កម្មករសំណង់នៅក្រុងប៉ោយប៉ែត ខេត្តបន្ទាយមានជ័យ ប្រមាណ ១០០នាក់ កាលពីព្រឹកថ្ងៃទី១២ ខែមេសា នាំគ្នាតវ៉ានៅស្នាក់ការបុរីរស្មីដួងច័ន្ទ ទាមទារឲ្យម្ចាស់បុរីបើកប្រាក់ឈ្នួល ដើម្បីយកទៅលេងស្រុកកំណើតជួបជុំបងប្អូនក្នុងឱកាសបុណ្យចូលឆ្នាំប្រពៃណីខ្មែរ។ ការតវ៉ានេះ ដោយសារពួកគេសុំបើកប្រាក់ពីម្ចាស់បុរីនេះជាច្រើនលើកមកហើយ តែពុំទទួលបានលទ្ធផល។
ក្រុមកម្មករសំណង់នៅក្រុងប៉ោយប៉ែត កំពុងទន្ទឹងរង់ចាំប្រាក់ឈ្នួលពីថៅកែ ដើម្បីយកប្រាក់ទិញសំបុត្រឡានត្រឡប់ទៅផ្ទះជួបជុំបងប្អូនឲ្យបានឆាប់រហ័ស។
កម្មករសំណង់បុរីរស្មីដួងច័ន្ទ មួយចំនួនឲ្យដឹងនៅថ្ងៃទី១២ ខែមេសា ថា កៀកថ្ងៃបុណ្យចូលឆ្នាំទៅហើយ មិនទាន់បានប្រាក់ឈ្នួលការងារពីម្ចាស់បុរីរស្មីដួងច័ន្ទ ដែលជាចៅសង្កាត់ប៉ោយប៉ែត គឺលោក តាំង គីហេង នៅឡើយទេ។
ក្រុមកម្មករបន្ថែមថា ប្រាក់ឈ្នួលដែលថៅកែជំពាក់ពួកគេម្នាក់ប្រមាណពី ៥០ម៉ឺន ទៅ ១លានរៀល។ ពលរដ្ឋអះអាងថា ថ្វីត្បិតប្រាក់ចំនួននេះ មិនច្រើនសម្រាប់អ្នកមានជីវភាពធូរធារក្ដី តែចំពោះពួកគេដែលក្រីក្ររកព្រឹកខ្វះល្ងាចនោះ គ្មានអ្វីរំពឹងក្រៅអំពីប្រាក់ឈ្នួលនេះយកទៅលេងកម្សាន្តសប្បាយជាមួយបងប្អូនក្នុងថ្ងៃចូលឆ្នាំថ្មីប្រពៃណីជាតិនោះឡើយ៖ «ខ្ញុំមកធ្វើការអត់បានលុយបានកាក់យកទៅផ្ទះសម្បែង អ៊ីចឹងខ្ញុំមិនដឹងថា បានប្រាក់ឯណាទៅលេងស្រុកដូចគេឯងនោះទេ។ បើខ្ញុំលុយកាក់មិនវាអី តែពេលនេះខ្ញុំអត់មានប្រាក់ជាប់នឹងខ្លួនសោះឡើយ»។
វិទ្យុអាស៊ីសេរី ពុំអាចទាក់ទងម្ចាស់បុរីរស្មីដួងច័ន្ទ គឺលោក តាំង គីហេង ដើម្បីអត្ថាធិប្បាយជុំវិញបញ្ហានេះបានទេនៅថ្ងៃទី១២ ខែមេសា។ ប៉ុន្តែមេការសំណង់ ឈ្មោះ ពៅ អះអាងថា លោកចង់បើកប្រាក់ឈ្នួលឲ្យកម្មករគ្រប់ចំនួន ដើម្បីត្រឡប់ទៅជួបជុំបងប្អូននៅឯស្រុកកំណើតដែរ ប៉ុន្តែលោកថា គ្មានលទ្ធភាព ដោយសារថៅកែមិនទាន់បើកប្រាក់ឲ្យលោកគ្រប់ចំនួននៅឡើយ៖ «ថៅកែគាត់បើកប្រាក់មកខ្ញុំខ្លះដែរ តែវាអត់គ្រប់ចំនួនដែលយើងត្រូវបើកឲ្យកម្មករនោះទេ ដល់តែអ៊ីចឹងទៅបានជាខ្ញុំគ្មានប្រាក់សម្រាប់បើកឲ្យកម្មករ»។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ម្ចាស់បុរីមិនបើកប្រាក់ឈ្នួលឲ្យកម្មករគ្រប់ចំនួន ជាចេតនាមួយរបស់ថៅកែដោយសារខ្លាចកម្មករមិនត្រឡប់មកធ្វើការនៅកន្លែងដើមវិញ ក្រោយពីចូលឆ្នាំហើយ។
លោកអះអាងទៀតថា ករណីបែបនេះកើតមានញឹកញាប់ ស្ទើរគ្រប់ការដ្ឋានសំណង់ធំៗនៅក្រុងប៉ោយប៉ែត ជារៀងរាល់ឆ្នាំ ហើយពុំមានអាជ្ញាធរណាចេញមុខជួយដោះស្រាយឲ្យក្រុមកម្មករនោះទេ៖ «មន្ទីរការងារ និងរដ្ឋមន្ត្រីក្រសួងការងារ ត្រូវពិនិត្យ និងការពារផលប្រយោជន៍របស់ក្រុមកម្មករ ព្រោះពួកគាត់ធ្វើការងារដើម្បីលុយយកទៅដោះស្រាយជីវភាពប្រចាំថ្ងៃ។ បើមិនអ៊ីចឹងទេ តើពួកគាត់បានលុយឯណាទៅលេងបុណ្យឆ្នាំខ្មែរនោះ»។
នៅក្រុងប៉ោយប៉ែត ប្រាក់ឈ្នួលការងារសម្រាប់កម្មករគ្មានជំនាញគឺប្រមាណ ២៥.០០០រៀលក្នុងមួយថ្ងៃ ចំណែកឯកម្មករដែលយល់ការងារខ្លះៗ ទទួលប្រាក់ឈ្នួលប្រមាណ ៣ម៉ឺនរៀលក្នុងមួយថ្ងៃ។ ក្រុមកម្មករអះអាងថា កម្មករសំណង់នៅបុរីរស្មីដួងច័ន្ទ ក្រុងប៉ោយប៉ែត ដែលមិនទាន់ទទួលប្រាក់ឈ្នួលមានប្រមាណ ១០០នាក់ ហើយកម្មករខ្លះមកពីខេត្តសៀមរាប ព្រៃវែង និងខេត្តស្វាយរៀង ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។