នៅក្នុងបណ្ដាញសង្គមហ្វេសប៊ុក (Facebook) កំពុងមានការបញ្ចេញយោបល់រិះគន់និងចែកចាយបន្តគ្នា លើករណីគ្រោះថ្នាក់ចរាចរណ៍មួយដែលមានមន្ត្រីក្រសួងទេសចរណ៍មួយក្រុមជិះធ្វើដំណើរទៅបំពេញបេសកកម្មនៅខេត្តរតនគិរី ហើយឈានទៅដល់ការប្ដឹងផ្ដល់គ្នាជាមួយម្ចាស់រថយន្តឈ្នួលនោះ ដើម្បីទារប្រាក់ជំងឺចិត្ត ៤ពាន់ដុល្លារ។ ករណីនេះកំពុងមានភាពស្មុគស្មាញជាខ្លាំងលើការចោទប្រកាន់គ្នាទៅវិញមក។
រដ្ឋលេខាធិការក្រសួងទេសចរណ៍ ១រូបក្នុងចំណោម ៤រូប បានចេញមុខបកស្រាយថា ខ្លួនជាជនរងគ្រោះ បន្ទាប់ពីមានការយល់ច្រឡំ និងរិះគន់រូបគាត់នៅលើបណ្ដាញសង្គមហ្វេសប៊ុក ថាបានជំរិតទារប្រាក់ពីម្ចាស់រថយន្តឈ្នួលដែលមានភាពក្រីក្រ។
រដ្ឋលេខាធិការក្រសួងទេសចរណ៍ លោកស្រី សម មុន្នីកា បានថ្លែងប្រាប់វិទ្យុអាស៊ីសេរី នៅរសៀលថ្ងៃទី១៣ វិច្ឆិកា ថា លោកស្រីគឺជាជនរងគ្រោះដែលស្ទើរតែគ្រោះថ្នាក់ស្លាប់ក្នុងពេលជិះរថយន្តឈ្នួលនោះ ដោយសារតែយុវជនអ្នកបើកបរនិយាយទូរស័ព្ទ បើកបរក្នុងលឿន ១២០គីឡូម៉ែត្រក្នុង១ម៉ោង ហើយពុំមានប័ណ្ណបើកបរទេ។ លោកស្រីបន្តថា នៅពេលមានគ្រោះថ្នាក់មកដល់កាលពីថ្ងៃទី១៩ ខែតុលា នោះ គាត់ជិះខាងមុខបានរងរបួសដោយស្រាំឆ្អឹងលើជង្គង់ ប៉ះពាល់ឆ្អឹងត្រគាក និងដើមទ្រូង ហើយបច្ចុប្បន្នគាត់នៅមានអាការៈស្ពឹកក្បាល និងខ្លួន១ចំហៀង ហើយនិងសួត បន្ទាប់ពីទៅពិនិត្យនិងព្យាបាលនៅប្រទេសវៀតណាម។
លោកស្រីបញ្ជាក់ថា ថៅកែរថយន្តឈ្នួលមិនបានសម្របសម្រួល ឬសួរសុខទុក្ខគាត់ទេនៅប៉ុស្តិ៍ប៉ូលិស ទើបគាត់ទារប្រាក់សំណងម្នាក់ ១ពាន់ដុល្លារ គឺ ៤នាក់ ៤ពាន់ដុល្លារ តែឥឡូវគាត់បានព្យាបាលខ្លួនអស់ ២ពាន់ដុល្លារហើយ។ ប៉ុន្តែបញ្ហានេះ ត្រូវបានឈ្មោះ ផែង វណ្ណៈ មន្ត្រីនគរបាលក្រសួងមហាផ្ទៃ និងជាម្ចាស់គណនីបណ្ដាញសង្គមហ្វេសប៊ុកម្នាក់ បានផ្ដួចផ្ដើមគំនិតប្រមូលថវិកាចំនួន ៤ពាន់ដុល្លារ មកសងគាត់ និងថាអ្នករត់តាក់ស៊ីនោះជាពលរដ្ឋក្រីក្រ គឺជារឿងមិនពិតឡើយ៖ «សំឡេង»។
ទោះជាយ៉ាងណា លោកស្រី សម មុន្នីកា ថ្លែងទៀតថា គាត់មិនដែលស្គាល់លោក ផែង វណ្ណៈ និងពុំធ្លាប់មានគំនុំ ឬជម្លោះជាមួយបុគ្គលនេះឡើយ។ លោកស្រីមិនយល់ថា ហេតុអ្វីបានជាមានការបង្ហោះរូបភាព និងពិពណ៌នាបំផ្លើសការពិតចំពោះគាត់នោះទេ។
ការលើកឡើងនេះបន្ទាប់ពីលោកស្រី សម មុន្នីកា រដ្ឋលេខាធិការក្រសួងទេសចរណ៍ និងអ្នករួមការងារ ៣នាក់ផ្សេងទៀត ជិះតាក់ស៊ីទៅខេត្តរតនគិរី កាលពីថ្ងៃទី១៩ ខែតុលា ខណៈពេលកំពុងបើកបរ ហើយរថយន្តបានខូចចង្កូតដាច់រ៉ូទីលធ្លាក់ចេញពីផ្លូវនៅចំណុចភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី។ លោកស្រីបានទារសំណងជំងឺចិត្ត ៤ពាន់ដុល្លារ។
