អង្គភាពប្រឆាំងអំពើពុករលួយ (ACU) អោយដឹងថា ពាក្យបណ្ដឹងប្ដឹងនាយកសាលាជុំវិញរឿងពុករលួយមានចំនួនកើនឡើង។ សង្គមស៊ីវិលយល់ថា បញ្ហាពុករលួយក្នុងវិស័យអប់រំ នឹងធ្វើឲ្យគុណភាពអប់រំនៅកម្ពុជា បន្តធ្លាក់ចុះ។ ពួកគេស្នើឲ្យរដ្ឋាភិបាលពង្រឹងអភិបាលកិច្ចល្អដើម្បីទប់ស្កាត់បញ្ហានេះ។
សេចក្ដីជូនដំណឹងស្តីពីកិច្ចប្រជុំលើកទី២ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ ដែលបានចេញផ្សាយនៅថ្ងៃទី៣០ ខែកក្កដា បង្ហាញថា សម្រាប់ខែកក្កដា អង្គភាពប្រឆាំងអំពើពុករលួយបានទទួលពាក្យបណ្តឹង ៦៣បណ្ដឹង ដែលក្នុងនោះ ៤០ ជាបណ្ដឹងអនាមិក ហើយភាគច្រើនពាក្យបណ្ដឹងទាំងនោះចោទលើនាយកសាលាជុំវិញរឿងពុករលួយ។
នាយកអង្គការសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក ហៅកាត់ថា អានសា (ANSA) លោក សន ជ័យ មានប្រសាសន៍ថា ការកើនឡើងនៃពាក្យបណ្ដឹងលើនាយកសាលាជុំវិញរឿងពុករលួយ ជារឿងវិជ្ជមានមួយដែលប្រជាពលរដ្ឋហ៊ានលាតត្រដាងបញ្ហាពុករលួយដើម្បីចូលរួមកែប្រែវិស័យអប់រំឲ្យកាន់តែប្រសើរឡើង។
លោក សន ជ័យ បានឲ្យដឹងទៀតថា តាមរយៈការងារដែលពាក់ព័ន្ធលើការអប់រំ កន្លងមកឃើញថា ភាពមិនប្រក្រតី ឬការបន្តកើតមានអំពើពុករលួយក្នុងវិស័យអប់រំ ភាពច្រើនដោយសាររដ្ឋាភិបាលមិនទាន់បានរៀបចំប្រព័ន្ធអភិបាលកិច្ចល្អ ដោយគិតចាប់ពីថ្នាក់ជាតិ ឲ្យបានត្រឹមត្រូវ និងមានតម្លាភាព។
លោកចង់ឃើញរដ្ឋាភិបាល ពិសេសក្រសួងអប់រំ ដុះខាតពង្រឹង ប្រព័ន្ធអភិបាលកិច្ចល្អឲ្យមានប្រសិទ្ធភាពជាមុនសិន ទើបអាចទប់ស្កាត់បញ្ហាពុករលួយនៅតាមសាលារៀននៅកម្ពុជា បាន៖ «យើងចង់រដ្ឋាភិបាលរៀបចំប្រព័ន្ធអភិបាលកិច្ចល្អឲ្យបានច្បាស់លាស់ឲ្យបានត្រឹមត្រូវ ហើយមិនត្រឹមតែប្រព័ន្ធអភិបាលកិច្ចល្អប៉ុណ្ណោះទេ រដ្ឋាភិបាលក៏ត្រូវអនុវត្ត និងផ្សព្វផ្សាយឲ្យមានប្រសិទ្ធភាពទៅតាមសាលារៀននៅកម្ពុជា ទាំងអស់ ទើបអំពើពុករលួយអាចកាត់បន្ថយបាន»។
ចំណែកឯអ្នកស្រាវជ្រាវសង្គម លោក កែម ឡី យល់ថា ដើម្បីដោះស្រាយបញ្ហានេះទាមទារឲ្យមានការចូលរួមពីគ្រប់អ្នកពាក់ព័ន្ធទាំងអស់។ លោកបន្តថា ដើម្បីទប់ស្កាត់បញ្ហាពុករលួយបាន រដ្ឋាភិបាលត្រូវរៀបចំការចាយវាយថវិកាជាតិលើវិស័យនេះឲ្យមានប្រសិទ្ធភាព តាមដានការចាត់ចែងថវិកាគ្រូ តាមដាននៅពេលប្រឡង តាមដានម៉ោងសិក្សារបស់គ្រូ ផ្ដល់ប្រាក់បៀវត្សគ្រូសមរម្យ និងត្រូវពង្រឹងច្បាប់អំពើពុករលួយឲ្យមានប្រសិទ្ធភាព។
