នាយប៉ុស្តិ៍រដ្ឋបាលឃុំស្វាយពោធិ៍ ស្រុកស្រីសន្ធរ ខេត្តកំពង់ចាម លោក ចាន់ សុផល ដែលបានបាត់ខ្លួនកាលពីចុងខែមិថុនា ត្រូវបានប្រជាពលរដ្ឋប្រទះឃើញសាកសពនៅក្នុងបឹងមួយក្បែរភូមិ ដែលសាកសពនៅសល់តែគ្រោងឆ្អឹង និងសម្លៀកបំពាក់ដែលនៅជាប់ខ្លួនតែប៉ុណ្ណោះ។
អធិការនគរបាលស្រុកស្រីសន្ធរ លោក ខេង ស្រេង ឱ្យដឹងថា សមត្ថកិច្ចបានទទួលព័ត៌មានពីប្រជាពលរដ្ឋម្នាក់នៅឃុំស្វាយពោធិ៍ ឈ្មោះ ធឿន ហ៊ន ដែលបានកាប់ឆ្ការព្រៃដីស្រែរបស់ខ្លួន ក៏ប្រទះឃើញសាកសពនៅចំណុចទាវអុក តំបន់បឹងប្រ៉ម ខាងលិចឃុំស្វាយពោធិ៍ ចម្ងាយ ៣គីឡូម៉ែត្រ។ លោកសង្ស័យថា ការស្លាប់របស់មេប៉ុស្តិ៍រូបនោះ គឺជាករណីឃាតកម្មគិតទុកជាមុន ដែលអាចពាក់ព័ន្ធទៅនឹងជនប្រព្រឹត្តិបទល្មើសនេសាទតែម្តង។
លោក ខេង ស្រេង៖ «បាទ! សាកសពពេលដែលយើងប្រទះឃើញទីមួយ គឺមួកដែលលោកនាយប៉ុស្តិ៍គាត់ពាក់មក។ ទីពីរ ឃើញក្រមាដែលនាយប៉ុស្តិ៍គាត់យកមក។ ទីបី ឃើញសម្លៀកបំពាក់ ហើយសាកសពហ្នឹងនៅសល់តែគ្រោងឆ្អឹងទេ។ បន្សល់តែខោអាវ និងឆ្អឹង។ ខោអាវហ្នឹង គឺខោអាវស្លៀកទៅបង្ក្រាបបទល្មើសនេសាទហ្នឹង។ បាទ! មកដល់ពេលហ្នឹង ខ្ញុំសន្និដ្ឋានថា ករណីហ្នឹងជាករណីឃាតកម្មគិតទុកជាមុន»។
ប្រពន្ធជនរងគ្រោះ អ្នកស្រី មុត ស៊ីនួន បញ្ជាក់ថា សាកសពពិតជាប្ដីរបស់អ្នកស្រីមែន ពីព្រោះអ្នកស្រីចំណាំសម្លៀកបំពាក់ និងសម្ភារៈដែលនៅជាប់នឹងសាកសពនោះ។ អ្នកស្រីក៏សុំអំពាវនាវឱ្យអាជ្ញាធរ ជួយស្វែងរកមូលហេតុនៃការស្លាប់ និងស្វែងរកជនល្មើសមកផ្ដន្ទាទោសទៅតាមផ្លូវច្បាប់។
យ៉ាងណាក៏ដោយ លោក ខេង ស្រេង ឱ្យដឹងទៀតថា សាកសពត្រូវធ្វើកោសល្យវិច័យជាមុន ទើបប្រគល់ឱ្យសាច់ញាតិ ដើម្បីធ្វើបុណ្យតាមប្រពៃណី។ ចំណែកសមត្ថកិច្ច គឺធ្វើការស្រាវជ្រាវបន្តទៀតជុំវិញករណីនេះ។
មេប៉ុស្តិ៍ឃុំស្វាយពោធិ៍ លោក ចាន់ សុផល បានបាត់ខ្លួនតាំងពីព្រឹកថ្ងៃទី២១ មិថុនា នៅពេលលោកចុះពិនិត្យករណីបទល្មើសនេសាទក្នុងបឹងមួយនៅក្នុងឃុំ ហើយត្រូវបានក្រុមគ្រួសារសម្រេចចិត្តធ្វើបុណ្យ ៧ថ្ងៃ កាលពីថ្ងៃទី២៧ មិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។