បញ្ហានេះក៏មានការចែកចាយតាមបណ្ដាញសង្គមហ្វេសប៊ុកថា លោក ផែង វណ្ណៈ មន្ត្រីនគរបាលក្រសួងមហាផ្ទៃ និងជាម្ចាស់គណនីបណ្ដាញសង្គមហ្វេសប៊ុកម្នាក់ និងលោក ព្រំ សាន មន្ត្រីក្រសួងព័ត៌មាន បានផ្ដួចផ្ដើមគំនិតប្រមូលថវិកាចំនួន ៤ពាន់ដុល្លារដើម្បីជាសំណង។ ទឹកប្រាក់ទាំងនោះ ត្រូវបានគេដឹងថា មាន លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ជួយ ៥០០ដុល្លារ លោកស្រី ហ៊ុន ស៊ីណាត ជាប្អូនស្រីលោកនាយករដ្ឋមន្ត្រី ហ៊ុន សែន និងលោក នឹម ច័ន្ទតារា ៣០០ដុល្លារ និងលោក ជុំ កុសល អ្នកអត្ថាធិប្បាយនយោបាយតាមទូរទស្សន៍ ១០០ដុល្លារ លោក ផែង វណ្ណៈ ខ្លួនឯង ២០ម៉ឺនរៀល រួមនឹងសប្បុរសជនជាច្រើននាក់ផ្សេងទៀត ដើម្បីជួយម្ចាស់រថយន្តឈ្នួល ឈ្មោះ គឹម ពិសិដ្ឋ ដែលមានភាពក្រីក្រ។
ឆ្លើយតបបញ្ហានេះ លោក ផែង វណ្ណៈ ដែលជាអ្នកផ្ដួចផ្ដើមគំនិតប្រមូលថវិកា បានឆ្លើយតបថា លោកជួយប្រមូលថវិកានេះ ដោយសារលោកមើលឃើញការខ្វះខាតរបស់ម្ចាស់តាក់ស៊ីដែលគ្មានលទ្ធភាពរកលុយសំណងចំនួន ៤ពាន់ដុល្លារនេះ បន្ទាប់ពីលោកបានដឹងបញ្ហានេះតាមម្ចាស់តាក់ស៊ី ដែលជាអ្នកលេងហ្វេសប៊ុក មួយរូបបានអំពាវនាវពីការខ្វះខាតរបស់ខ្លួនប៉ុណ្ណោះ។ លោកថា ការជួយនេះគឺធ្វើឡើងក្នុងរូបភាពមនុស្សធម៌សុទ្ធសាធមិនពាក់ព័ន្ធអ្វីទាំងអស់ ហើយលោកទើបបានដឹងថា ដើមបណ្ដឹងគឺលោកស្រី សម មុន្នីកា ជារដ្ឋលេខាធិការក្រសួងទេសចរណ៍ នៅពេលក្រោយៗមកទេ៖ «សំឡេង»។
ទាក់ទងបញ្ហានេះដែរ នៅក្នុងបណ្ដាញសង្គមនៅថ្ងៃទី១៣ វិច្ឆិកា ការមានការបង្ហោះតៗនូវលិខិតពីកាកបាទក្រហមកម្ពុជា ដែលបានបដិសេធមិនទទួលប្រាក់ពីលោកស្រី សម មុនី្នកា ដែលថា លោកស្រីបរិច្ចាគប្រាក់ចំនួន ៤ពាន់ដុល្លារនេះទៅឲ្យកាកបាទក្រហម។
អគ្គលេខាធិការកាកបាទក្រហមកម្ពុជា លោកស្រី ពុំ ចន្ទីនី បានបំភ្លឺថា កាកបាទក្រហមមិនអាចទទួលប្រាក់ជំនួយដែលបានមកពីរបៀបនេះបាននោះទេ៖ «សំឡេង»។
តែទោះជាយ៉ាងណា លោកស្រី សម មុន្នីកា បានអះអាងថា គាត់មិនទាន់បានប្រគល់ប្រាក់នោះទៅកាកបាទក្រហមនោះទេ គឺលោកស្រីគ្រាន់តែបាននិយាយក្នុងពេលលោក ផែង វណ្ណៈ យកប្រាក់ ៤ពាន់ដុល្លារទៅប្រគល់ជូនគាត់កាលពីថ្ងៃទី១១ ខែវិច្ឆិកា ថានឹងបង្វិលប្រាក់នេះជូនទៅកាកបាទក្រហម និងមន្ទីរពេទ្យគន្ធបុប្ផា តែបែរជាឃើញលិខិតបដិសេធពីកាកបាទក្រហមទៅវិញ។ ទោះជាបែបនេះក្ដី ថវិកានេះគាត់បានប្រគល់ជូនទៅមន្ទីរពេទ្យគន្ធបុប្ផារួចហើយ។
សំណុំរឿងប្ដឹងផ្ដល់ទារសំណងនេះ ត្រូវបានគេសរសេរតាមប្រព័ន្ធផ្សព្វផ្សាយថា ការប្ដឹងទារប្រាក់នេះព្រោះតែបានធ្វើឲ្យក្រុមលោកស្រីៗនៅក្នុងក្រសួងទេសចរណ៍ ដែលមានស្វាមីជាមន្ត្រីជាន់ខ្ពស់នៅក្រសួងមហាផ្ទៃ មានការផិតភ័យកើតចេញពីការជិះរថយន្តឈ្នួលនោះ ហើយបញ្ហាបានរងការរិះគន់យ៉ាងខ្លាំងពីអ្នកលេងហ្វេសប៊ុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។