កម្មករសំណង់ជាង ៣០នាក់ក្នុងចំណោមកម្មករជាង ១០០នាក់ ធ្វើការនៅសិប្បកម្មឡឥដ្ឋមួយកន្លែងឋិតនៅសង្កាត់និម្មិត ក្រុងប៉ោយប៉ែត បានលើកគ្នាទៅតវ៉ានៅកណ្ដាលក្រុង ទាមទារឲ្យថៅកែកាស៊ីណូ ដែលជាជនជាតិថៃ បើកប្រាក់ឈ្នួលឲ្យពួកគាត់ឲ្យបានគ្រប់ចំនួន។
កម្មករសំណង់ឡឥដ្ឋចំនួនជាង ៣០នាក់ នាំគ្នាស្រែកតវ៉ានៅខាងមុខអគារកាស៊ីណូ ត្រូពីកាណា កណ្ដាលក្រុងប៉ោយប៉ែត ទាមទារឲ្យថៅកែបើកប្រាក់ឈ្នួលទៅឲ្យមេការរបស់គេឲ្យបានគ្រប់ចំនួន ប៉ុន្តែម្ចាស់សំណង់ឡឥដ្ឋ ដែលគេដឹងថា ជាថៅកែជនជាតិថៃ នោះពុំបានចេញមុខដោះស្រាយនោះឡើយ។
កម្មករម្នាក់ឈ្មោះ សាលី សាឡៃ បញ្ជាក់ថា ពួកគាត់ទាំងអស់គ្នាជាកម្មករខកខានពុំទាន់ទទួលបានប្រាក់ឈ្នួល ដោយសារតែម្ចាស់សំណង់ឡឥដ្ឋ និងជាម្ចាស់កាស៊ីណូ ត្រូពីកាណា អត់បើកប្រាក់ឲ្យមេការរបស់ពួកគេ៖ «សុំទាមទារបើកលុយឲ្យមេការខ្ញុំ ដើម្បីគាត់បើកបន្តមកឲ្យពួកខ្ញុំ។ ពួកខ្ញុំមានមួយខែជាងជិតពីរ អ្នកខ្លះពីរខែ ពួកខ្ញុំធ្វើការស៊ីថ្ងៃ សរុបថ្ងៃទៅក្នុងម្នាក់បានពីរខែជិតបី ក្នុងមួយថ្ងៃ ៥០០បាត ២០០បាត»។
ការតវ៉ានេះ បានធ្វើឡើងរយៈពេលពីរថ្ងៃជាប់គ្នា គឺចាប់ពីថ្ងៃទី៥ និងថ្ងៃទី៦ ខែមិថុនា ឆ្នាំ២០១៤។ កម្មករទាំងនោះ កន្លងមកនេះបានរង់ចាំទទួលប្រាក់ឈ្នួលរបស់ខ្លួនអស់រយៈពេល ៦ខែមកហើយ ប៉ុន្តែម្ចាស់សំណង់ឡឥដ្ឋមិនព្រមបើកលុយឲ្យ ទើបពួកគេលើកគ្នាតវ៉ា។
មេការកម្មករឈ្មោះ ហឿង ប៊ុនធឿន បញ្ជាក់ថា កម្មករសំណង់ជាង ១០០នាក់ បានធ្វើការងារនៅការដ្ឋាននៃសំណង់សិប្បកម្មឡឥដ្ឋនោះ តាំងពីខែវិច្ឆិកា និងខែធ្នូ ឆ្នាំ២០១៣។ កម្មករទាំងនោះបានផ្អាកការងារ ដោយសាររូបលោកជាមេការ ពុំមានប្រាក់ឈ្នួលបើកឲ្យ៖ «ព្រោះអីកម្លាំងពលកម្មនេះកម្មករបានធ្វើការអស់រយៈពេល ២ខែមកហើយ កម្មករ ១០០នាក់ជាង អស់រយៈពេល ៦ខែមកហើយ ដែលយើងរង់ចាំ តែសំខាន់ គឺយើងម៉ៅទាំងសម្ភារៈ អ៊ីចឹង និងកម្លាំងពលកម្ម អ៊ីចឹងសម្ភារៈយើងជំពាក់គេច្រើនពេកច្រើនរហូតដល់យើងលក់នេះលក់នោះ។ ថវិកាដែលនៅសល់ហ្នឹង ៤លាន ៤សែន ៤ម៉ឺនបាត»។
