​អគារ​រដ្ឋ  បឹង​រដ្ឋ ដូច្នេះ​គោល​ជំហរ​ខ្ញុំ​នៅ​ដដែល គឺ​នៅ​តតាំង​ក្នុង​រឿង​ក្តី​នេះ​នៅ​តុលាការ ជាមួយ​លោក​នាយករដ្ឋមន្ត្រី ហ៊ុន សែន និង​គណបក្ស​ប្រជាជន ទី​ពីរ​អត់​ផ្លាស់ប្ដូរ​ទេ​ចំពោះ​ជំហរ​នៃ​ការ​អត្ថាធិប្បាយ​អំពី​បញ្ហា​សង្គម និង​នយោបាយ អត់​ផ្លាស់ប្ដូរ​ទាល់​តែ​សោះ! និយាយ​ដោយ​ត្រង់ បើ​មាន​សេរីភាព​និយាយ គឺ​និយាយ​ឲ្យ​កាន់​តែ​ចំ​ជាង​មុន​ទៅ​ទៀត»

​តែ​ទោះ​យ៉ាង​ណា​ក្តី លោក គឹម សុខ បាន​ស្នើសុំ​ម្យ៉ាង​ពី​លោក ហ៊ុន សែន គឺ​កុំ​ឲ្យ​គេ​ទៅ​ឆាឆៅ ឬ​អុក​ឡុក​ក្រុម​គ្រួសារ​របស់​លោក​ដែល​មិន​ដឹង​រឿង​អ្វី​ទាល់​តែ​សោះ​ជុំវិញ​រឿង​ក្តី​ដ៏​ចម្រូងចម្រាស​មួយ​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល