ក្រុមតន្ត្រីមូលនិធិជនពិការដែលតែងប្រគំសម្ដែងតាមផ្សារ និងតាមដងផ្លូវសាធារណៈនោះ ត្អូញត្អែរថា ពួកគេកំពុងជួបទុក្ខលំបាកខ្លាំងក្នុងជីវភាពរស់នៅប្រចាំថ្ងៃ។ ការត្អូញត្អែរនេះ ធ្វើឡើងក្រោយពេលអាជ្ញាធររឹបអូសឧបករណ៍តន្ត្រីរបស់ពួកគេមិនឲ្យច្រៀងតាមទីសាធារណៈដើម្បីរៃអង្គាសថវិកា។
ក្រុមតន្ត្រីមូលនិធិជនពិការដែលតែងប្រគំសម្ដែងតាមផ្សារ និងតាមដងផ្លូវសាធារណៈនោះយល់ថា ការរឹបអូសឧបករណ៍តន្ត្រីរបស់ពួកគេមិនឲ្យច្រៀងតាមទីសាធារណៈដើម្បីរៃអង្គាសថវិកា គឺជាការរំលោភសិទ្ធិ និងរំលោភយ៉ាងធ្ងន់ធ្ងរលើសេដ្ឋកិច្ច ខណៈការសន្យាធានាជួយរកការងារធ្វើជូនជនពិការឲ្យមានជីវភាពសមរម្យរបស់អាជ្ញាធរ នៅមិនទាន់មានប្រសិទ្ធភាពនៅឡើយ។
ជនពិការជើងទាំងសងខាង និងជាអ្នកដឹកនាំក្រុមតន្ត្រីជនពិការ ដែលតែងប្រកបអាជីពច្រៀងរៃអង្គាសប្រាក់តាមស្តុបសាធារណៈ លោកស្រី អ៊ុក គីរី បានប្រាប់វិទ្យុអាស៊ីសេរី ថា កាលពីថ្ងៃទី២ ខែមេសា កន្លងទៅ អាជ្ញាធរក្រសួងសង្គមកិច្ច បានមករឹបអូសឧបករណ៍តន្ត្រីពីក្រុមតន្ត្រីមូលនិធិជនពិការចំនួនពីរក្រុម ខណៈពួកគាត់កំពុងច្រៀងនៅស្តុបផ្លូវម៉ៃដា។
ជាងនេះទៀត លោកស្រីថា រហូតមកដល់ពេល ក្រសួងសង្គមកិច្ចមិនទាន់ប្រគល់ឧបករណ៍តន្ត្រីឲ្យពួកគាត់នៅឡើយទេ៖ «មកដល់គេមកលើកធុងបាស២ និងម៉ាស៊ីនមួយ គេលើកឧបករណ៍តន្ត្រីក្រុមខ្ញុំដាក់ឡានអស់ គេអត់មាននិយាយអីច្រើនទេ គ្រាន់តែនិយាយប្រាប់ថា គេមិនឲ្យលេង ហើយនៅតែលេងទៀត ចាំទៅដោះស្រាយគ្នានៅក្រសួងសង្គមកិច្ចទៅ។ ក្រោយមកខ្ញុំទៅក្រសួង ថាគេអត់ព្រមឲ្យឧបករណ៍មកវិញ គេថា ចាំសួរថ្នាក់លើសិន សម្រាប់ក្រុមខ្ញុំក៏ខុសដែរ បើគេមិនឲ្យច្រៀងហើយនៅតែច្រៀងទៀត តែបើសិនពួកគាត់មករឹបអូសឧបករណ៍អ៊ីចឹងគួរតែជូនដំណឹង ឬមានសរសេរជាលាយលក្ខណ៍អក្សរណាមួយ ខ្ញុំព្រមឈបច្រៀង»។
ជនពិការរូបនេះក៏ត្អូញត្អែរដែរថា ក្រោយចំណាត់ការរបស់ក្រសួងរួចមក ពួកគាត់កំពុងប្រឈមជីវភាពខ្វះមុខខ្វះក្រោយក្នុងការរស់នៅប្រចាំថ្ងៃ ទាំងការហូបចុក ស្នាក់នៅ និងការផ្គត់ផ្គង់ក្រុមគ្រួសារជាដើម។ លោកស្រីសោកស្ដាយចំពោះវិធានការរឹបអូសឧបករណ៍តន្ត្រី ដែលមិនបានជូនដំណឹងជាមុនដល់ពួកគាត់នោះ។
ទន្ទឹមនឹងការលើកឡើងនេះ ប្រធានអង្គការសកម្មភាពលើជនពិការដើម្បីអភិវឌ្ឍន៍ កញ្ញា នូ វ៉ានី យល់ថា វិធានការរឹបអូសឧបករណ៍តន្ត្រីរបស់ក្រុមតន្ត្រីជនពិការភ្លាមៗ ដោយមិនបានជូនដំណឹងជាមុន គឺកំពុងតែបំពានដល់សិទ្ធិ និងមិនបានឆ្លើយតបនឹងតម្រូវការជាក់ស្ដែងរបស់ជនពិការនោះទេ។
