ទាក់ទងនឹងបញ្ហាចោទប្រកាន់នេះ ត្រូវបានមេភូមិបដិសេធថា គាត់មិនបានកម្រិតទារប្រាក់ពីប្រជាពលរដ្ឋដូចការចោទប្រកាន់នោះឡើយ ហើយកន្លងមកប្រជាពលរដ្ឋគាត់ឱ្យត្រឹមតែ ២ ឬ ៣ពាន់រៀល ដែលជាទឹកចិត្តរបស់ពួកគាត់តែប៉ុណ្ណោះ។
ប្រជាពលរដ្ឋនៅឃុំដា ស្រុកមេមត់ បានលើកឡើងពីការទារប្រាក់របស់មេភូមិជាច្រើនម៉ឺនរៀល នៅពេលដែលពួកគាត់បានទៅឱ្យមេភូមិបញ្ជាក់ប្លង់ផ្ទះ ឬដី ដើម្បីអាចបានខ្ចីលុយពីធនាគារបាននោះ។ប្រជាពលរដ្ឋថា មេភូមិបានកម្រិតទារប្រាក់ពេលបញ្ជាក់រួច ២ម៉ឺនរៀល និងនៅពេលដែលធនាគារយកលុយមកប្រគល់ឱ្យគឺត្រូវឱ្យគាត់ ២ម៉ឺនរៀលទៀត។
ប្រជាពលរដ្ឋនៅភូមិសាឡង់១ ឃុំដា ស្រុកមេមត់ លោក ឌឺ សារ៉ា បានឱ្យដឹងថា កន្លងមកមេភូមិសាឡង់មួយ បានកម្រិតទារប្រាក់ក្នុងតម្លៃខ្ពស់ពីប្រជាពលរដ្ឋ នៅពេលពួកគាត់ត្រូវការចងការប្រាក់ពីធនាគារ ប៉ុន្តែដោយសារប្រជាពលរដ្ឋគាត់ខ្លាចខ្ចីលុយមិនបាន ទើបគ្មាននរណាចេញមុខ។
លោកបន្តថា ប្រសិនជាប្រជាពលរដ្ឋគាត់ជូនប្រាក់ទៅមេភូមិដោយមនោសញ្ចេតនា នោះគាត់មិនសូវអើពើនោះទេ ក៏ប៉ុន្តែនេះមេភូមិបានដាក់កម្រិតយកពីប្រជាពលរដ្ឋតែម្ដង៖ «គាត់ធ្វើអាក្រដាសមួយហ្នឹង ពីរម៉ឺនអ៊ីចឹង ហើយដល់ពេលបានលុយពីប្រាសាក់ហ្នឹងមក គាត់ដកពីរម៉ឺនទៀត អ៊ីចឹងក្នុងមួយនាក់ហ្នឹងគាត់អស់ បួនម៉ឺន។ ហើយខ្ញុំសួរគេទាំងអស់គ្នាអ៊ីចឹងមកទៀត ថាគាត់យកអ៊ីចឹង ខ្ញុំធ្វើម៉េច បើគាត់ថាយកប៉ុណ្ណឹងអ៊ីចឹង។ ដូចខ្ញុំជម្រាបអ៊ីចឹង មិនមែនទៅដេញដោលអីទេ ក៏ប៉ុន្តែគាត់ដាក់កម្រិត បើថាមនោសញ្ចេតនា បើថាគេស្រលាញ់ គេអាណិត គេឱ្យគាត់ប៉ុណ្ណឹងមិនមែនទៅឈឺឆ្អាលអីទេ ប៉ុន្តែគាត់ដាក់កម្រិត ដល់អ៊ីចឹងពួកហ្នឹងគេកើតទុក្ខមិនសុខចិត្ត»។
លោកបន្តថា លោកចង់ឱ្យមានតម្លាភាពក្នុងការផ្ដល់សេវាកម្មផ្សេងៗ ជូនប្រជាពលរដ្ឋ ទើបអាចធានាបាននូវការគោរពច្បាប់ ជៀសវាងការធ្វើឱ្យប្រជាពលរដ្ឋដែលខ្វះខាតកាន់តែជួបការលំបាក៖ «កុំឱ្យលោកមេភូមិគាត់ធ្វើអ៊ីចឹងទៀត បើប្រជាពលរដ្ឋគាត់ឱ្យដោយមនោសញ្ចេតនា ដូចខ្ញុំជម្រាបខាងដើមអ៊ីចឹងថា កុំថាពីរម៉ឺន ឬបួនម៉ឺន ឱ្យម្ភៃសាមសិបម៉ឺនក៏ដោយឱ្យតែប្រជាពលរដ្ឋហ្នឹងមានមនោសញ្ចេតនាដាក់គាត់ គេមិនថាអីទេ។ ប៉ុន្តែគាត់ដាក់កម្រិតអ៊ីចឹងវាខុសនឹងច្បាប់របស់យើង សូម្បីតែកម្រិតត្រឹមតែមួយពាន់ក៏ខុសច្បាប់ដែរ មិនអ៊ីចឹងលោក?»។
មេភូមិសាឡង់១ លោក សែ សែន បានច្រានចោលនូវអ្វីដែលប្រជាពលរដ្ឋបានលើកឡើងនោះ ថាវាជារឿងមិនពិតនោះទេ ពីព្រោះកន្លងមកលោកមិនដែលបានដាក់កម្រិតដើម្បីយកថ្លៃសេវាពីប្រជាពលរដ្ឋដូចការចោទប្រកាន់នោះឡើយ។ លោកបន្តថា លោកធ្លាប់តែនិយាយលេងពីបញ្ហានេះជាមួយប្រជាពលរដ្ឋ ហើយប្រជាពលរដ្ឋឱ្យប្រាក់ថ្លៃសេវាតាមសន្តានចិត្តរបស់ពួកគាត់ គឺត្រឹមតែ ២ ឬ ៣ពាន់រៀលតែប៉ុណ្ណោះ។
លោក សែ សែន៖ «និយាយលេងជាមួយវា ជាមួយពួកវានេះ យកឱ្យគេទៅ ហើយឱ្យអ ២ៗម៉ឺនផង ថាមែន ប៉ុន្តែខ្ញុំមិនដែលបានយកនោះទេ ខ្ញុំគ្មានបង្គាប់អីទេ គេឱ្យតាមមនោសញ្ចេតនារបស់គាត់។គ្មានទេ ពួកនោះឱ្យៗតាមទឹកចិត្តរបស់គាត់ បីពាន់ ឬពីរពាន់ បារី តែខ្ញុំមិនដែលយកផង»។
លោកបន្ថែមទៀតថា លោកមិនបានកម្រិតយកប្រាក់ពីប្រជាពលរដ្ឋឡើយ ពីព្រោះប្រាក់នោះប្រជាពលរដ្ឋជាអ្នកសងខ្លួនឯង ហើយលោកមិនដែលប្រកាន់និន្នាការនយោបាយបក្សណានោះទេ គឺមានតែអប់រំប្រជាពលរដ្ឋដែលរស់នៅក្នុងភូមិស្រុកឱ្យធ្វើតែអំពើល្អជាមួយគ្នាទៀតផង។
ទោះបីជាយ៉ាងណាក៏ដោយ ប្រជាពលរដ្ឋដែលជួបការលំបាកស្នើសុំឱ្យអាជ្ញាធរដែលពាក់ព័ន្ធទាំងអស់ គប្បីធ្វើការបម្រើប្រជាពលរដ្ឋដើម្បីភាពត្រឹមត្រូវនិងតម្លាភាពនៅក្នុងសង្គមទើបជាការល្អប្រសើរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។