វិទ្យុអាស៊ីសេរី មិនអាចសុំការបញ្ជាក់ពីម្ចាស់សំណង់ឡឥដ្ឋ និងជាម្ចាស់កាស៊ីណូ ត្រូពីកាណា ដើម្បីបញ្ជាក់ជុំវិញបញ្ហានេះទេ។
នៅក្នុងការតវ៉ារយៈពេលពីរថ្ងៃជាប់គ្នារបស់ក្រុមកម្មករសំណង់នេះ គេសង្កេតឃើញក្រុមអាជ្ញាធរក្រុងប៉ោយប៉ែត បានចេញមុខចូលសម្របសម្រួល។ អភិបាលខេត្តបន្ទាយមានជ័យ លោក គោ ស៊ុំសារឿត មានប្រសាសន៍ថា អាជ្ញាធរមិនមានសិទ្ធិសម្រេចនៅក្នុងរឿងនេះទេ ប៉ុន្តែពួកគេបានខិតខំប្រឹងប្រែងសម្របសម្រួល ដើម្បីឲ្យកម្មករទាំងនោះទទួលបានប្រាក់ឈ្នួលរបស់ខ្លួន៖ «ហើយឥឡូវហ្នឹង ខាងត្រូពីកាណា គាត់សុខចិត្តដោះស្រាយប្រាក់ ៥០ម៉ឺនបាត ដើម្បីយកមកបើកឲ្យកម្មករសិន ហើយរឿងក្ដីផ្សេងៗចាំបន្តគ្នាទៅទៀតទៅ។ អ្នកណាខុសអ្នកណាត្រូវ យើងមិនមែនជាអ្នកកាត់ក្តីទេ យើងគ្រាន់តែសម្របសម្រួល។ ហើយទី២ យើងសុំឲ្យកម្មករទាំងអស់គ្នាកុំធ្វើកូដកម្មបិទផ្លូវ»។
ប្រភពពីអាជ្ញាធរបញ្ជាក់ថា បញ្ហាខកខានដែលកម្មករមិនទទួលបានប្រាក់ឈ្នួលនេះ កើតមានឡើងដោយសារតែក្រុមហ៊ុនម៉ៅការសំណង់មួយឈ្មោះ សាលី សាប៉ឺត មានទំនាស់ជាមួយម្ចាស់កាស៊ីណូ ត្រូពីកាណា រហូតមានការប្ដឹងផ្ដល់គ្នាទៅដល់តុលាការ។ ក្រុមហ៊ុនសំណង់ សាលី សាប៉ឺត បានទទួលម៉ៅការសាងសង់សំណង់ឡឥដ្ឋពីម្ចាស់កាស៊ីណូ ត្រូពីកាណា។
ម្ចាស់កាស៊ីណូ ត្រូពីកាណា បានចោទថា ក្រុមហ៊ុន សាលី សាប៉ឺត បានសាងសង់សំណង់ឡឥដ្ឋមិនត្រឹមត្រូវតាមប្លង់ ដែលម្ចាស់កាស៊ីណូ ត្រូពីកាណា ចង់បាន ទើបកើតមានបញ្ហា។ ក្រោយពីមានទំនាស់ប្ដឹងផ្ដល់គ្នារួចមក ការដ្ឋានសិប្បកម្មឡឥដ្ឋនោះ ត្រូវផ្អាកដំណើរការសាងសង់ ធ្វើឲ្យកម្មករជាង ១០០នាក់ ខកខានពុំទាន់បានទទួលប្រាក់ឈ្នួលរហូតដល់សព្វថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។