ក្រុងសៀមរាបដែលជាខេត្តទាក់ទាញភ្ញៀវទេសចរណ៍បរទេសបំផុត បានដាច់ចរន្តអគ្គិសនី នៅតំបន់ខ្លះរបស់ទីក្រុងជាង២០ម៉ោងមកហើយ គិតមកត្រឹមវេលាថ្ងៃត្រង់ថ្ងៃច័ន្ទ ទី១៦ ខែមីនា។
ការគ្មានថាមពលអគ្គិសនីនៅក្នុងទីក្រុងមួយនេះ កំពុងបង្កើតចេញជាផលប៉ះពាល់ជាច្រើនដូចជាប្រជាពលរដ្ឋគ្មានអគ្គិសនី ប្រើប្រាស់ដើម្បីប្រកបរបរប្រចាំថ្ងៃ ប្រព័ន្ធទូរស័ព្ទខ្លះមិនអាចហៅចេញ សញ្ញាភ្លើងបញ្ជាចរាចរណ៍រលត់ ព្រមទាំងស្ថានីយវិទ្យុមួយចំនួនត្រូវផ្អាកដំណើរផ្សាយជាដើម។
ប្រជាពលរដ្ឋជាច្រើន រស់នៅក្នុងទីក្រុងសៀមរាប បានត្អូញត្អែរពីការលំបាកដេកពួន ព្រមទាំងគ្មានទឹកប្រើប្រាស់ នៅពេលដែលចរន្តអគ្គិសនី បានដាច់រយៈពេលយូរជាង២០ម៉ោងមកនេះ។
ក្រុមអ្នកភូមិខ្លះនាំគ្នាកាន់ទូរស័ព្ទដៃ និងឆ្នាំងសាកថ្ម ហើយបើកម៉ូតូស្វែងរកកន្លែងដែលមានអគ្គិសនី ដើម្បីបញ្ចូលថាមពលឱ្យបានប្រើប្រាស់តទៅទៀត។
ប្រជាពលរដ្ឋម្នាក់រស់នៅភូមិវិហារចិន សង្កាត់ស្វាយដង្គំ ក្រុងសៀមរាប គឺលោក កាយ កឺយ មានប្រសាសន៍កាលពីព្រឹកថ្ងៃច័ន្ទទី១៦ ខែមីនាថា រូបគាត់ និងប្រជាពលរដ្ឋជាច្រើនគ្រួសារទៀត កំពុងជួបការលំបាក បន្ទាប់ពីគ្មានអគ្គិសនីប្រើប្រាស់។ ការលំបាកទាំងនោះដូចជាមិនអាចស្នាក់នៅក្នុងផ្ទះបាន ព្រមទាំងមិនអាចបើកទូរទស្សន៍មើលព័ត៌មាននានាជាដើម៖ «លំបាកណាស់ក្ដៅដេក មិនបាន សម្រាន្តមិនសូវលក់ទេ ផ្ទះស័ង្កសីផងក្ដៅងាកៗចុះងូតទឹកៗ។ អណ្ដូងសប់ ម៉ូទ័រអីបូមអត់កើតទេ»។
ស្ត្រីម្នាក់ទៀតឈ្មោះ សុខ បាន ជាអ្នកភូមិតាវៀន សង្កាត់សាលាកំរើក បានត្អូញត្អែរប្រហាក់ប្រហែលគ្នាថាមុខរបរប្រចាំថ្ងៃរបស់គាត់បានកកស្ទះ ដោយសារតែគ្មានអគ្គិសនីប្រើប្រាស់៖ «ដាច់តាំងពីក្បាលល្ងាចអត់ទាន់ភ្លឺផង មិនទាន់ភ្ជាប់មកវិញទេ។ លំបាកក្ដៅ ហើយការងារខាត់ឈើខាត់អី វាស្ទះមិនមានអ្វីធ្វើកើត»។
ចរន្តអគ្គិសនីបានដាច់នៅតាមតំបន់ខ្លះ នៃក្រុងសៀមរាប ចាប់តាំងតែពីវេលាម៉ោងជាង៥ល្ងាចថ្ងៃទី១៥ ខែមីនា ហើយរហូតមកដល់ថ្ងៃត្រង់ថ្ងៃទី១៦ ខែមីនា នៅមិនទាន់តភ្ជាប់នៅឡើយ។
កាលពីរាត្រីថ្ងៃទី១៥ ខែមីនាកន្លងទៅ ប្រជាពលរដ្ឋខ្លះ បានជញ្ជូនកូនចៅចេញពីផ្ទះ សំដៅទៅរកជួលបន្ទប់ផ្ទះសំណាក់ដេក ក៏ប៉ុន្តែផ្ទះសំណាក់ជាច្រើនបានឡើងថ្លៃពី២០ទៅ២៥ដុល្លារក្នុង១យប់ ចំណែកផ្ទះសំណាក់ខ្លះទៀត ក៏មិនអាចទទួលភ្ញៀវបាន ដោយសារតែគ្មានអគ្គិសនីដែរ។
វិទ្យុអាស៊ីសេរី មិនអាចទាក់ទងអង្គភាពអគ្គិសនីប្រចាំខេត្តសៀមរាប ដើម្បីសុំការបំភ្លឺជុំវិញរឿងនេះបានទេ ដោយសារតែប្រព័ន្ធទូរស័ព្ទជាច្រើន មិនអាចហៅចេញបាន។
ប្រភពពីប្រជាពលរដ្ឋឱ្យដឹងថាការដាច់អគ្គិសនី រយៈពេលយូរនៅក្នុងក្រុងសៀមរាបនេះ គឺបណ្ដាលមកពីរថយន្ត បានបើកបុកបង្គោលភ្លើង១ដើមដួលខូចខាត នៅឃុំស្រណាល ភាគខាងកើតនៃទីរួមស្រុកក្រឡាញ់ ចម្ងាយជាង៦០គីឡូម៉ែត្រភាគខាងលិច ពីខេត្តសៀមរាប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។