លោក កែម ឡី៖ «រដ្ឋាភិបាលត្រូវតែកែប្រែច្បាប់អំពើពុករលួយឲ្យមានប្រសិទ្ធភាពឲ្យមន្ត្រីប្រកាសទ្រព្យសម្បត្តិ និងសាច់ញាតិក៏ត្រូវតែប្រកាសដែរ អ៊ីចឹងយើងនឹងអាចកាត់បន្ថយអំពើពុករលួយនេះបាន»។
វិទ្យុអាស៊ីសេរី មិនអាចទាក់ទងប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ដើម្បីបញ្ជាក់បន្ថែមជុំវិញប្រភេទបណ្ដឹងនៃពាក្យបណ្ដឹងដែលប្រជាពលរដ្ឋប្ដឹងលើនាយកសាលា មកកាន់អង្គភាពនេះបាននៅឡើយនៅថ្ងៃទី៣១ ខែកក្កដា។ ប៉ុន្តែសេចក្ដីជូនដំណឹងរបស់អង្គភាពនេះ បានឲ្យដឹងដែរថា ក្រៅពីបណ្តឹងលើនាយកសាលា អង្គភាពនេះក៏បានទទួលលិខិតប្រកាសទ្រព្យសម្បត្តិ និងបំណុលពីមន្ត្រីដែលទទួលការតែងតាំងថ្មីចំនួន ១០៩រូប និងពីមន្ត្រីដែលបានចូលនិវត្តន៍ចំនួន ៩រូប ហើយក្នុងខែកក្កដា នេះ អង្គភាពបានបើកមើលលិខិតប្រកាសទ្រព្យសម្បត្តិ និងបំណុលចំនួន ១ សម្រាប់ការស៊ើបអង្កេត។
ឆ្លើយតបនឹងរឿងនេះ អ្នកនាំពាក្យក្រសួងអប់រំ យុវជន និងកីឡា លោក រស់ សាលីន បានប្រាប់វិទ្យុអាស៊ីសេរី នៅថ្ងៃទី៣១ ខែកក្កដា ថា ក្រសួងកំពុងតែពង្រឹងពីបញ្ហាអភិបាលកិច្ចនៅក្នុងវិស័យនេះ មិនតែប៉ុណ្ណោះ ក្រសួងក៏បានបង្កើតក្រុមអធិការកិច្ចចុះត្រួតពិនិត្យតាមដានលើអំពើពុករលួយនៅតាមសាលារៀនផងដែរ។ អ្នកនាំពាក្យក្រសួងអប់រំ រូបនេះ បានស្នើឲ្យអ្នកដែលប្តឹងមកក្រសួងអប់រំ និងអង្គភាពប្រឆាំងអំពើពុករលួយទាំងអស់ ត្រូវតែបញ្ជាក់ពីទីកន្លែង និងភស្តុតាងច្បាស់លាស់ជុំវិញបញ្ហាពុករលួយ ដើម្បីឲ្យក្រសួងងាយស្រួលចាត់វិធានការ។
លោក រស់ សាលីន បញ្ជាក់ទៀតថា ដើម្បីលុបបំបាតអំពើពុករលួយនៅក្នុងវិស័យអប់រំ នៅឆ្នាំ២០១៨ ខាងមុខនេះ ក្រសួងនឹងដំឡើងប្រាក់បៀវត្សដល់គ្រួបង្រៀនដោយគិតពីកម្រិតបឋមសិក្សារហូតដល់មធ្យមសិក្សាចាប់ពីជាង ៥០ម៉ឺន ទៅជាង ៨០ម៉ឺន ដោយបូកបញ្ចូលទាំងប្រាក់តំបន់ ប្រាក់ខែកូន ប្រាក់សុខភាព និងអត្ថប្រយោជន៍ជាច្រើនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។