ពលករចោទប៉ូលិសធ្វើប័ណ្ណឆ្លងដែននៅប៉ោយប៉ែតថាប្រព្រឹត្តអំពើពុករលួយ
2014.12.03
ប្រជាពលរដ្ឋនៅក្រុងសិរីសោភ័ណ ខេត្តបន្ទាយមានជ័យ ចោទប្រកាន់មន្ត្រីប៉ូលិសប្រចាំការិយាល័យលិខិតឆ្លងដែនក្រុងប៉ោយប៉ែត ថាយកតម្លៃធ្វើប័ណ្ណពលករចំណាកស្រុកខ្ពស់ខុសពីច្បាប់កំណត់ ហើយមិនផ្ដល់ប័ណ្ណឲ្យពលករចេញទៅធ្វើការនោះទេ។
ការចោទប្រកាន់នេះ បន្ទាប់ពីពួកគេទៅធ្វើប័ណ្ណឆ្លងដែន ដើម្បីទៅធ្វើការនៅប្រទេសថៃ ដោយស្របច្បាប់ពីមន្ត្រីប៉ូលិសកាលពីខែសីហា កន្លងទៅ។
ប្រជាពលរដ្ឋដែលទៅធ្វើប័ណ្ណពលករចំណាកស្រុកនៅក្រុងសិរីសោភ័ណ កំពុងទន្ទឹងរង់ចាំប័ណ្ណឆ្លងដែននេះ ដើម្បីចេញទៅស្វែងរកការងារធ្វើនៅប្រទេសថៃ។ ស្របពេលគ្នានេះ ពួកគាត់សម្ដែងការមិនពេញចិត្តទៅនឹងទង្វើរបស់មន្ត្រីប៉ូលិសធ្វើប័ណ្ណឆ្លងដែន នៅក្រុងប៉ោយប៉ែត នោះឡើយ។
ប្រជាពលករម្នាក់នៅក្រុងសិរីសោភ័ណ ខេត្តបន្ទាយមានជ័យ ឈ្មោះ ជឿង សុខុម ថ្លែងនៅថ្ងៃទី៣ ធ្នូ ថា ដោយហេតុគ្មានការងារធ្វើនៅស្រុកខ្មែរ គាត់ដាច់ចិត្តប្រមែប្រមូលប្រាក់កាសមួយចំនួន យកទៅធ្វើប័ណ្ណឆ្លងដែន ដើម្បីចេញទៅស្វែងរកការងារធ្វើនៅប្រទេសថៃ។ លោកបន្តថា ពេលដែលទៅធ្វើប័ណ្ណនៅការិយាល័យប៉ូលិសលិខិតឆ្លងដែនប្រចាំការនៅក្រុងប៉ោយប៉ែត ខេត្តបន្ទាយមានជ័យ កាលពីខែសីហា ឆ្នាំ២០១៤ កន្លងទៅនោះ ប៉ូលិសតម្រូវឲ្យលោកបង់ប្រាក់ចំនួន ១ម៉ឺន ៣ពាន់បាត ឬប្រមាណ ៤០០ដុល្លារក្នុងម្នាក់ ដើម្បីជាថ្នូរទទួលប័ណ្ណចេញទៅធ្វើការនៅប្រទេសថៃ ដោយស្របច្បាប់។ ទោះជាយ៉ាងនេះក្ដី លោកថា លោកប្រគល់ប្រាក់មុនចំនួន ៩ពាន់បាត ឬប្រមាណជិត ៣០០ដុល្លារទៅឲ្យមន្ត្រីប៉ូលិសជាង ៤ខែមកហើយ ប៉ុន្តែពុំបានទទួលប័ណ្ណពលករនៅឡើយទេ៖ «ដំបូងគេថាធ្វើលិខិតឆ្លងដែនរហ័សបានទេ គឺត្រឹមតែពីរខែហ្នឹង មកយកបានហើយ។ ហើយគេនិយាយទៀតថា ចាំលិខិតឆ្លងដែនធ្លាប់មកចាំគេទូរស័ព្ទទៅប្រាប់ តែរហូតមកដល់ពេលនេះនៅតែពុំបាននៅឡើយទេ»។
