ប្រជាពលរដ្ឋឃុំព្រែកខ្សាយ (ខ) ស្រុកពាមរក៍ ខេត្តព្រៃវែង អះអាងថា មន្ត្រីខ្មែរធ្វើស្ពាននៅអ្នកលឿង មានសន្តិសុខ អ្នកបើកឡាន និងវិស្វករផង បានរួមដៃជាមួយអាជ្ញាធរប៉ូលិសប៉ុស្តិ៍ព្រែកខ្សាយ (ក) សហការគ្នាជាប្រព័ន្ធលួចសាំងធ្វើស្ពានយកទៅលក់រៀងរាល់យប់។
ប្រជាពលរដ្ឋថ្លែងក្នុងលក្ខខណ្ឌសុំមិនឲ្យបញ្ចេញឈ្មោះ នៅថ្ងៃទី២ ខែមីនា ថា រថយន្តដែលលួចដឹកសាំងជារថយន្តប្រភេទតូយូតា កាមរី (Toyota Camry) គេច្រើនធ្វើសកម្មភាពពេលយប់ គឺចាប់ពីម៉ោង ១០យប់ រហូតដល់ម៉ោង ៤ទៀបភ្លឺ ដោយគេដឹកសាំងប្រមាណពី ៣ពាន់ ទៅ ៤ពាន់លីត្រក្នុងមួយយប់ យកទៅលក់ឲ្យឈ្មួញទិញសាំងនានានៅម្ដុំផ្សារអ្នកលឿង។
វិទ្យុអាស៊ីសេរី ពុំអាចទាក់ទងមន្ត្រីសន្តិសុខនិងអ្នកធ្វើការសំណង់ស្ពានអ្នកលឿងដើម្បីសុំការពន្យល់ជុំវិញបញ្ហានេះបានទេ នៅថ្ងៃទី២ មីនា ឆ្នាំ២០១៤។
ប៉ុន្តែប្រធានប៉ុស្តិ៍រដ្ឋបាលនគរបាលព្រែកខ្សាយ (ក) លោក លី ចន្ថា មានប្រសាសន៍បញ្ជាក់ថា ប៉ូលិសគោរពច្បាប់ត្រឹមត្រូវ ពុំបានពាក់ព័ន្ធនឹងការលួចសាំងនៅស្ពានអ្នកលឿងនោះទេ។
ស្ពានអ្នកលឿងពេលសង់រួចរាល់ជាស្ពាន នោះនឹងក្លាយជាស្ពានដែលវែងជាងនៅគេក្នុងប្រទេសកម្ពុជា មានប្រវែងប្រមាណជិត ៣គីឡូម៉ែត្រ និងទទឹងស្ពានប្រវែង ១២ម៉ែត្រ។ ស្ពាននេះត្រូវចំណាយទឹកប្រាក់សាងសង់សរុបប្រមាណជាង ១៣០លានដុល្លារអាមេរិក ជាជំនួយរបស់រដ្ឋាភិបាលប្រទេសជប៉ុន ដោយចាប់ផ្ដើមសាងសង់ពីឆ្នាំ២០១១។ គម្រោងសាងសង់នេះនឹងត្រូវបញ្ចប់នៅឆ្នាំ២០១៥ ហើយសព្វថ្ងៃស្ពាននេះសាងសង់បានប្រមាណ ៦០ភាគរយហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។