ក្រុមគ្រូបង្រៀននៅតាមសាលាមួយចំនួនក្នុងខេត្តកំពង់ស្ពឺ បានចោទប្រធានការិយាល័យអប់រំស្រុកបរសេដ្ឋ ថាបានលាក់ឈ្មោះគ្រូបង្រៀនដែលព្យួរឈ្មោះពីការងារច្រើនឆ្នាំមិនបង្រៀន ដើម្បីទុកបើកយកប្រាក់បៀវត្សប្រចាំខែរបស់គ្រូទាំងនោះ។ ប៉ុន្តែការចោទនេះ ត្រូវប្រធានការិយាល័យអប់រំស្រុកបរសេដ្ឋ ឆ្លើយបដិសេធថាមិនមែនជាការពិតទេ។
បុគ្គលិកអប់រំ ឬក្រុមគ្រូបង្រៀននៅសាលាខ្លះក្នុងខេត្តកំពង់ស្ពឺ បានស្នើឲ្យលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា បញ្ជូនមន្ត្រីចុះស៊ើបអង្កេតអំពើពុករលួយប្រព្រឹត្តដោយលោក សំ វណ្ណា ប្រធានការិយាល័យអប់រំស្រុកបរសេដ្ឋ។
លិខិតរបស់ក្រុមគ្រូបង្រៀនខេត្តកំពង់ស្ពឺ ផ្ញើជូនវិទ្យុអាស៊ីសេរី បានចោទលោក សំ វណ្ណា ប្រធានការិយាល័យអប់រំស្រុកបរសេដ្ឋ ថាបានអនុញ្ញាតឲ្យគ្រូបង្រៀននៅតាមសាលាខ្លះក្នុងខេត្តនេះ ចេញទៅធ្វើការងារនៅប្រទេសកូរ៉េ និងតាមអង្គការនានា ហើយលាក់ឈ្មោះទុកបើកយកប្រាក់បៀវត្សប្រចាំខែ ដើម្បីបម្រើប្រយោជន៍ផ្ទាល់ខ្លួន។
បន្ថែមលើលិខិត គ្រូបង្រៀនមិនបញ្ចេញឈ្មោះម្នាក់ នៅស្រុកបរសេដ្ឋ បានឲ្យដឹងនៅថ្ងៃអង្គារ ទី១៨ ខែមីនា ថា យ៉ាងហោចមានគ្រូបង្រៀនប្រមាណ ២០នាក់ ត្រូវលោក សំ សុវណ្ណា ឃុបឃិតជាមួយស្ថាប័នពាក់ព័ន្ធ លាក់ឈ្មោះបើកយកប្រាក់ខែតាំងពីឆ្នាំ២០០៩ មក៖ «កន្លងមកខ្ញុំឃើញគ្រូចេញទៅធ្វើការនៅប្រទេសកូរ៉េ និងអង្គការនានាហ្នឹង ត្រូវគាត់លាក់ឈ្មោះ តែគាត់ថា បានលុបឈ្មោះ។ តាមការពិតឈ្មោះនៅក្នុងតារាងបើកលុយហ្នឹងជារៀងរាល់ខែ។ ករណីនេះខ្ញុំបានផ្ញើសំបុត្រទៅអង្គភាពប្រឆាំងអំពើពុករលួយរួចហើយ ក៏ប៉ុន្តែគ្មានប្រតិកម្មអីសោះ។ ហេតុដូច្នេះខ្ញុំសូមស្នើឲ្យក្រសួងអប់រំហ្នឹងស្រាវជ្រាវឈ្មោះគ្រូទាំងអស់នេះនៅស្រុកបរសេដ្ឋ។ ឈ្មោះទាំងអស់នេះ កាលខ្ញុំបានរកឃើញជាង ២០នាក់។ ក្រសួងអប់រំហ្នឹងត្រូវចុះស៊ើបអង្កេតជាបន្ទាន់ កុំឲ្យគ្រូយើងនៅស្រុកបរសេដ្ឋហ្នឹង មានសតិអារម្មណ៍ក្នុងការបង្រៀនសិស្ស»។
