នៅដើមឆ្នាំ២០១៤នេះ គ្រោះធម្មជាតិ មេឃភ្លៀងលាយឡំខ្យល់កន្ត្រាក់និងរន្ទះបាញ់ផងនោះ បានធ្វើឲ្យខូចខាតលំនៅឋាន ទ្រព្យសម្បត្តិប្រជាពលរដ្ឋនៅក្នុងខេត្តបាត់ដំបង ជាច្រើនរយខ្នង។ គ្រោះធម្មជាតិនេះក្រៅពីបំផ្លាញលំនៅឋាន ទ្រព្យសម្បត្តិ ក៏បានបង្កឲ្យមនុស្សស្លាប់និងរបួសជាច្រើននាក់ផងដែរ។
ក្នុងរយៈពេល ៥ខែ ដើមឆ្នាំ២០១៤នេះ គ្រោះធម្មជាតិបានសម្លាប់មនុស្ស ១៥នាក់ និង ៨នាក់រងរបួស ដោយសាររន្ទះបាញ់។មេឃភ្លៀងមានខ្យល់កន្ត្រាក់ផ្គររន្ទះនេះ ក៏បានបង្កឲ្យខូចខាតលំនៅឋាន អគារសិក្សាដួលរលំ ប៉ើងដំបូលជាច្រើនខ្នង។
ប្រធានផ្នែកគ្រប់គ្រងគ្រោះមហន្តរាយសាខាកាកបាទក្រហមខេត្តបាត់ដំបង លោក ម៉ឺន ជ័យសិទ្ធិ ថ្លែងនៅថ្ងៃទី១៩ ខែឧសភា ថា គិតចាប់ពីថ្ងៃទី១ ខែមករា រហូតដល់ថ្ងៃទី១២ ខែឧសភា ឆ្នាំ២០១៤ នេះ មានមនុស្ស ២០នាក់ បានរងគ្រោះដោយសាររន្ទះបាញ់។ ក្នុងនោះ ១៥នាក់បានស្លាប់ និង ៨នាក់រងរបួស។
លោកបន្តថា មានករណីរន្ទះបាញ់ថ្មីថែមទៀតដែលបណ្ដាលចំនួនមនុស្សស្លាប់កើនឡើងនៅក្នុងខេត្តបាត់ដំបង៖ «ក្នុងរយៈពេលចុងក្រោយនេះ អ្វីដែលសាហាវជាងគេគឺគ្រោះមហន្តរាយដោយសាររន្ទះបាញ់ រន្ទះបាញ់ ២០នាក់ ១២នាក់ស្លាប់ ៨នាក់រងរបួស ហើយឥឡូវនេះឡើងរហូតដល់ ១៥នាក់ ក្នុងស្រុកសំពៅលូន ៣នាក់ទៀតត្រូវបានរន្ទះបាញ់ស្លាប់»។
ក្រៅពីការរងគ្រោះដោយសារគ្រោះថ្នាក់រន្ទះបាញ់ នៅមានមនុស្សជាច្រើននាក់ទៀតបានស្លាប់ដោយសារការផ្ទុះគ្រាប់មីននៅក្នុងខេត្តបាត់ដំបង។
លោក ម៉ឺន ជ័យសិទ្ធិ បញ្ជាក់ថា មនុស្ស ៥នាក់បានស្លាប់និងរបួស ២នាក់ ដោយសារការផ្ទុះគ្រាប់មីនកប់នៅក្រោមដីនៅក្នុងខេត្តបាត់ដំបង។ គ្រោះធម្មជាតិមេឃភ្លៀងលាយឡំជាមួយនឹងខ្យល់កន្ត្រាក់ បានកើតមានឡើងជាច្រើនកន្លែងនៅខេត្តភាគពាយ័ព្យនៃប្រទេសកម្ពុជា ចាប់ពីអំឡុងដើមឆ្នាំ២០១៤។
កន្លងទៅថ្មីៗនេះ សេចក្ដីជូនដំណឹងរបស់ក្រសួងធនធានទឹកបានបញ្ជាក់ថា រដូវវស្សានឹងឈានចូលមកដល់នៅសប្ដាហ៍ទី៣ នៃខែឧសភា ឆ្នាំ២០១៤ នឹងប៉ះទៅលើតំបន់មាត់សមុទ្រ និងតំបន់ទំនាបកណ្ដាល ដោយឡែកសម្រាប់តំបន់ខ្ពង់រាបរដូវវស្សានឹងឈានចូលមកនៅសប្ដាហ៍ទី៤ នៃខែឧសភា ឆ្នាំ២០១៤។
ក្រសួងធនធានទឹកនិងឧតុនិយម បានអំពាវនាវឲ្យប្រជាពលរដ្ឋនិងអាជ្ញាធរដែនដីនៅគ្រប់ខេត្តក្រុងក្នុងប្រទេសកម្ពុជា ត្រូវមានការប្រុងប្រយ័ត្នចំពោះគ្រោះធម្មជាតិ ដែលនឹងកើតមាននៅក្នុងខែឧសភា រហូតដល់ខែមិថុនា ឆ្នាំ២០១៤។ នៅចន្លោះពេលនេះ អាកាសធាតុមានភាពអាប់អួខ្លាំង ដែលអាចបង្កជាភ្លៀងផ្គររន្ទះនិងខ្យល់កន្ត្រាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។