ឆ្លើយតបនឹងបញ្ហានេះ មន្ត្រីការិយាល័យលិខិតឆ្លងដែនប្រចាំការក្រុងប៉ោយប៉ែត លោក ជិន ប៊ុនណា មានប្រសាសន៍បញ្ជាក់ថា អាជ្ញាធរប៉ូលិសពុំមានពាក់ព័ន្ធនឹងការយកលុយធ្វើប័ណ្ណឆ្លងដែនរបស់ពលករ ហើយអូសបន្លាយពេលជិតកន្លះឆ្នាំបែបនេះនោះទេ។ ទោះជាយ៉ាងនេះ លោកថានៅក្នុងករណីនេះជារឿងរបស់ក្រុមហ៊ុនទេ ដែលនាំពលករទៅធ្វើការនៅប្រទេសថៃ ហើយបានព្រមព្រៀងគ្នាជាមួយប្រជាពលរដ្ឋខ្លួនឯងនោះទេ។ តែយ៉ាងណា លោកថា ក្រុមពលករប្រតិកម្មនេះវាហាក់ឆាប់រហ័សពេក ដោយសារមិនបានមកទាក់ទងជាមួយសមត្ថកិច្ចជាមុនទេ៖ «គាត់ចេះតែនិយាយអ្វីៗក៏ដោយ គាត់មិនមកសួរគេសិនទេ គាត់អាងអីឡើងទៅផ្លូវកាត់ គាត់ធ្វើអ៊ីចឹងវាអត់ត្រូវទេ»។
ទាក់ទងនឹងបញ្ហានេះដែរ មន្ត្រីសម្របសម្រួលសមាគមសិទ្ធិមនុស្សអាដហុក (adhoc) ខេត្តបន្ទាយមានជ័យ លោក ស៊ុំ ច័ន្ទគា កត់សម្គាល់ថា កន្លងមកប្រជាពលរដ្ឋតែងត្អូញត្អែរអំពីអំពើពុករលួយលើសេវាធ្វើលិខិតឆ្លងដែនរបស់មន្ត្រីប៉ូលិសប្រចាំការនៅច្រកទ្វារអន្តរជាតិប៉ោយប៉ែត នេះជាប្រចាំ។ លោកថា នៅក្នុងករណីនេះជារឿងដដែលៗ ហើយដុះស្លែជាច្រើនឆ្នាំមកហើយ និងដោះស្រាយមិនចេញឡើយ។ លោកថា អង្គភាពប្រឆាំងអំពើពុករលួយ គួរបោសសម្អាតដល់មន្ត្រីទាំងនោះចេញ ជៀសវាងកុំឲ្យបង្កបញ្ហាដល់ប្រជាពលរដ្ឋនៅថ្ងៃក្រោយទៀត៖ «បញ្ហាការទទួលលុយកាក់ ប្រសិនបើមិនអាចដោះស្រាយចេញ មិនគេរត់ទៅរកក្រុមហ៊ុននោះទេ គេត្រូវទៅរកអ្នកដែលទទួលលុយគេហ្នឹងហើយ។ ហើយករណីអំពើពុករលួយបែបនេះនៅក្រុងប៉ោយប៉ែត មានសន្ទុះកាន់តែខ្លាំងឡើងហើយ ហើយបញ្ហាដែលកើតឡើងនេះ ដោយសារខ្វះការយកចិត្តទុកដាក់ពីស្ថាប័នអង្គភាពប្រឆាំងអំពើពុករលួយ»។
ទោះយ៉ាងនេះក្ដី ប្រជាពលរដ្ឋឲ្យដឹងថា យ៉ាងហោចណាស់មានពលករខ្មែរដែលទៅធ្វើប័ណ្ណពលករស្របច្បាប់ នៅការិយាល័យលិខិតឆ្លងដែនក្រុងប៉ោយប៉ែត ដែលពុំបានទទួលប័ណ្ណចេញទៅធ្វើការនៅឡើយនោះប្រមាណ ៨០នាក់៕