ឆ្លើយតបការចោទនេះ លោក សំ វណ្ណា ប្រធានការិយាល័យអប់រំស្រុកបរសេដ្ឋ ខេត្តកំពង់ស្ពឺ បានបដិសេធថា មិនបានប្រព្រឹត្តអំពើពុករលួយដូចការចោទទេ។ ប៉ុន្តែលោកទទួលស្គាល់ថា កន្លងមកមានគ្រូបង្រៀនមួយចំនួនបានសុំច្បាប់សម្រាកទៅរកការងារធ្វើនៅក្រៅប្រទេស និងតាមអង្គការនានា ប៉ុន្តែគ្រូទាំងនោះបានសុំច្បាប់អនុញ្ញាតត្រឹមត្រូវពីក្រសួងអប់រំ។
លោកថ្លែងបដិសេធរាល់ការចោទដែលថា រូបលោកបានលាក់ឈ្មោះគ្រូបង្រៀនដែលបានព្យួរឈ្មោះ ឬត្រូវក្រសួងលុបឈ្មោះពីក្របខ័ណ្ឌគ្រូ ដើម្បីបើកប្រាក់បៀវត្សប្រចាំខែបម្រើប្រយោជន៍ផ្ទាល់ខ្លួន គឺជារឿងយល់ច្រឡំ៖ «ខ្ញុំសូមបញ្ជាក់ថា អវត្តមានគ្រូបង្រៀន ២០នាក់ នៅក្នុងស្រុករបស់ខ្ញុំនេះ គឺពុំមានមូលហេតុដូចដែលអស់លោក លោកស្រី ជាគ្រូបង្រៀនលើកឡើងហ្នឹងទេ។ ជួនកាលគាត់ភណ្ឌច្រឡំថា ២០នាក់ហ្នឹងបែបលាក់ឈ្មោះទៅកូរ៉េហើយ ប៉ុន្តែសូមបញ្ជាក់ថា អត់មានទេ។ យើងមានឋានានុក្រមគ្រប់គ្រងរបស់យើង គឺមានសាលា មានកម្រង មានការិយាល័យអប់រំស្រុក មានមន្ទីរអប់រំខេត្ត និងក្រសួងអប់រំ។ អ៊ីចឹងមានការត្រួតពិនិត្យរៀងរាល់បំណាច់ឆ្នាំ និងរៀងរាល់ឆមាសនីមួយៗ»។
យ៉ាងណាក៏ដោយ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានស្នើឲ្យរដ្ឋមន្ត្រីក្រសួងអប់រំ ត្រូវបើកការស៊ើបអង្កេតទៅលើករណីអំពើពុករលួយក្នុងស្ថាប័នអប់រំខេត្តកំពង់ស្ពឺ ឲ្យបានឆាប់៖ «អ្វីដែលគ្រូបង្រៀនបានព្យួរឈ្មោះ ត្រូវធ្វើម៉េចត្រូវបញ្ជូនឈ្មោះហ្នឹងមកក្រសួង ដើម្បីតម្កល់ប្រាក់បៀវត្សហ្នឹងបញ្ជូនទៅក្នុងធនាគាររដ្ឋវិញ។ ជៀសវាងមន្ត្រីកិបកេងយកលុយរដ្ឋដើម្បីបម្រើប្រយោជន៍ផ្ទាល់ខ្លួន។ អានេះវាចូលក្នុងបទប្រព្រឹត្តអំពើពុករលួយហើយ មិនមែនត្រឹមតែក្រសួងអប់រំ ធ្វើការស៊ើបអង្កេតទេ បន្ទាប់ពីនេះស្ថាប័នប្រឆាំងអំពើពុករលួយ ក៏ត្រូវតែស៊ើបអង្កេតករណីនេះផងដែរ»។
ករណីអំពើពុករលួយនេះ បុគ្គលិកអប់រំខេត្តកំពង់ស្ពឺ បានបញ្ជាក់ថា ពួកគាត់ធ្លាប់បានដាក់ពាក្យបណ្ដឹងតាមរយៈប្រអប់សំបុត្រនៅមុខសាលាខេត្ត និងទៅកាន់ស្ថាប័នប្រឆាំងអំពើពុករលួយកន្លងមក ប៉ុន្តែមិនទាន់ឃើញមានស្ថាប័នទាំងនោះមានវិធានការផ្លូវច្បាប់នៅឡើយទេមកទល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។