គោ និងក្របីជាច្រើន បានឈឺ និងងាប់នៅឯភូមិដាច់ស្រយាលមួយក្នុងខេត្តពោធិ៍សាត់។ ប្រជាពលរដ្ឋដែលជាម្ចាស់គោក្របីមានការព្រួយបារម្ភពីកង្វះខាតកម្លាំងអូសទាញ ដោយសាររដូវបង្កបង្កើនផលបានចូលមកដល់។ ចំណែកមន្ត្រីបសុពេទ្យឃុំបានឲ្យដឹងថា គោក្របីដែលងាប់នោះច្រើនមកពីម្ចាស់ខ្វះការថែទាំ ពោលគឺលែងឲ្យសត្វដើររកស្មៅតាមយថាកម្មនៅតំបន់ព្រៃក្បែរជើងភ្នំ។
បុរសអ្នកភូមិឈ្មោះ សួ ម៉ើ ជាប្រជាពលរដ្ឋនៅភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់។ គាត់បានឲ្យដឹងនៅព្រឹកថ្ងៃទី២៦ មេសា ថា ក្របីរបស់គាត់ ២ក្បាល បានងាប់ភ្លាមៗដោយពុំដឹងពីមូលហេតុ និងពុំមានផ្ដល់សញ្ញាថាមានជំងឺអ្វីឡើយ។ តែបន្ទាប់ពីគាត់បានចាប់វាបញ្ចូលនឹមរទេះ បម្រុងបរមកផ្ទះ វាដើរបានតែប៉ុន្មានជំហាន ក៏ស្រាប់តែទន់ជើងដួលប្រកាច់ងាប់តែម្ដង។
បុរសរូបនេះបន្តថា មិនមែនតែក្របីគាត់ទេដែលងាប់នោះ។ គាត់ថា មានក្របីជាច្រើនក្បាលទៀតបានងាប់នៅក្នុងព្រៃតំបន់ក្បែរជើងភ្នំ៖ «នៅអូរធំ រាំងខ្វាវ ត្រពាំងព្រីង មានគោក្របីងាប់ច្រើនណាស់បង។ ឈឺពេញព្រៃ ក្របីខ្ញុំចាប់បញ្ចូលនឹមដំបូងអត់អីទេ ដល់ពេលខ្ញុំឈប់ជ្រកភ្លៀងបន្តិច រួចខ្ញុំចាប់ផ្ដើមបរទៅមុខទៀត ស្រាប់តែវាទន់ជើង រួចប្រកាច់ងាប់តែម្ដង»។
ដូចគ្នានេះដែរ បុរសអ្នកភូមិត្រពាំងឈ្នួល ឈ្មោះ សំ សុត បានប្រតិកម្មចំពោះការដឹកជញ្ជូនសត្វពាហនៈដែលងាប់ឆ្លងកាត់តាមភូមិរបស់គាត់ ដោយគាត់បារម្ភក្រែងសត្វដែលងាប់នោះឆ្លងជំងឺមកសត្វក្នុងភូមិ៖ «គេដឹកឆ្លងកាត់តាមហ្នឹង ហើយអាជ្ញាធរគេអត់យកចិត្តទុកដាក់អីសោះ។ បងជួយផ្សព្វផ្សាយឲ្យថ្នាក់លើដឹងផង ព្រោះក្របីងាប់ដោយជំងឺនេះវាអាចឆ្លងដល់សត្វក្នុងភូមិ...»។
ជំទប់ទី១ ឃុំឈើតុំ លោក រឿន វ៉ាន បានឲ្យដឹងថា លោកពិតជាបានឃើញសត្វពាហនៈមានគោក្របី ងាប់ជាច្រើន ត្រូវបានគេដឹកកាត់មុខផ្ទះលោកស្ទើរតែរាល់ថ្ងៃ តែលោកពុំបានដឹងថាការងាប់សត្វពាហនៈក្នុងឃុំលោកនេះបណ្ដាលមកពីហេតុអ្វីទេ៖ «ជាក់ស្ដែង ខ្ញុំឃើញ២ក្បាលដែលគេឡើងមកដល់មុខផ្ទះខ្ញុំហ្នឹង ហើយគេដឹកកាត់មុខផ្ទះខ្ញុំបន្តបន្ទាប់រាល់ថ្ងៃ។ ខ្ញុំបានសួរទៅអ្នកដឹកគេប្រាប់ថា ក្របីងាប់ពេញក្នុងព្រៃ។ ឈឺភ្លាមញាក់សាច់ដួលប្រូសតែម្ដង ខ្លះទន់ជើងដួលទាំងជំហរ គាត់ថាឥឡូវកំពុងឈឺនៅឯលើពេញព្រៃ...»។
ទាក់ទិនចំពោះការងាប់សត្វពាហនៈនេះ ប្រធានផ្នែកបសុព្យាបាលឃុំឈើតុំ លោក ម៉ន សារ៉ន បានពន្យល់ថា គោក្របីដែលងាប់នោះច្រើនមកពីម្ចាស់វាខ្វះការថែទាំ ពោលគឺលែងឲ្យសត្វដើររកស្មៅស៊ីតាមយថាកម្មនៅតំបន់ព្រៃក្បែរជើងភ្នំ បន្ទាប់ពីការភ្ជួររាស់បង្កបង្កើនផលរួច។ ម្យ៉ាង អ្នកភូមិទាំងនោះពុំព្រមចាក់វ៉ាក់សាំងការពារសត្វពាហនៈរបស់គាត់ទេ៖ «យើងមានវិធានការឲ្យគាត់ប្រមូលគោក្របីគាត់ពីព្រៃមកវិញ។ ខ្ញុំបានលើកឡើងក្នុងកិច្ចប្រជុំគណៈបញ្ជាការឯកភាពឃុំថា ឲ្យលោកមេឃុំប្រាប់ទៅលោកមេភូមិ ឲ្យប្រកាសប្រាប់ប្រជាពលរដ្ឋឲ្យប្រមូលជម្លៀសគោក្របីរបស់គាត់ មកភូមិវិញ។ បើគាត់ទុកចោលក្នុងព្រៃអ៊ីចឹង ពេលសត្វឈឺ យើងមិនអាចជួយពួកគាត់បានទេ...»។
ប្រភពពីអាជ្ញាធរស្រុកក្រគរ បានឲ្យដឹងថា ជារៀងរាល់ឆ្នាំក្នុងដើមរដូវវស្សា អាជ្ញាធរតែងប្រកាសឲ្យប្រជាពលរដ្ឋត្រៀមលក្ខណៈប្រមូលសត្វពាហនៈមកថែទាំ តែប្រជាពលរដ្ឋទាំងនោះមិនសូវចាប់អារម្មណ៍អនុវត្តតាមការណែនាំឡើយ។ ពួកគាត់ច្រើនធ្វើតាមទម្លាប់ចាស់តាំងពីដូនតារៀងមក ពោលគឺបន្ទាប់ពីរដូវភ្ជួររាស់ គឺលែងគោក្របីឲ្យដើររកស្មៅស៊ីដូចសត្វក្នុងធម្មជាតិតាមតំបន់ជើងភ្នំ។ លុះដល់រដូវភ្ជួររាស់ ទើបពួកគាត់ទៅរកគោក្របីរបស់គាត់មកប្រើប្រាស់វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។