កញ្ញាបន្តថា អំឡុងពេលនេះ ក្រសួងសង្គមកិច្ច និងសាលាក្រុង គួរតែដោះស្រាយរកការងារជូនជនពិការឲ្យមានប្រសិទ្ធភាពជាមុនសិន មុននឹងទៅបង្ខំ ហើយរឹបអូសឧបករណ៍របស់ពួកគាត់៖ «ដំណោះស្រាយរបស់សាលារាជធានីភ្នំពេញ និងក្រសួងសង្គមកិច្ច គឺអត់ទាន់ចេញលិខិតជាផ្លូវការ ឬអត់ទាន់មានរកដំណោះស្រាយណាមួយដល់ជនពិការផងហ្នឹង ហើយអត់ទាន់រកការងារឲ្យជនពិការដូចដែលស្ថាប័នទាំងពីរនេះបានសន្យាផងហ្នឹង អ៊ីចឹងហើយខណៈដែលមិនទាន់មានដំណោះស្រាយណាមួយ គួរតែផ្ដល់ឱកាសឲ្យពួកគាត់សម្ដែងសិនទៅ»។
ឆ្លើយតបចំពោះការលើកឡើងរបស់ជនពិការពីការរឹបអូសឧបករណ៍តន្ត្រីក្រុមជនពិការនេះ អគ្គលេខាធិការក្រុមប្រឹក្សាសកម្មភាពជនពិការនៃក្រសួងសង្គមកិច្ច លោក ឯម ច័ន្ទមករា បដិសេធថា លោកមិនទាន់ទទួលបានដំណឹងពីរឿងរឹបអូសឧបករណ៍តន្ត្រីនេះនៅឡើយទេ។ ប៉ុន្តែលោកថា រាល់វិធានការបញ្ឈប់សកម្មភាពមិនឲ្យច្រៀងតាមទីសាធារណៈ គឺដើម្បីការពារសុវត្ថិភាព សុខភាព និងដើម្បីធានាសិទ្ធិរបស់បងប្អូនជនពិការប៉ុណ្ណោះ។
ជាងនេះទៀត លោកថា ក្រសួងសង្គមកិច្ច និងសាលារាជធានីភ្នំពេញ កំពុងយកចិត្តទុកដាក់រកយុទ្ធសាស្ត្រកាត់បន្ថយភាពក្រីក្ររបស់ជនពិការ និងធានាថា ជនពិការអាចទទួលសេវាអប់រំ បណ្ដុះបណ្ដាល និងការងារទៅតាមសមត្ថភាពផងដែរ៖ «ក្នុងនាមជាអគ្គលេខាធិការក្រុមប្រឹក្សាសកម្មភាពជនពិការ ដែលជាអ្នកសម្របសម្រួលរាល់ជនពិការភាព យើងខ្ញុំនឹងចុះពិនិត្យផ្ទាល់ពីស្ថានភាពបងប្អូនពិការ ចុះត្រួតពិនិត្យអង្គការដោយមើលពីរចនាសម្ព័ន្ធ តែរាល់វិធានការណាមួយវាត្រូវការពេលវេលារបស់វា»។
វិទ្យុអាស៊ីសេរី មិនអាចទាក់ទងអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ដើម្បីសួរបន្ថែមពីវិធានការរឹបអូសឧបករណ៍តន្ត្រីជនពិការបាននៅឡើយ នៅថ្ងៃទី៦ ខែមេសា។
ទោះជាមានការបកស្រាយពីមន្ត្រីក្រសួងសង្គមកិច្ច យ៉ាងនេះក៏ដោយ ជនពិការដែលតែងធ្វើសកម្មភាពដើរច្រៀងតាមទីសាធារណៈដើម្បីរៃអង្គាសថវិកាគ្រាន់ចិញ្ចឹមជីវិត អះអាងថា ក្រោយអាជ្ញាធររឹបអូសឧបករណ៍តន្ត្រីពួកគេមិនឲ្យច្រៀងតាមទីសាធារណៈរួចមក វាមិនត្រឹមតែធ្វើឲ្យប៉ះពាល់យ៉ាងធ្ងន់ធ្ងរមកលើជីវភាពរស់នៅប៉ុណ្ណោះទេ វិធានការនេះ ក៏កំពុងតែធ្វើឲ្យជនពិការមួយចំនួនធ្លាក់ខ្លួនក្លាយទៅជាអ្នកសុំទានគេម្ដងទៀតផងដែរ។
ក្រុមតន្ត្រីជនពិការនៅតែអំពាវនាវឲ្យសាលាក្រុង ជាពិសេសក្រុមប្រឹក្សាសកម្មភាពជនពិការ បញ្ឈប់រាល់វិធានការណាដែលមិនបានលើកទឹកចិត្តជនពិការនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។