មន្ត្រីមានសមត្ថកិច្ចនៅច្រកព្រំដែនព្រែកចាក ខេត្តកំពត ជាប់ចំណុចស្រុកហាទៀង ខេត្តគៀងយ៉ាង វៀតណាម បានឲ្យដឹងថា ទំនាស់រវាងអ្នករកស៊ីដឹកទំនិញកម្ពុជា ជាមួយអាជ្ញាធរវៀតណាម ដែលកើតឡើងកាលពីថ្ងៃទី៩ តុលា បានដោះស្រាយចប់ហើយ។ មន្ត្រីដដែលឲ្យដឹងថា មូលហេតុដែលនាំឲ្យកើតមានទំនាស់នេះ គឺដោយសារគយចល័តវៀតណាម ចាប់ទំនិញអ្នករកស៊ីដឹកទំនិញតាមម៉ូតូ កង់ ហើយទារឲ្យបង់ពន្ធ។
លោក អ៊ឹម ប៉ុណ្ណា ប្រធានទីស្នាក់ការព្រំដែនព្រែកចាក ក្នុងខេត្តកំពត ជាប់ជាមួយខេត្តគៀងយ៉ាង របស់វៀតណាម បានឲ្យដឹងនៅថ្ងៃទី១០ តុលា ថា មានការទាស់គ្នាតវ៉ាមែន តែមិនមានជាបាតុកម្ម និងបិទច្រកព្រំដែនរវាងកម្ពុជា និងវៀតណាមឡើយ៖ «មិនមែនបិទមិនឲ្យខ្មែរយើងឆ្លងទៅទេ។ ខ្មែរយើងអ្នករស់នៅជាប់ព្រំប្រទល់នោះ គាត់រកស៊ីចូលទៅក្នុងវៀតណាម គយចល័តវៀតណាមចាប់។ ដល់ពេលគយចល័តវៀតណាមចាប់ គាត់អត់មានមកប្ដឹងសមត្ថកិច្ចយើងជួយសម្រួលទេ គាត់លើកគ្នាទៅតវ៉ាជាមួយគេ ដូច្នេះមិនមានបិទផ្លូវទេ។ រួចហើយភាគីខាងយើងបានចាត់តំណាងទៅចរចាជាមួយវៀតណាម ហើយក៏ត្រូវរ៉ូវគ្នា សុខចិត្តទទួលយកទាំងសងខាង ហើយក៏ចប់ទៅ»។
កាលពីថ្ងៃទី៩ តុលា អ្នករកស៊ីដឹកទំនិញនៅច្រកព្រំដែនព្រែកចាក បានឲ្យដឹងថា មានបាតុកម្មតវ៉ាមួយកើតឡើងរវាងអ្នករកស៊ីដឹកទំនិញកម្ពុជា ជាមួយអាជ្ញាធរវៀតណាម ដោយសារអាជ្ញាធរវៀតណាម បិទមិនឲ្យអ្នករកស៊ីដឹកទំនិញកម្ពុជា ដឹកទំនិញចូលទៅក្នុងប្រទេសវៀតណាម តែពួកគេបែរជាអនុញ្ញាតឲ្យអ្នករកស៊ីដឹកទំនិញវៀតណាម ចូលមកកម្ពុជា។ ការតវ៉ានោះមានមនុស្សច្រើននាក់ចូលរួម ហើយមានការស្រែកទាមទារជាសាធារណៈទៀតផង។
ប្រជាពលរដ្ឋមួយរូបឈ្មោះ ស៊ិន រ៉ាស៊ី ដែលជាអ្នករកស៊ីដឹកទំនិញចេញចូលតាមច្រកព្រំដែនព្រែកចាកនោះ បាននិយាយថា កាលពីថ្ងៃទី៩ តុលា មានការកកស្ទះទំនិញដោយសារមានការតវ៉ារឿងអាជ្ញាធរវៀតណាម ចាប់ទំនិញខ្មែរ៖ «មកពីអត់ឲ្យខ្មែរយើងចូល។ រាល់ថ្ងៃគេឲ្យចូលធម្មតា យើងដឹកទំនិញចូល ហើយយួនដឹកទំនិញចេញមកអ៊ីចឹងទៅ។ ប៉ុន្តែម្សិលមិញ (៩ តុលា) គេអត់ឲ្យចេញ។ អត់ដឹងមូលហេតុអីទេ គេមិនឲ្យចូល ហើយឆែកឆេរពេញហ្នឹង»។
ប្រភពពីអ្នករកស៊ីផ្សេងទៀតនៅច្រកព្រំដែនព្រែកចាក ភូមិថ្កូវ ឃុំឫស្សីស្រុកខាងលិច ស្រុកកំពង់ត្រាច ខេត្តកំពត បានឲ្យដឹងថា ទំនាស់កាលពីថ្ងៃទី៩ តុលា រវាងអ្នករកស៊ីដឹកទំនិញកម្ពុជា ជាមួយគយចល័តវៀតណាម ដោយសារគយចល័តវៀតណាម ចាប់ឲ្យបង់ពន្ធ។ លោកបានឲ្យដឹងថា ធម្មតាអាជ្ញាធរវៀតណាម មិនចាប់ទំនិញដែលដឹកតាមកង់ ឬម៉ូតូឆ្លងដែនទៅវិញទៅមកក្នុងរូបភាពតិចតួចទេ។ ប៉ុន្តែច្បាប់របស់ប្រទេសវៀតណាម បានកំណត់ថា ទំនិញដែលឆ្លងដែនមានតម្លៃលើសពី ២លានដុង ឬស្មើប្រមាណ ១០០ដុល្លារអាមេរិក ត្រូវបង់ពន្ធ។ ដូច្នេះកាលណាក្រុមគយចល័តវៀតណាម សង្ស័យថា ម៉ូតូ ឬកង់ណាដឹកទំនិញចូលទៅក្នុងប្រទេសវៀតណាម ដែលមានតម្លៃលើសពី ១០០ដុល្លារអាមេរិក គឺគេអាចចាប់ឲ្យបង់ពន្ធបាន។ ដោយសារការចាប់ឲ្យបង់ពន្ធខុសប្រក្រតីនោះហើយ បានជាអ្នករកស៊ីដឹកទំនិញតាមកង់ និងម៉ូតូនាំគ្នាតវ៉ាជាក្រុមឡើង។
ទាក់ទងរឿងគយចល័តវៀតណាម ចាប់អ្នកដឹកទំនិញកម្ពុជា ឲ្យបង់ពន្ធបណ្តាលឲ្យមានទំនាស់នេះ អ្នកនាំពាក្យស្ថានទូតវៀតណាម នៅកម្ពុជា លោក ត្រឹង វ៉ាន់ថុង បានបដិសេធមិនធ្វើអត្ថាធិប្បាយឡើយ ដោយលោកឲ្យដឹងថា លោកពុំទាន់បានទទួលរបាយការណ៍ជាផ្លូវការអំពីអាជ្ញាធរព្រំដែនវៀតណាម នៅឡើយ។
ច្រកព្រំដែនកម្ពុជា-វៀតណាម នៅព្រែកចាក ជាច្រកអន្តរជាតិ ដែលមានភ្ញៀវទេចរ និងទំនិញឆ្លងកាត់ទៅវិញទៅមករវាងប្រទេសទាំង២។ ច្រកព្រំដែនព្រែកចាកនោះ មានកាស៊ីណូខ្នាតអន្តរជាតិចំនួន ៣កន្លែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។